Halo brata no sista:

Yu yu save finis se Baebol i stap tokbaot ol man mo ol woman, we plante long olgeta oli kasem trabol long laef blong olgeta. Oli “olsem yumi nomo.” (Jemes 5:17) Samfala oli harem se ol trabol mo ol wari oli hevi tumas long olgeta. Sam narafala oli harem nogud from samting we wan famle no wan narafala man blong God i mekem long olgeta. Mo sam narafala bakegen oli harem nogud from we oli bin mekem bigfala mastik long laef blong olgeta.

?Olsem wanem? ?Ol man mo ol woman olsem oli lego Jehova? Nogat. Plante long olgeta oli olsem man blong raetem Ol Sam we i prea se: “Mi mi man blong wok blong yu, be mi lusum rod olsem wan sipsip we i lus. Plis yu kam lukaot mi, from we mi mi no tanem baksaed long ol tok we yu yu putum.” (Ol Sam 119:176) ?Yu tu yu harem olsem?

Jehova i no fogetem ol sipsip blong hem we oli gowe long kongregesen. Hem i stap traehad blong pulum olgeta oli kambak. Plante taem hem i yusum ol narafala brata mo sista blong mekem samting ya. Yu traem tingbaot olsem wanem Jehova i givhan long man blong hem Job, we i kasem plante bigfala trabol. Job i lusum evri samting we hem i gat, ol famle blong hem oli ded, mo hem i kasem wan bigfala sik. Mo tu, olgeta we oli mas leftemap tingting blong hem, oli talem ol tok we i mekem hem i harem nogud. Be long olgeta trabol ya, Job i no lego Jehova. Nating se i olsem, samtaem tingting blong hem i no stret. (Job 1:22; 2:10) ?Jehova i mekem wanem blong givhan long Job blong i stretem tingting blong hem?

Wan taem, Jehova i yusum wan narafala man blong hem blong givhan long Job, nem blong man ya Elihu. Taem Job i talemaot ol trabol blong hem, Elihu i lesin, mo afta, hem i toktok. ?Hem i talem wanem? ?Hem i tok daonem Job? ?Hem i traem mekem Job i sem, blong pulum hem i kambak long stret rod? ?Elihu i ting se hem i gud moa i winim Job? !Nogat! Tabu spirit i pulum Elihu blong talem long Job se: “Yu luk. Long fes blong God, yumitufala i sem mak nomo. Mi tu, God i mekem mi long red graon, stret olsem we i mekem yu.” Afta, hem i toktok kaen long Job se: “I no gat wan samting blong mekem yu yu fraet long mi. Mi mi no save mekem i strong long yu blong winim yu.” (Job 33:6, 7) Hem i no talem ol toktok we i mekem tingting blong Job i hevi moa, be hem i talem ol gudfala toktok mo advaes we i leftemap tingting blong Job.

Taem mifala i rerem buklet ya, mifala i gat sem tingting olsem Elihu. Fastaem, mifala i lesin long toktok blong samfala we oli gowe long Jehova, mo mifala i tingting gud long ol tok blong olgeta. (Ol Proveb 18:13) Biaen, mifala i prea mo mifala i stadi long ol stori long Baebol we oli soemaot olsem wanem Jehova i givhan long ol man blong hem bifo, taem oli kasem ol semfala trabol. Ale, mifala i joenem ol stori ya blong Baebol wetem stori blong sam brata mo sista we oli kambak long Jehova finis, nao mifala i wokem buklet ya. Mifala i askem long yu blong yu ridim gud. Plis, yu mas save se mifala i lavem yu.

Hed Kampani Blong Ol Witnes Blong Jehova