Blong kam wan fren blong God, yu nidim blong lanem moa long saed blong hem. ?Ol fren blong yu oli save nem blong yu mo oli yusum nem ya? Yes, oli mekem olsem. God i wantem se yu yu save nem blong hem mo yu yusum nem ya tu. Nem blong God hem i Jeova. (Ol Sam 83:18, NW; Matiu 6⁠9) Mo tu, yu mas lanem wanem samting we hem i laekem mo wanem samting we hem i no laekem. Yu mas save hu ya ol fren blong hem mo hu ya ol enemi blong hem. I tektaem blong save gud wan man. Baebol i talem se i waes blong tekem taem blong lanem moa long saed blong Jeova.—Efesas 5:15, 16.

Ol fren blong God oli mekem samting we hem i glad long hem. Tingbaot ol fren blong yu. Sipos yu mekem i nogud long olgeta, no sipos yu mekem samting we olgeta oli no laekem, ?bambae oli gohed blong frengud wetem yu? !No gat! Long sem fasin, sipos yu wantem kam wan fren blong God, yu mas mekem ol samting we hem i glad long hem.—Jon 4:24, NW.

I no olgeta skul evriwan we oli givhan long man blong fren wetem God. Jisas, we i gudfala fren blong God, i tokbaot tu rod. Wan rod i bigwan mo i fulap long man. Rod ya i lidim man i go blong lus. Narafala rod i smol nomo, mo smol man oli folem. Rod ya i lidim man i go long laef we i no save finis. Samting ya i minim se sipos yu wantem kam wan fren blong God, yu mas lanem stret rod blong mekem wosip long God.—Matiu 7:13, 14.