Sipos yu wantem kam wan fren blong God, yu mas joen long skul we God i agri long hem. Jisas i talem se ol “trufala man blong wosip” bambae oli wosipim God wetem “trutok.” (Jon 4:23, 24, NW) I gat wan stret rod nomo blong wosipim God. (Efesas 4:4-6) Trufala skul i lidim man i go long laef we i no save finis, mo giaman skul i lidim man i go blong lus.—Matiu 7:13, 14.

Bambae yu luksave trufala skul sipos yu luk fasin blong olgeta we oli folem skul ya. From we Jeova i gud, ol trufala man blong wosipim hem tu oli mas ol gudfala man. Wan gudfala tri blong aranis, bambae i karem ol gudfala aranis. Sem mak nomo, trufala skul i karem ol man we oli gat gudfala fasin.—Matiu 7:15-20.

Ol fren blong Jeova oli gat dip respek long Baebol. Oli save se Baebol i kamaot long God. Oli letem ol tok blong hem i lidim laef blong olgeta, i stretem problem blong olgeta, mo i givhan long olgeta blong lanem moa long saed blong God. (2 Timoti 3:16) Oli traem mekem ol samting we oli stap talemaot, i wok long laef blong olgeta.

 Ol fren blong Jeova oli soem lav long olgeta. Jisas i soem lav long ol man taem hem i tijim olgeta long saed blong God mo mekem ol sikman oli kamgud bakegen. Olgeta we oli folem trufala skul oli soem lav long ol narafala. Oli mekem olsem Jisas. Oli no daonem olgeta we oli puaman, mo olgeta we oli kamaot long defren laen no kantri. Jisas i talem se ol man bambae oli luksave ol man blong hem, from we ol man ya oli lavlavem olgeta.—Jon 13:35.

Ol fren blong God oli ona long nem blong God, Jeova. Sipos wan man i no wantem yusum nem blong yu, ?yu save talem se hem i wan gudfala fren blong yu? !No gat! Taem yumi gat wan fren, yumi yusum nem blong hem, mo yumi talem ol gudfala samting long saed blong fren ya long ol narafala. Taswe olgeta we oli wantem kam fren blong God, oli mas yusum nem blong hem mo tokbaot hem long ol narafala. Jeova i wantem we yumi mekem olsem.—Matiu 6:9; Rom 10:13, 14.

Olsem Jisas i bin mekem, ol fren blong God oli tijim narafala long saed blong Kingdom blong God. Kingdom blong God hem i gavman ya long heven we bambae i mekem wol i kam wan paradaes. Ol fren blong God oli serem gud nius ya long saed blong Kingdom blong God wetem ol narafala.—Matiu 24:14.

Ol Witnes blong Jeova oli traem kam ol fren blong God. Oli respektem Baebol mo oli lavlavem olgeta. Mo tu, oli yusum mo soem ona long nem blong God, mo oli tijim ol narafala long saed blong Kingdom blong God. Long wol tede, ol Witnes blong Jeova nao oli folem fasin blong trufala skul.