LESEN 44
?God i Agri Long Olgeta Lafet?
Jehova i wantem se yumi enjoem laef mo tu mekem lafet sam samtaem. Be hem i no agri long olgeta lafet. Long taem olsem, ?yumi save mekem wanem blong soem long Jehova se yumi lavem hem?
1. ?From wanem Jehova i no agri long plante lafet?
Maet bambae yu sapraes blong lanem se, plante lafet oli no stanap long ol tijing blong Baebol mo oli kamaot long ol hiten lafet. Ol lafet olsem oli joen long bilif blong ol giaman skul. Oli joen wetem wok blong ol rabis spirit, mo oli stanap long bilif ya se sol i no save ded. Sam lafet oli kamaot long bilif ya se badlak mo gudlak i save hapen long ol man. (Aesea 65:11) Jehova i talem long ol man blong hem se: “Yufala i mas kamaot long olgeta . . . mo yufala i no mas tajem ol samting we oli no klin.”—2 Korin 6:17. a
2. ?Wanem tingting blong Jehova long ol lafet we i givim ona long ol man?
Jehova i givim woning long yumi blong no foldaon long trap ya blong “trastem man we i nating nomo.” (Ridim Jeremaea 17:5.) Sam holide oli givim ona long ol rula o ol soldia. Sam oli mekem seremoni blong givim ona long kantri o blong makem dei blong independens. (1 Jon 5:21) I gat sam narafala lafet we oli mekem blong leftemap politik o sosol oganaesesen. ?Jehova bambae i harem olsem wanem sipos yumi givim ona long wan man o wan oganaesesen we i promotem ol tingting we i agensem ol tingting blong Hem?
3. ?Wanem i save mekem se God i no glad long wan lafet?
Baebol i talem se i rong blong yumi “dring bitim mak, mo [yumi] mekem ol rabis lafet, mo [yumi] stap mekem ol lafet blong dring.” (1 Pita 4:3) Long sam lafet, ol man oli gat fasin we i wael olgeta mo oli stap mekem ol rabis fasin. Blong stap olsem fren blong Jehova, yumi mas stap longwe long ol fasin ya we oli no klin.
DIGIM MOA
Faenemaot olsem wanem yu save mekem Jehova i glad, taem yu mekem ol waes desisen long saed blong ol holide mo ol lafet.
4. No selebretem lafet we Jehova i no glad long hem
Ridim Efesas 5:10, mo tokbaot ol kwestin ya:
-
?Sipos yumi wantem joen long wan lafet, yumi mas faenemaot wanem fastaem?
-
?Wanem ol impoten holide long ples blong yu?
-
?Yu ting se Jehova i glad long ol holide ya?
Eksampol, ?yu ting se God i agri long lafet blong betde? Baebol i neva tokbaot ol man blong Jehova se oli mekem lafet blong betde, be hem i tokbaot tu lafet blong betde blong ol man we oli no wosipim Hem. Ridim Jenesis 40:20-22 mo Matiu 14:6-10. Biaen, tokbaot ol kwestin ya:
-
?Wanem samting i hapen long tufala lafet blong betde ya?
-
Folem ol samting we oli hapen long ol stori ya, ?yu ting se Jehova i harem olsem wanem long saed blong betde?
Maet yu stap tingting yet se, ‘?Jehova i rili kea sipos mi joen long lafet blong betde o wan narafala lafet we i no stanap long Baebol?’ Ridim Eksodas 32:1-8. Biaen plei VIDEO mo tokbaot ol kwestin ya.
-
?From wanem yumi mas sua long samting we Jehova i agri long hem?
-
?Olsem wanem blong sua long samting ya?
?Olsem wanem blong save sipos God i agri long wan lafet?
-
?Lafet ya i stanap long Baebol? Blong faenemaot, jekem histri blong hem.
-
?Lafet ya i givim ona long wan man, oganaesesen, o kantri? Yumi givim ona long Jehova nomo mo yumi trastem se hem bambae i winim ol problem blong wol.
-
?Ol kastom mo ol fasin we i kamaot long lafet ya, oli agensem ol rul blong Baebol? Fasin blong yumi i mas stap klin oltaem.
5. Halpem ol narafala blong respektem bilif blong yu
I no isi blong talem no taem narafala i askem yu blong joen long wan lafet we Jehova i no laekem. Eksplenem desisen blong yu long kaen mo waes fasin. Blong luk wan eksampol, plei VIDEO ya.
Ridim Matiu 7:12, mo tokbaot ol kwestin ya:
-
Folem vas ya, ?i stret blong talem long ol famle we oli no bilif se oli no mas mekem wan lafet?
-
Nating se yu no joen wetem ol famle long wan lafet, ?olsem wanem yu save soem se yu stil lavem mo respektem olgeta?
6. Jehova i wantem se yumi hapi
Jehova i wantem se yumi haremgud wetem ol famle mo ol fren blong yumi. Ridim Prija 8:15, mo tokbaot kwestin ya:
-
?Olsem wanem vas ya i soem se Jehova i wantem se yumi hapi?
Jehova i wantem se ol man blong hem oli hapi mo enjoem gudfala taem tugeta. Plei VIDEO blong luk olsem wanem ol brata oli hapi long ol bigfala asembli.
Ridim Galesia 6:10, mo tokbaot ol kwestin ya:
-
?Yumi nidim ol holide blong “mekem i gud” long ol narafala?
-
?Yu yu glad moa taem yu save givim presen enitaem o taem yu mas givim from wan lafet?
-
Plante Witnes, samtaem oli oganaesem sam spesel samting blong ol pikinini blong olgeta mo oli sapraesem olgeta wetem ol presen. Sipos yu gat pikinini, ?wanem sam spesel samting we yu save mekem blong olgeta?
SAM MAN OLI SE: “I no impoten blong save se holide ya i stat olsem wanem. Samting we i impoten hemia blong joen wanples wetem ol fren mo famle.”
-
?Bambae yu talem wanem?
SAMARI
Jehova i wantem se yumi haremgud wetem ol famle mo ol fren. Be hem i no wantem blong yumi mekem ol lafet we hem i no glad long hem.
Tingtingbak
-
Sipos yumi wantem faenemaot tingting blong Jehova long wan lafet, ?wanem ol kwestin we yumi mas tingbaot?
-
?Olsem wanem yumi save halpem ol fren mo famle blong kasemsave long desisen blong yumi long saed blong lafet?
-
?Olsem wanem yumi save se Jehova i wantem we yumi hapi mo gat gudfala taem?
FAENEMAOT
Makem sam lafet we ol Kristin oli no stap selebretem.
“?From Wanem Ol Witnes Blong Jehova Oli No Joen Long Ol Lafet Blong Wol?” (Web atikol)
Luk fo risen from wanem God i no laekem lafet blong betde.
“?From Wanem Ol Witnes Blong Jehova Oli No Mekem Lafet Blong Betde?” (Web atikol)
Luk samting we ol pikinini oli save mekem blong soemaot se oli lavem Jehova taem i gat ol lafet blong ol holide.
Plante milian Kristin oli no selebretem Krismas. ?Oli harem olsem wanem long desisen ya?
Maet Yu Laekem Hemia Tu
KWESTIN WE PLANTE MAN OLI STAP ASKEM
Baebol Stadi Kos We Yu Save Mekem Wetem Ol Witnes Blong Jehova
Yu save yusum eni translesen blong Baebol blong mekem wan fri Baebol stadi kos wetem ol Witnes blong Jehova. Singaot ol famle mo ol fren tu blong oli joen wetem yu.
