Setan i wantem se yu joen long ol wok blong majik. Plante man oli mekem sam sakrefaes i go long ol bubu we oli ded finis, no long sam narafala spirit blong askem olgeta blong blokem olgeta long ol trabol. Oli mekem olsem from we oli fraet long paoa blong ol spirit man. Oli werem ol majik ring no jen. Oli dring sam spesel “meresin” no oli putum ol meresin ya long bodi blong olgeta from we oli ting se long rod ya bambae oli kasem sam spesel paoa. Long haos blong olgeta no insaed long graon, sam man oli haedem sam samting we oli talem se i gat paoa blong protektem olgeta. Sam narafala man oli yusum ol majik “meresin” from we oli ting se samting ya bambae i mekem oli win gud long bisnes blong olgeta, long eksam blong skul, no taem oli fren wetem wan boe no gel.

Beswan rod blong protektem yu long paoa blong Setan, hemia sipos Jeova hem i fren blong yu. Jeova God mo ol enjel blong hem oli gat moa paoa i bitim Setan mo ol devel. (Jemes 2:19; Revelesen 12:9) Jeova i wantem tumas blong yusum paoa blong hem blong givhan long ol fren blong hem—hemia ol man ya we oli stap tru long hem oltaem.—2 Kronikel 16:9.

Tok blong God i talem se: “Yufala i no mas mekem ol bisnes blong posen mo kleva.” Jeova i agensem ol wok blong majik mo kleva from we ol wok ya oli save pulum man i kam stret aninit long paoa blong Devel Setan.—Levitikas 19:26.