JAPTA 4
Tingting i Stap Stikim Yu—“Yu Tekemaot Ol Sin Blong Mi”
“Niufala wok blong mi i mekem se famle i gat moa mane, be i lidim mi blong joen long plante nogud fasin. Mi joen long ol lafet blong wol mo politik, mo mi go long jos tu. Foti yia mi no moa joen wetem ol Witnes blong Jehova. Taem ol yia oli stap pas, mi ting se Jehova i no moa save fogivim mi. Mi mi save trutok finis, be mi folem ol nogud fasin ya. Oltaem tingting blong mi i stap stikim mi.”—Martha.
TAEM tingting blong yu i stap stikim yu, hemia i olsem wan bigfala hevi samting we yu stap karem. King Deved i talem se: “Ol sin blong mi i kavremap mi olsem we mi draon long dip solwota. Ol sin blong mi oli olsem wan samting we i hevi tumas, mi no moa save karem.” (Ol Sam 38:4) Sam Kristin oli ting se Jehova i no moa save fogivim olgeta, nao tingting blong olgeta i foldaon. (2 Korin 2:7) Sipos yu bin mekem sam bigfala sin,?yu yu stap longwe tumas long Jehova we hem i no moa save fogivim yu? !Nogat!
“Yumi Stretem Bisnes Ya”
Jehova i no save tanem baksaed long man we i tanem tingting blong hem from sin we hem i mekem. !Long defren fasin, hem i traehad blong pulum man ya i kambak long hem! Yu traem tingbaot parabol blong boe we i lusum rod, we Jisas i talem. Jehova i olsem papa long parabol ya. Boe we i ronwe i mekem plante rabis fasin, be afta we sam taem i pas, hem i wantem kambak. Baebol i talem se: “Taem [boe ya] i stap longwe yet, papa blong hem i luk hem, mo i sore tumas long hem. Nao papa blong hem i resis, i go mitim hem, i putum han blong hem i goraon long hem, i kis long hem.” (Luk 15:11-20) Maet yu yu wantem kambak long Jehova, be yu harem se yu “stap longwe” tumas. Nating se i olsem, Jehova i sore long yu olsem papa ya long parabol blong Jisas. Hem i wantem tumas se yu kambak.
?Olsem wanem sipos yu ting se ol sin blong yu oli bigwan tumas mo oli plante tumas? I gud yu tingbaot ol gudfala tok blong Jehova long Aesea 1:18: ‘Yu kam, yumi stretem bisnes ya naoia. Nating we ol sin blong yu i mekem yu yu doti gud, be bambae mi mekem we yu yu klin we yu klin. Naoia, yu yu doti we yu doti, be bambae yu kam klin olgeta.’ Nating se ol sin blong yu oli mekem yu yu doti gud mo yu ting se yu no moa save kam klin bakegen, be Jehova i save fogivim yu.
Jehova i no wantem se tingting blong yu i stap stikim yu oltaem. ?Yu mas mekem wanem blong God i save fogivim yu, nao yu gat wan tingting we i klin long fes blong hem? I gud yu tingbaot tufala samting we King Deved i mekem. Fastaem, hem i talem se: “Bambae mi talemaot sin blong mi long Hae God.” (Ol Sam 32:5) Jehova i askem long yu finis blong yu prea long hem blong “stretem bisnes ya.” I gud yu mekem samting ya. Yu mas talemaot ol sin blong yu long Jehova, mo yu talem long hem se yu harem olsem wanem. Deved i mekem olsem, taswe hem i save prea long Jehova wetem strong tingting se: “Yu tekemaot ol sin blong mi, yu mekem mi mi klin. . . . Yu yu no save tanem baksaed long man we i tanem tingting blong hem mo i putum hem i stap daon.”—Ol Sam 51:2, 17.
Namba tu samting, God i yusum profet Natan blong givhan long Deved. (2 Samuel 12:13) Tede, Jehova i trenem ol elda long kongregesen blong oli givhan long olgeta we oli mekem bigfala sin, nao oli save fren gud bakegen wetem Jehova. Taem yu go luk ol elda, bambae oli prea wetem yu. Bambae oli soem ol tok blong Baebol blong putum pis long tingting blong yu, mo blong stretem ol nogud tingting we yu yu gat. Mo bambae oli givhan long yu blong yu kam strong bakegen.—Jemes 5:14-16.
Jehova i wantem se yu harem gud mo tingting blong yu i klin long fes blong hem
‘Man We Jehova i Fogivim, Hem i Save Harem Gud’
Ating bambae yu luk se i no isi nating blong talemaot ol sin blong yu long Jehova God, mo blong go luk ol elda. Deved tu i harem se i had blong mekem olsem. Fastaem, hem i stap kwaet, i no wantem talemaot sin blong hem. (Ol Sam 32:3) Be taem hem i talemaot mo i stretem bisnes ya, hem i kasem blesing.
Wan bigfala blesing, hemia se Deved i glad bakegen. Hem i talem se: ‘Man we Jehova i fogivim hem, mo i tekemaot ol sin blong hem, hem i save harem gud.’ (Ol Sam 32:1) Mo hem i prea long Jehova se: “Plis yu givhan long mi blong mi save tok, nao bambae mi presem yu.” (Ol Sam 51:15) From we tingting blong Deved i no moa stap stikim hem mo hem i glad we God i fogivim hem, hem i wantem tokbaot Jehova long ol man.
Jehova i wantem se yu tu yu harem gud mo tingting blong yu i klin long fes blong hem. Mo hem i wantem se yu yu glad blong tokbaot hem mo plan blong hem long ol narafala, i no from we tingting blong yu i stap stikim yu, be from we hat blong yu i pusum yu. (Ol Sam 65:1-4) Yu no mas fogetem ol gudfala tok blong hem se: ‘Yu mas luk long God blong hem bambae i tekemaot ol sin blong yu.’—Ol Wok 3:19.
Hemia nao samting we i hapen long Martha. Hem i talem se: “Boe blong mi i gohed blong sanem ol Wajtaoa mo Wekap! long mi. Sloslo, mi mi save Jehova bakegen. Samting we mi luk se i had moa, hemia blong askem long Jehova blong i fogivim ol nogud fasin we mi mi mekem. Be wan dei, mi prea long Jehova blong talemaot ol sin blong mi. Mi sek se 40 yia i pas finis taem mi kambak long Jehova. Samting we i hapen long mi i soemaot se, nating we man i lego trutok longtaem finis, be hem i gat janis yet blong mekem wok blong Jehova bakegen, mo blong harem bakegen se Jehova i lavem hem.”
