LESEN 38
Glad Long Presen Blong Laef
I gat plante samting we yumi save enjoem from we yumi laef. Nating se yumi fesem sam problem, be yumi stil save enjoem sam samting. ?Olsem wanem yumi save soemaot long Jehova se yumi glad blong stap laef? ?Mo from wanem i impoten blong mekem olsem?
1. ?From wanem yumi mas tinghae long laef?
Yumi sud glad o tinghae long laef, from we hemia wan presen we i kamaot long Papa blong yumi Jehova. Hem i “stamba blong laef,” from we hem nao i givim laef long olgeta samting. (Ol Sam 36:9) “Hem nomo i givim laef long olgeta man, mo i givim win we oli pulum, mo i givim olgeta samting.” (Ol Wok 17:25, 28) Jehova i givim samting we yumi nidim blong yumi stap laef. Be i no hemia nomo, hem i mekem sam samting tu blong yumi save enjoem laef ya.—Ridim Ol Wok 14:17.
2. ?Olsem wanem blong soem se yumi tinghae long laef?
Jehova i kea long yu taem yu jes stat blong fom long bel blong mama blong yu. Long Baebol, wan man blong God hemia Deved, i prea se: “Ae blong yu i luk mi finis, nating se bodi blong mi i jes stat blong gru.” (Ol Sam 139:16) Jehova i rili tinghae long laef blong yu. (Ridim Matiu 10:29-31.) Hem bambae i harem nogud sipos wan man i minim nomo blong kilim narafala, o kilim hem wan i ded. a (Eksodas 20:13) Jehova i harem nogud tu taem yu mekem sam samting we i save putum laef blong yu o blong narafala long denja. Taem yumi lukaotgud long laef blong yumi mo yumi respektem laef blong ol narafala, yumi soemaot se yumi tinghae long nambawan presen ya blong laef.
DIGIM MOA
Makem sam samting we yu save mekem, we i soem se yu tinghae long presen ya blong laef.
3. Keagud long helt blong yu
Ol Kristin we oli givim laef blong olgeta long Jehova, oli promes blong yusum ful laef blong olgeta blong mekem wok blong hem. Hemia i olsem we oli givim bodi blong olgeta olsem wan sakrefaes i go long God. Ridim Rom 12:1, 2, mo tokbaot ol kwestin ya:
-
?From wanem yu mas keagud long helt blong yu?
-
?Wanem sam rod we yu save folem blong mekem olsem?
4. Tingbaot sefti blong yu mo blong ol narafala
Baebol i enkarejem yumi blong no mekem ol samting we i denja. Plei VIDEO blong luk sam samting we yu save mekem blong stap sef.
Ridim Ol Proveb 22:3, mo tokbaot olsem wanem yu mo ol narafala i save stap sef . . .
-
long haos.
-
long ples blong wok.
-
taem yu stap plei spot.
-
taem yu stap draev o yu stap long wan trak.
5. Respektem laef blong bebi we i no bon yet
Deved i tokbaot tingting we Jehova i gat long wan bebi we i stap gru long bel blong mama blong hem. Ridim Ol Sam 139:13-17, mo tokbaot kwestin ya:
-
Long lukluk blong Jehova, ?laef i stat wetaem, long taem we hem i bon o taem hem i jes fom long bel blong mama blong hem?
Loa we Jehova i givim long ol man Isrel i protektem ol pikinini we oli no bon yet mo mama blong olgeta. Ridim Eksodas 21:22, 23, mo tokbaot ol kwestin ya:
-
?Wanem tingting blong Jehova long wan man we i mestem nao i kilim bebi we i stap long bel?
-
?Bambae Hem i harem olsem wanem sipos wan man i minim nomo blong kilim bebi long bel? b
-
?Yu yu harem olsem wanem long tingting ya blong God?
Maet wan woman we i tinghae long laef, hem tu i save gat tingting ya se wan rod nomo hemia blong kilim bebi long bel. Ridim Aesea 41:10, mo tokbaot ol kwestin ya:
-
Sipos ol man oli fosem wan woman blong i kilim pikinini long bel, ?woman ya i save askem hu blong i givhan long hem? ?From wanem?
SAM MAN OLI SE: “Sipos wan woman i wantem kilim pikinini long bel, hem i save mekem from we hem i bodi blong hem.”
-
?Wanem i pruvum se Jehova i tinghae long laef blong wan mama wetem bebi we i stap long bel blong hem?
SAMARI
Baebol i tijim yumi blong lavem, respektem mo lukaotgud long presen blong laef we Jehova i givim. Hemia i minim laef blong yumi wan mo laef blong ol narafala.
Tingtingbak
-
?From wanem Jehova i tinghae long laef blong ol man?
-
?Jehova i harem olsem wanem taem wan man i minim nomo blong endem laef blong wan narafala o blong hem wan?
-
?Yu yu laekem presen ya blong stap laef? ?From wanem?
FAENEMAOT
?Olsem wanem yumi save talem tangkiu long Jehova from presen blong laef?
Faenemaot ansa blong kwestin ya, ?God i save fogivim wan woman we i kilim pikinini long bel?
“?Baebol i Talem Wanem Long Saed Blong Kilim Pikinini Long Bel?” (Web atikol)
Tingting we God i gat long saed blong laef, i sud afektem ol desisen blong yumi long saed blong ol spot mo pleplei.
“‘Extreme Sports’—Should You Take the Risk?” (Wekap!, 8 Oktoba 2000)
Faenemaot olsem wanem Baebol i save givhan long wan man we i wantem kilim hem wan i ded.
“Mi Wantem Ded—?Baebol i Save Givhan Taem Mi Gat Tingting Ya Blong Kilim Ded Mi Wan?” (Web atikol)
a Jehova i kea bigwan long olgeta we hat blong olgeta i brok. (Ol Sam 34:18) Taem wan man i harem nogud mo i wantem kilim hem wan i ded, Jehova i kasemsave filing blong hem mo i wantem givhan long hem. Blong save moa, ridim atikol ya “Mi Wantem Ded—?Baebol i Save Givhan Taem Mi Gat Tingting Ya Blong Kilim Ded Mi Wan?” we i stap long haf ya “Faenemaot.”
b Olgeta we oli harem se oli gilti bitim mak from we oli bin kilim pikinini long bel, i gud oli tingbaot se Jehova i save fogivim olgeta. Blong save moa, luk atikol ya “?Baebol i Talem Wanem Long Saed Blong Kilim Pikinini Long Bel?” we i stap long haf ya “Faenemaot.”
Maet Yu Laekem Hemia Tu
KWESTIN WE PLANTE MAN OLI STAP ASKEM
Baebol Stadi Kos We Yu Save Mekem Wetem Ol Witnes Blong Jehova
Yu save yusum eni translesen blong Baebol blong mekem wan fri Baebol stadi kos wetem ol Witnes blong Jehova. Singaot ol famle mo ol fren tu blong oli joen wetem yu.
