Setan mo ol rabis enjel blong hem oli no wantem we yu wosipim God. Sipos oli naf, bambae oli wantem pulum evri man blong lego God. ?Olsem wanem oli traem mekem samting ya? Wan rod hemia tru long giaman skul. (2 Korin 11:13-15) Wan skul i giaman sipos hem i no tijim trutok we i kamaot long Baebol. Giaman skul i olsem giaman mane—maet i luk olsem we hem i tru wan, be hem i pepa nating nomo. Mo hem i save mekem we yu kasem plante trabol.

Ol tijing blong giaman skul oli no save mekem Jeova i glad, from we hem i God blong trutok. Taem Jisas i stap long wol, i gat wan grup blong ol man blong skul we oli wantem kilim hem i ded. Oli ting se fasin blong wosip blong olgeta i stret. Oli talem se: “God nomo i Papa blong mifala.” ?Jisas i agri long tok ya? !No gat! Hem i talem long olgeta se: “Yufala i gat sem fasin nomo we papa blong yufala Setan, hem i gat.” (Jon 8:41, 44) Tede, plante man oli ting se oli wosipim God, be rili, oli folem Setan mo ol rabis enjel blong hem.—1 Korin 10:20.

 Olsem rabis tri i karem rabis frut, ol giaman skul oli karem ol man we oli gat rabis fasin. Wol i fulap long trabol from ol nogud fasin we ol man oli stap mekem. I gat rabis fasin long saed blong seks, faet, stil, fasin blong bos strong long narafala, fasin blong kilim man i ded, mo fasin blong repem narafala. Plante long olgeta we oli mekem ol nogud fasin ya, oli joen long wan skul, be skul blong olgeta i no pulum olgeta blong mekem ol gudfala fasin. Sipos oli no lego ol nogud fasin, bambae oli no save kam ol fren blong God.—Matiu 7:17, 18.

Giaman skul i tijim man blong prea long ol aedol. God i talem se yumi no mas prea long ol aedol. Hemia i stret. ?Bambae yu yu glad sipos wan man i neva toktok long yu, be oltaem hem i toktok long pija blong yu nomo? Sipos wan man i mekem olsem, ?man ya i wan trufala fren blong yu? Nogat. Jeova i wantem se ol man oli toktok long hem. Hem i no wantem se oli toktok long ol aedol no pija we oli no gat laef.—Eksodas 20:4, 5.

Giaman skul i tijim se i oraet blong kilim narafala man i ded long taem blong faet. Jisas i talem se ol fren blong God bambae oli lavlavem olgeta. Yumi no save kilim wan man i ded sipos yumi lavem hem. (Jon 13:35) I rong tu blong kilim i ded ol man we oli mekem nogud. Taem ol enemi blong Jisas oli kam blong holem hem, hem i no letem ol disaepol blong hem oli faet blong protektem hem.—Matiu 26:51, 52.

Giaman skul i tijim se ol nogud man bambae oli safa long helfaea. Be Baebol i tijim se, ded, hemia nao panis blong sin. (Rom 6:23) Jeova hem i stamba blong lav. ?Wan God we i gat lav, hem i save mekem man i safa blong olwe? !Nogat! Long Paradaes, bambae i gat wan skul nomo, hemia skul we Jeova i agri long hem. (Revelesen 15:4) Olgeta skul we oli stanap long ol giaman tok blong Setan, bambae oli lus.