Jisas Kraes hem i Pikinini blong Jeova, mo hem i beswan fren blong God, we hem i laekem tumas. Bifo we Jisas i laef long wol olsem wan man, hem i bin laef long heven olsem wan strongfala spirit man. (Jon 17:5) Biaen hem i kam long wol blong tijim trutok long saed blong God long ol man. (Jon 18:37) Mo tu, hem i givim laef blong hem blong bambae ol man we oli gat fasin obei oli save go fri long sin mo ded. (Rom 6:23) Naoia, Jisas i King long Kingdom blong God. Kingdom ya i wan gavman long heven we bambae i mekem wol i kam Paradaes.—Revelesen 19:16.

Ol enjel tu oli fren blong God. Ol enjel oli no ol man we oli bin laef long wol bifo. God i wokem olgeta long heven, bifo we hem i wokem wol ya. (Job 38:4-7) I gat plante milian enjel. (Daniel 7:10) Ol enjel we oli fren blong God long heven, oli wantem se ol man oli lanem trutok long saed blong Jeova.—Revelesen 14:6, 7.

God i gat ol fren long wol tu; hem i singaot olgeta se ol witnes blong hem. Wan man we i givim witnes long kot, hem i talemaot ol samting we hem i save long saed blong wan man no wan samting. Ol Witnes blong Jeova oli talem long ol narafala man, ol samting we oli save long saed blong Jeova mo stamba tingting blong hem. (Aesea 43:10) Olsem ol enjel, ol Witnes tu oli wantem halpem yu blong lanem trutok long saed blong Jeova. Oli wantem se yu tu yu kam wan fren blong God.