Blong no lusum wan fren, yu mas stap toktok wetem hem oltaem. Yu lesin long hem, mo hem i lesin long yu. Mo tu, yu talem ol gudfala samting long saed blong fren blong yu long ol narafala man. Hemia i sem mak sipos yumi stap olsem fren blong God. Tingbaot wanem we Baebol i talem long saed ya:

Toktok long Jeova oltaem tru long prea. “Yufala i mas prea oltaem.”—Rom 12:12.

Ridim Tok blong God, Baebol. “Olgeta tok blong Baebol oli kamaot long God fastaem. Hem i putum long tingting blong ol man ya bifo, nao oli raetem long buk. Ol tok ya i stret gud blong tijim yumi long ol trutok, mo blong blokem ol krangke tok.”—2 Timoti 3:16.

Tijim ol narafala man long saed blong God. “Yufala i mas go long ol man long olgeta ples long wol, blong pulum olgeta oli kam man blong mi. . . . Yufala i mas tijim olgeta blong oli folem olgeta tok ya we mi mi givim finis long yufala.”—Matiu 28:19, 20.

 Kam klosap moa long ol fren blong God. “Sipos man i go joen long ol waes man, bambae hem i save kam waes, be sipos hem i go mekem fren wetem ol man we oli no gat hed, bambae hem i spolem hem nomo.”—Ol Proveb 13:20.

Kam long ol miting long Haos Kingdom. “I gud yumi stap tingbaot yumi, blong yumi givgivhan long yumi blong mekem yumi strong blong lavem ol man, mo blong mekem ol gudfala fasin. . . . Yumi mas toktok gud long yumi blong leftemap tingting blong yumi.”—Hibrus 10:24, 25.

Sapotem wok blong Kingdom. “Nao evri man oli mas givim sam samting, olsem we olgeta wanwan oli jusumaot. I nogud man i givim samting long sore nomo, no from we hem i harem olsem we olgeta oli fosem hem, from we God i lavem man we i save givim samting long gladhat blong hem.”—2 Korin 9:7.