?SAMTAEM yu yu harem nogud olsem Linda, from samting we wan narafala Kristin i mekem long yu? Samfala oli letem trabol olsem i spolem wosip blong olgeta. ?Yu tu yu mekem olsem?

I tru se i had blong fogivim wan brata no wan sista we i mekem yumi harem nogud. Yumi save se ol Kristin oli mas lavlavem olgeta. (Jon 13:34, 35) Be taem wan narafala Kristin i mekem samting we i no stret long yumi, yumi harem se yumi kros mo tingting blong yumi i kam nogud.—Ol Sam 55:12.

Baebol i talem stret se samtaem wan Kristin i save ‘gat poen agens long narawan.’ (Kolosi 3:13) Be sipos samting ya i hapen long yu, maet yu luk se i had blong winim nogud tingting. ?Wanem i save givhan long yu? Yu save tingbaot tri stamba trutok ya blong Baebol:

Papa blong yumi i save evri samting. Jehova i stap luk evri samting we i hapen. Hem i luk we yumi harem nogud taem narafala i mekem i no stret long yumi. (Hibrus 4:13) Mo tu, Jehova i sore long yumi taem yumi harem nogud. (Aesea 63:9) “Hem i lavem yumi tumas,” taswe hem i no save letem ‘trabol mo hadtaem’ i ‘tekemaot yumi long hem.’ Mo tu, hem i no save letem wan narafala man blong hem i tekemaot yumi. (Rom 8:35, 38, 39) ?Yu yu wantem folem fasin ya blong God? Sipos yes, yu no mas letem wan man no wan samting i tekemaot yu long Jehova.

Fogivim narafala, hemia i no min se yu glad long nogud fasin blong hem. Taem yu fogivim narafala we i mekem i no stret long yu, hemia i no min se yu tingbaot nogud fasin blong hem olsem we i nating nomo. Mo tu, i no min se yu stap mekem eskius from fasin blong hem no yu ting se fasin ya i oraet nomo. Yu save finis se Jehova i no glad long man we i mekem sin. Be hem i save fogivim man we i tanem tingting blong hem. (Ol Sam 103:12, 13; Habakuk 1:13) Taem Jehova i talem se yumi mas fogivim narafala, hem i wantem se yumi folem fasin blong hem. “Kros blong hem i no save stap olwe.”—Ol Sam 103:9; Matiu 6:14.

Taem yu lego kros, yu mekem i gud long yu wan. Yu traem tingbaot pijatok ya: Yu karem wan ston we i bigwan lelebet be i no hevi tumas. I isi blong holem ston ya blong smoltaem. ?Be olsem wanem sipos yu traem holem longtaem, olsem wan aoa no maet longtaem moa? !Ating han blong yu bambae i soa! Nating se sem ston ya nomo, be bambae yu harem se i kam hevi moa. Hemia i sem mak taem yu kros. Nating se yu kros from wan smol samting nomo, be sipos yu stap kros longtaem, bambae yu harem nogud moa. Taswe Jehova i talem se yu mas lego kros. Taem yu lego, yu mekem i gud long yu wan.—Ol Proveb 11:17.

?Wanem i givhan long Linda, blong hem i no stap kros long sista we i mekem i no stret long  hem? Wan samting se, Linda i tingting dip long ol tok blong Baebol we i soemaot from wanem hem i mas fogivim sista ya. (Ol Sam 130:3, 4) Linda i kasem save se sipos hem i fogivim narafala, Jehova bambae i fogivim hem. (Efesas 4:32 kasem 5:2) Save ya i tajem hat blong hem, nao hem i talem se: “Mi harem olsem se Jehova i stap toktok stret long mi.”

Sloslo, Linda i no moa kros. Hem i fogivim sista ya, mo tufala i fren gud bakegen. Linda i gohed gud long wok blong Jehova. Yu save gat strong tingting se Jehova i wantem givhan long yu tu blong yu mekem olsem.