LESEN 47
?Yu Yu Rere Blong Baptaes?
Long stadi blong yu, yu bin lanem plante samting long saed blong Jehova. Mo maet yu mekem sam jenis folem ol samting we yu lanem. Be maet i gat wan samting we i blokem yu blong givim laef blong yu long Jehova mo baptaes. Long lesen ya, bambae yumi luk sam jalens we oli stap blokem ol man blong baptaes mo olsem wanem blong winim olgeta.
1. ?Yu mas gat plante save bifo we yu baptaes?
Blong baptaes, yu nidim blong “kasem stret save long trutok.” (1 Timoti 2:4) Hemia i no min se bifo we yu baptaes, yu mas save ansa blong evri kwestin long saed blong Baebol. Ol Kristin we oli baptaes longtaem finis, oli stap gohed yet blong lanem samting. (Kolosi 1:9, 10) Be yu mas save sam stamba tijing blong Baebol. Ol elda long kongregesen bambae oli givhan long yu blong luk sipos yu gat inaf save.
2. ?Wanem sam samting we yu mas mekem bifo we yu baptaes?
Bifo we yu baptaes, yu “mas tanem tingting blong [yu], mo [yu] tanraon.” (Ridim Ol Wok 3:19.) Hemia i min se yu rili sori from ol sin we yu bin mekem, mo yu askem Jehova blong i fogivim yu. Mo yu mas gat strong tingting blong agensem ol rabis fasin, mo laef olsem we God i wantem. Mo tu, yu mas joen wetem kongregesen, hemia taem yu go long ol miting mo prij.
3. ?From wanem yu no mas letem fraet i blokem yu?
Sam man oli fraet se bambae oli no naf blong holem promes we oli mekem long Jehova. I tru se samtaem bambae yu mekem mastik. Ol gudfala man mo woman long Baebol tu oli mekem mastik. Be tingbaot se Jehova i no ekspektem se ol man blong hem oli stret gud olgeta. (Ridim Ol Sam 103:13, 14.) !Hem i glad taem yu mekem bes blong yu! Mo bambae hem i halpem yu. Jehova i mekem yumi sua se i nogat wan samting “i save tekemaot yumi long lav ya blong [Hem].”—Ridim Rom 8:38, 39.
DIGIM MOA
Luk olsem wanem yu save winim ol jalens we i blokem yu blong baptaes, taem yu save moa long saed blong Jehova mo taem yu akseptem help blong hem.
4. Kasem save moa long Jehova
?Yu mas save evri samting long saed blong Jehova, bifo we yu baptaes? Nogat, be yu mas gat inaf save we i pulum yu blong lavem Jehova mo mekem hem i glad. Plei VIDEO blong luk olsem wanem ol Baebol studen raon long wol oli mekem samting ya. Biaen tokbaot ol kwestin ya.
-
Long video ya, ?wanem i givhan long olgeta ya blong oli rere blong baptaes?
Ridim Rom 12:2, mo tokbaot ol kwestin ya:
-
?I gat sam tijing blong Baebol mo blong long ol Witnes we yu no sua long hem?
-
Sipos yes, ?yu save mekem wanem?
5. Winim ol jalens we maet i blokem yu blong baptaes
Yumi evriwan i fesem ol jalens taem yumi jus blong givim laef blong yumi long Jehova mo baptaes. Blong luk wan eksampol, plei VIDEO, mo tokbaot ol kwestin ya.
-
Long video ya, ?wanem jalens we Narangerel i winim blong i save wosipim Jehova?
-
?Olsem wanem lav we hem i gat long Jehova i halpem hem blong winim ol jalens ya?
Ridim Ol Proveb 29:25 mo 2 Timoti 1:7, mo tokbaot kwestin ya:
-
?Wanem i save givim strong tingting long yumi blong winim ol jalens?
6. Trastem Jehova
Jehova bambae i halpem yu blong mekem hem i glad.Plei VIDEO, mo tokbaot ol kwestin ya.
-
Long video ya, ?wanem i mekem se Baebol studen ya i fraet blong baptaes?
-
?Wanem i givhan long hem blong i trastem Jehova moa?
Ridim Aesea 41:10, 13, mo tokbaot kwestin ya:
-
?From wanem yu save sua se yu naf blong holemtaet promes we yu mekem long Jehova?
7. Tinghae moa long lav blong Jehova
Taem yu tingbaot olsem wanem Jehova i rili lavem yu, bambae yu wantem soem bigfala tangkiu long hem mo gohed blong mekem moa long wok blong hem. Ridim Ol Sam 40:5, mo tokbaot kwestin ya:
-
?Wanem sam blesing blong Jehova we yu rili laekem?
Profet Jeremaea i lavem Jehova mo ol tok blong hem, mo hem i rili glad long privilej ya blong karem nem blong Jehova. Hem i talem se: “Tok blong yu i mekem hat blong mi i glad mo i harem gud, from ol man oli stap singaotem mi long nem blong yu, O Jehova God.” (Jeremaea 15:16) Ansarem ol kwestin ya:
-
?From wanem i wan privilej blong stap olsem wan Witnes blong Jehova?
-
?Yu yu wantem baptaes olsem wan Witnes blong Jehova?
-
?I gat sam samting we i blokem yu blong baptaes?
-
?Yu ting se yu nid blong mekem wanem blong kasem mak ya blong baptaes?
SAM MAN OLI SE: “Mi fraet se sipos mi baptaes, bambae mi no naf blong holem promes we mi mekem.”
-
?Yu tu yu harem olsem?
SAMARI
Wetem help blong Jehova, bambae yu naf blong winim ol jalens we i blokem yu blong baptaes.
Tingtingbak
-
?Yu nidim plante save blong yu save baptaes?
-
?Wanem sam samting we yu mas mekem bifo we yu baptaes?
-
?From wanem yu no mas letem fraet i blokem yu?
FAENEMAOT
Makem samting we i mas pulum yu blong baptaes.
Makem olsem wanem yu save winim ol jalens we maet oli blokem yu blong baptaes.
“?Wanem i Blokem Mi Blong No Tekem Baptaes?” (Wajtaoa, Maj 2019)
Luk olsem wanem wan man i winim ol bigfala jalens we oli blokem hem blong baptaes.
Fastaem Ataa i fraet blong baptaes. Luk wanem i givhan long hem blong i no moa fraet blong tekem impoten desisen ya.
Maet Yu Laekem Hemia Tu
KWESTIN WE PLANTE MAN OLI STAP ASKEM
Baebol Stadi Kos We Yu Save Mekem Wetem Ol Witnes Blong Jehova
Yu save yusum eni translesen blong Baebol blong mekem wan fri Baebol stadi kos wetem ol Witnes blong Jehova. Singaot ol famle mo ol fren tu blong oli joen wetem yu.
