Jisas i Hed blong Kristin kongregesen. (Efesas 5:23) Tede Jisas i stap long heven mo i yusum “gudfala slef we i waes” blong daerektem ol man blong hem long wol. (Ridim Matiu 24:45.) Jisas i putumap “slef” ya mo i givim sam otoriti long hem. Be hem i stil wan slef blong Kraes mo i lukaot long ol brata blong Kraes. ?Slef ya hem i hu? ?Olsem wanem hem i lukaot long yumi?

1. ?Hu ya “gudfala slef we i waes”?

Oltaem Jehova i yusum wan man o wan smol grup blong ol man blong i daerektem ol man blong hem. (Malakae 2:7; Hibru 1:1) Afta we Jisas i ded, ol aposol mo ol elda long Jerusalem oli lidim wok. (Ol Wok 15:2) Long sem fasin, tede Hed Kampani blong ol Witnes blong Jehova, hemia wan smol grup blong ol elda, i stap givim kakae long spirit mo i lidim wok blong prij. Grup ya nao i “gudfala slef we i waes, we [Jisas] i putumap.” (Matiu 24:45a) Evri memba blong Hed Kampani oli tabu Kristin, mo oli gat hop blong joen wetem Kraes long Kingdom blong heven taem laef blong olgeta long wol ya i finis.

2. ?Wanem kakae blong spirit we gudfala slef ya i stap givim?

Jisas i talem se gudfala slef ya bambae i “givim kakae long [ol narafala Kristin] long stret taem blong hem.” (Matiu 24:45b) Kakae long bodi i givhan blong mekem bodi blong yumi i strong mo i helti. Long sem fasin, ol kakae blong spirit, hemia ol tijing blong Baebol we oli mekem yumi strong long spirit, holemstrong long Jehova, mo mekem wok we Jisas i givim. (1 Timoti 4:6) Yumi kasem kakae blong spirit, tru long ol miting, ol asembli, ol buk, ol magasin, mo ol video. Ol samting ya, oli halpem yumi blong save wil blong God mo frengud moa wetem hem.

 DIGIM MOA

3. Ol man blong Jehova oli mas oganaes gud

Jisas i givim daereksen long Hed Kampani blong i oganaesem wok blong ol Witnes blong Jehova. Bifo, ol fas Kristin oli oganaes olsem. Plei VIDEO.

Ridim 1 Korin 14:33, 40, mo tokbaot kwestin ya:

• ?Olsem wanem ol vas ya oli soem se Jehova i wantem we ol Witnes blong hem oli oganaes gud?

4. Gudfala slef ya i oganaesem wok blong prij

Impoten wok we ol fas kristin oli mekem, hemia wok blong prij. Ridim Ol Wok 8:14, 25, mo tokbaot ol kwestin ya:

• Long taem blong ol fas Kristin, ?hu i lidim wok blong prij?

• ?Pita mo Jon i mekem wanem taem tufala i kasem instraksen long ol narafala aposol?

Impoten wok we Hed Kampani i stap oganaesem, hemia wok blong prij. Plei VIDEO.

 Jisas i makem se wok blong prij i impoten. Ridim Mak 13:10, mo tokbaot ol kwestin ya:

• ?From wanem Hed Kampani i tinghae long wok blong prij?

• ?From wanem yumi nidim “gudfala slef we i waes” blong oganaesem wok long fulwol?

5. Gudfala slef i givim ol daereksen

Hed kampani i stap lidim olgeta Kristin long fulwol. ?Olsem wanem hem i kasem advaes blong lidim olgeta? Makem samting we hed kampani blong ol fas Kristin i mekem. Ridim Ol Wok 15:1, 2, mo tokbaot ol kwestin ya:

• ?Wanem problem i kamaot long taem blong ol fas Kristin?

• ?Pol, Banabas mo ol narafala, oli go luk hu blong stretem bisnes ya?

Ridim Ol Wok 15:12-18, 23-29, mo tokbaot kwestin ya:

• ?Olsem wanem hed kampani blong bifo i faenemaot tingting blong God, bifo we hem i mekem desisen?—Luk vas 12, 15, mo 28.

Ridim Ol Wok 15:30, 31 mo 16:4, 5, mo tokbaot ol kwestin ya:

• ?Ol fas Kristin oli mekem wanem taem oli kasem advaes long hed kampani?

• ?Olsem wanem Jehova i blesem olgeta taem oli obei?

Ridim 2 Timoti 3:16 mo Jemes 1:5, mo tokbaot kwestin ya:

• ?Olsem wanem Hed Kampani tede i faenemaot tingting blong God, bifo we i mekem desisen?

 SAMARI

Hed Kampani hem i “gudfala slef we i waes” we Kraes i putumap. Hem i givim ol daereksen mo ol kakae long spirit long olgeta Kristin long fulwol.

Tingtingbak

• ?Hu i putumap “gudfala slef we i waes”?

• ?Olsem wanem Hed Kampani i kea long yumi?

• ?Yu yu bilif se Hed Kampani i “gudfala slef we i waes”?