God i wantem se yu yu fren blong hem. ?Yu yu tingbaot finis se yu save kam wan fren blong Man ya we i hae moa long olgeta samting long heven mo wol? Ebraham, we i laef longtaem bifo, hem i wan fren blong God. (Jemes 2:23) Baebol i tokbaot sam narafala man we olgeta tu oli frengud wetem God mo oli kasem bigfala blesing from. Tede, ol man blong olgeta ples long wol oli save kam ol fren blong God. Yu tu yu save kam fren blong God.

Fasin fren wetem God i moa gud i winim fasin fren wetem ol man. God i neva mekem i no stret long wan fren we i stap tru long hem. (Ol Sam 18:25) Blong stap olsem wan fren blong God hem i moagud i winim we yumi gat plante sas samting. Taem wan rijman i ded, mane blong hem i go long narafala man. Be, man we i gat wan gudfala fasin fren wetem God, hem i gat wan sas samting we narafala man i no save karemaot.—Matiu 6:19.

Maet sam man oli traem stopem yu blong lanem moa long saed blong God. Ol fren blong yu, mo famle blong yu tu, oli save mekem olsem. (Matiu 10:36, 37) Sipos ol narafala oli laf long yu no oli tok strong long yu, askem long yu wan se: ‘?Mi mi wantem mekem hu i glad? ?Ol man no God?’ Tingbaot samting ya: ?Sipos wan man i talem long yu se bambae yu mas stop blong kakae, bambae yu obei long hem? !No gat! Yu nidim kakae blong stap laef. !Be blong kasem laef blong olwe, yu nidim God! Taswe, yu neva mas letem wan man i stopem yu blong lanem olsem wanem blong kam wan fren blong God.—Jon 17:3.