LESEN 22
?Olsem Wanem Yu Save Talemaot Gud Nius?
Taem yu lanem ol trutok blong Baebol maet yu stap tingbaot se, ‘!Evriwan oli sud save ol trutok ya!’ Yes i tru, evriwan i mas save. Be maet yu fraet blong tokbaot ol samting ya. I gud yumi tokbaot olsem wanem blong winim fraet ya mo glad blong serem gud nius blong Baebol.
1. ?Olsem wanem blong serem trutok we yu lanem wetem olgeta we yu save?
Ol disaepol blong Jisas oli talem se, “[mifala] i no save stop blong tokbaot samting we [mifala] i luk mo [mifala] i harem.” (Ol Wok 4:20) Olgeta oli laekem tumas ol trutok we oli lanem, nao oli wantem talemaot long evri man. ?Yu tu yu harem olsem? Sipos yes, i gud yu lukaot rod blong serem long ol famle mo fren, be wetem respek.—Ridim Kolosi 4:6.
Sam rod blong mekem
-
Taem yu stap toktok wetem wan famle, yu save statem storian olsem: “Mi lanem wan intresting samting long wik ya.”
-
Serem wan vas blong enkarejem wan fren we i sik o i stap wari.
-
Taem ol fren long wok oli askem sipos yu gat wan gudfala wik, yu save tokbaot samting we yu lanem long stadi o miting blong kongregesen.
-
Soem jw.org websaet long ol fren blong yu.
-
Invaetem narafala blong joenem yu long Baebol stadi, o soem olsem wanem blong askem Baebol stadi long jw.org.
2. ?From wanem i gud yu joen wetem kongregesen blong prij?
Ol disaepol blong Jisas oli no talemaot gud nius nomo long ol man we oli save. Jisas i “sanemaot olgeta oli go tutu long evri taon” blong oli prij. (Luk 10:1) Fasin ya we Jisas i mekem, i givim janis long plante moa man blong oli harem gud nius. Mo tu, taem ol disaepol oli joen wanples blong prij hemia i givim glad. (Luk 10:17) ?Yu ting se i posibol blong joen wetem kongregesen blong prij?
DIGIM MOA
Faenemaot olsem wanem blong winim fraet, mo ekspiriensem glad long wok blong talemaot gud nius.
3. Jehova bambae i stap wetem yu
Samfala oli wantem prij, be oli fraet se bambae oli mestem o oli fraet long samting we narafala i save mekem long olgeta.
-
?Yu yu fraet blong tokbaot samting we yu lanem? ?From wanem yu ansa olsem?
Plei VIDEO, mo tokbaot kwestin ya.
-
?Wanem i givhan long ol yangfala ya blong oli no fraet?
Ridim Aesea 41:10, mo tokbaot kwestin ya:
-
?Sipos yu fraet blong prij from wanem yu mas prea?
?Yu yu save?
Plante Witnes blong Jehova, fastaem oli ting se oli neva save prij. Eksampol, Sergey i harem se hem i no naf mo i fraet blong toktok wetem ol narafala. Be naoia we hem i stadi Baebol, hem i talem se: “Nating se mi fraet, be mi tokbaot ol samting we mi lanem wetem ol narafala. Taem mi mekem olsem mi sapraes blong luk se mi no moa fraet. Mo tu, i mekem se mi bilif moa long ol samting we mi stap lanem.”
4. Soem respek
Taem yumi talemaot gud nius yumi no tingbaot nomo samting we yumi wantem talem, be yumi mas tingbaot tu fasin blong talem. Ridim 2 Timoti 2:24 mo 1 Pita 3:15, mo tokbaot ol kwestin ya:
-
?Olsem wanem yu save folem ol advaes ya taem yu tokbaot Baebol long narafala?
-
Sipos sam famle o fren oli no agri long ol samting we yu talem, ?wanem sam samting we yu save mekem o no mekem?
-
?From wanem i gud yu askem ol gudfala kwestin be yu no fosem hem blong bilivim yu?
5. Yu kasem glad taem yu talemaot gud nius
Jehova i givim wok ya blong talemaot gud nius long Jisas. ?Jisas i gat wanem tingting long wok ya? Ridim Jon 4:34, mo tokbaot ol kwestin ya:
-
Ol helti kakae oli mekem yumi laef longtaem mo yumi hapi. ?From wanem Jisas i talem se wil o wok blong Jehova i olsem kakae blong hem?
-
?Yu ting se bambae yu harem olsem wanem taem yu talemaot gud nius?
Sam gudfala tingting
-
Long taem blong miting blong wik i gud yu lukaot rod blong statem storian.
-
Askem blong joen olsem wan studen long miting blong wik. Hemia bambae i halpem yu blong tokbaot ol samting we yu lanem.
-
Yusum haf ya “Sam Man Oli Se” o “Maet Man i Askem Se” long buk ya, blong lanem blong ansa long ol kwestin o rong tingting blong ol man.
MAET MAN I ASKEM SE: “?Eh Afta? !Mi no luk yu longtaem!”
-
?Olsem wanem yu save yusum janis ya blong tokbaot ol samting we yu lanem long Baebol?
SAMARI
Yu kasem glad taem yu talemaot gud nius long narafala, mo maet i no had olsem yu bin stap tingbaot.
Tingtingbak
-
?From wanem i gud blong talemaot gud nius long narafala?
-
?Olsem wanem blong mekem wetem respek?
-
?Bambae yu mekem wanem sipos yu fraet?
FAENEMAOT
Luk fo rod blong yusum kad blong jw.org blong talemaot gud nius.
Luk fo gudfala fasin we i save halpem yu blong talemaot gud nius.
“?Yu Yu Rere Blong Kam Wan Man Blong Pulum Man?” (Wajtaoa, Septemba 2020)
Wajem wan eksampol long Baebol we i save enkarejem yu blong talemaot gud nius, nating sipos yu yangfala.
Faenemaot olsem wanem yu save tokbaot Baebol long ol famle we oli no save Jehova.
“Yu Traem Kasem Hat Blong Famle Blong Yu We i No Bilif” (Wajtaoa, 15 Maj 2014)
Maet Yu Laekem Hemia Tu
KWESTIN WE PLANTE MAN OLI STAP ASKEM
Baebol Stadi Kos We Yu Save Mekem Wetem Ol Witnes Blong Jehova
Yu save yusum eni translesen blong Baebol blong mekem wan fri Baebol stadi kos wetem ol Witnes blong Jehova. Singaot ol famle mo ol fren tu blong oli joen wetem yu.
