?God i Wantem Se Laef i Olsem Wanem?
TAEM yu ridim niuspepa, wajem TV, mo lesin long radio, yu luk mo harem plante stori blong faet, man i kilim man, stil, mo wok blong ol teroris. Mo tu, maet yu yu sik, no yu stap harem nogud from wan fren no famle blong yu we i ded.
Traem tingbaot ol kwestin ya:
-
?God i wantem se mi mo famle blong mi i kasem trabol olsem?
-
?Wanem i save givhan long mi blong mi winim ol trabol ya?
-
?Samtaem bambae i gat pis long wol?
Baebol i ansa long ol kwestin ya.
BAEBOL I TIJIM SE GOD BAMBAE I MEKEM OL NAMBAWAN SAMTING LONG WOL YA.
-
Ol man bambae oli no moa sik, kam olfala, mo ded.—Revelesen 21:4
-
“Olgeta we leg blong olgeta i nogud, bambae leg blong olgeta i kam gud.”—Aesea 35:6
-
“Ol blaen man bambae oli save lukluk.”—Aesea 35:5
- Ol dedman bambae oli laef bakegen.—
-
Sik bambae i finis.—Aesea 33:24
-
Bambae i gat plante kakae.—Ol Sam 72:16
KASEM BLESING FROM OL TIJING BLONG BAEBOL
Maet yu ting se ol samting we yu jes ridim i wan drim nomo. Be i no olsem. God i promes se i no longtaem, bambae hem i mekem ol jenis ya. Mo Baebol i eksplenem olsem wanem bambae hem i mekem.
Be i no hemia nomo. Baebol i givim save we yumi nidim blong gat wan hapi laef naoia. Traem tingbaot ol samting we yu wari from, olsem mane, trabol long famle, sik, no wan famle no fren i ded. Baebol i save givhan long yu, blong yu winim ol wari ya, mo yu faenem ansa blong ol kwestin ya:
-
?Bambae yumi luk bakegen ol famle mo fren blong yumi we oli ded?
-
?From wanem yumi bilif se God bambae i mekem ol promes ya oli kamtru?
I gud tumas we yu stap ridim buk ya. Hemia i soemaot se yu wantem save samting we Baebol i tijim. Buk ya bambae i halpem yu. Long evri pej, i gat ol kwestin daon. Bambae oli givhan long yu, blong yu kasem save moa long Baebol. Plante milian man oli glad blong stadi Baebol wetem ol Witnes blong Jehova. Mifala i hop se yu tu bambae yu harem gud blong mekem olsem. !Bambae God i blesem yu, taem yu traehad blong save ol samting we Baebol i tijim!