Jeova i no save letem ol nogud man oli spolem Paradaes. Ol fren blong hem nomo bambae oli laef long ples ya. ?Wanem bambae i hapen long ol nogud man? Blong kasem ansa, tingbaot trufala stori ya blong Noa. Noa i laef plante taosen yia bifo. Hem i wan gudfala man we oltaem i traehad blong mekem wanem we Jeova i wantem. Be ol narafala man long wol oli mekem ol fasin we oli nogud. Taswe Jeova i talem long Noa se bambae Hem i mekem wan bigfala wota i ron blong spolem olgeta rabis man ya. Hem i talem long Noa blong wokem wan bigfala sip blong bambae hem mo famle blong hem oli no ded taem Bigfala Wota ya i ron.—Jenesis 6:9-18.

Noa mo famle blong hem oli wokem bigfala sip. Noa i givim woning long ol man se Bigfala Wota bambae i ron, be oli no lesin long hem. Oli gohed blong mekem ol fasin we oli nogud. Afta we bigfala sip ya i finis, Noa i tekem ol anamol oli go insaed long sip ya, mo hem wetem famle blong hem tu, oli go insaed. Ale, Jeova i mekem bigfala ren i foldaon. Ren ya i foldaon long 40 dei mo 40 naet. Wota i kam antap mo i kavremap ful wol.—Jenesis 7:7-12.

 Ol rabis man oli lusum laef blong olgeta, be Noa mo famle blong hem oli sef. Jeova i mekem olgeta oli sef taem Bigfala Wota ya i ron, nao oli stap long wan wol we i no moa gat rabis man. (Jenesis 7:22, 23) Baebol i talem se i gat wan taem i stap kam we, bakegen, Jeova bambae i spolem ol man we oli no wantem mekem fasin we i stret. Ol gudfala man, bambae oli no save lus. Bambae oli laef blong olwe long wol ya we i kam Paradaes.—2 Pita 2:5, 6, 9.

Tede plante man oli mekem ol fasin we oli nogud. Wol i fulap long trabol. Jeova i sanem ol Witnes blong hem oli go bakegen mo bakegen blong givim woning long ol man, be bighaf blong olgeta oli no wantem lesin long ol tok blong Jeova. Oli no wantem jenisim fasin blong olgeta. Oli no wantem agri long ol samting we God i talem se i stret blong mekem mo samting we i no stret blong mekem. ?Wanem bambae i hapen long ol man ya? ?Bambae oli save jenis yet wan dei? Plante long olgeta bambae oli neva jenisim fasin blong olgeta. Taem i stap kam we bambae ol rabis man oli lus olgeta, mo bambae oli neva save laef bakegen samtaem.—Ol Sam 92:7.

Graon ya bambae i no save lus; bambae hem i kam wan paradaes. Olgeta we oli kam fren blong God bambae oli laef blong olwe long Paradaes ya long wol.—Ol Sam 37:29.