Ol nogud samting we oli stap hapen long wol naoia oli soemaot se Paradaes i klosap. Baebol i talem se, long taem bifo we Paradaes i kam, bambae laef i nogud tumas. !Yumi stap laef long taem ya naoia! Hemia sam long ol samting we Baebol i talem se oli mas hapen:

Ol bigfala faet. “Ol man bambae oli mekem faet long ol narafala man. Mo ol kantri bambae oli mekem faet long ol narafala kantri.” (Matiu 24:7) Profet tok ya i kamtru finis. Stat long yia 1914, i bin gat tu bigfala faet long wol mo plante smosmol faet bakegen. Plante milian man oli ded long ol faet ya.

Ol rabis sik bambae oli kam antap. ‘Bambae i gat ol strong sik oli kam spolem ol man.’ (Luk 21:11) ?Samting ya i kamtru? Yes. Kansa, sik blong hat, tibi, malaria, AIDS, mo ol narafala sik, oli kilim plante milian man oli ded.

Kakae i sot. Long plante ples long wol, ol man oli no gat inaf kakae. Plante milian man oli ded from hanggri evri yia. Hemia wan narafala saen se, i no longtaem, bambae Paradaes i kam. Baebol i talem se: “Ol man bambae oli gat hadtaem blong kasem kakae.”—Mak 13:8.

 Graon i seksek. “Olbaot long wol, bambae graon i seksek.” (Matiu 24:7) Samting ya tu i kamtru long taem blong yumi. Stat long 1914 i kam, bitim wan milian man i ded from graon we i seksek.

Ol rabis man. Ol man bambae “oli wantem mane tumas” mo oli “tingbaot olgeta nomo.” Bambae oli “wantem tumas ol samting we oli stap harem gud long hem i winim we oli stap lavem God.” Ol pikinini bambae oli “no save ona long papa mo mama blong olgeta.” (2 Timoti 3:1-5) ?Yu yu agri se, tede, i gat plante man olsem? Yes, ol man oli no gat respek long God, mo oli mekem trabol long olgeta we oli traem lanem moa long saed blong God.

Fasin blong brekem loa. “Bambae ol fasin nogud oli kam bigwan moa.” (Matiu 24:12) Ating bambae yu yu agri se fasin blong brekem loa i moa nogud i winim olgeta taem bifo. Ol man long evri ples oli stap long denja we narafala i stilim samting blong olgeta, i rabem olgeta, no i givim kil long olgeta.

Olgeta samting ya oli soemaot se Kingdom blong God i klosap. Baebol i talem se: “Taem yufala i luk we ol samting ya oli kamaot, bambae yufala i save se [“Kingdom blong God i klosap,” NW].” (Luk 21:31) ?Wanem ya Kingdom blong God? Hem i gavman blong God we i stap long heven mo we bambae i mekem Paradaes long wol. Kingdom blong God bambae i tekem ples blong ol narafala gavman blong man.—Daniel 2:44.