TAEM yu stap traehad blong kambak, yu save gat strong tingting se Jehova bambae i givhan long yu. Bambae hem i givhan long yu blong yu no wari tumas, yu no moa harem nogud, mo yu gat pis long tingting mo hat blong yu from we tingting blong yu i no moa stap stikim yu. Nao bambae yu yu wantem joen wetem ol man blong Jehova bakegen blong mekem wok blong hem. Bambae yu yu olsem sam Kristin long taem bifo we aposol Pita i raet long olgeta, i se: ‘Bifo, yufala i olsem ol sipsip we oli lusum rod blong olgeta. Be naoia yufala i kambak bakegen long Man blong lukaot long sipsip, we hem i prapa man blong lukaot long laef blong yufala.’—1 Pita 2:25.

I no gat wan samting we i moa gud blong mekem, i bitim we yu kambak long Jehova. ?From wanem i olsem? From we bambae yu mekem Jehova i glad tumas. (Ol Proveb 27:11) Olsem yu save finis, yu save mekem Jehova i harem gud no i harem nogud. Be hem bambae i no fosem yu blong yu lavem hem mo yu mekem wok blong hem. (Dutronome 30:19, 20) Wan man we i gat save long Baebol i talem se: “Hat blong yumi i olsem wan doa we i no gat handel afsaed. Man i mas openem insaed nomo.” Sipos yu wosipim Jehova from we yu lavem hem, hemia i olsem we yu openem doa ya. Nao yu givim wan presen long hem we i gud tumas, hemia se yu holemstrong long hem nomata wanem samting i hapen. Mo tu, yu mekem hem i glad tumas. Tru ya, i no gat wan samting we i moa gud i bitim glad we yumi kasem, taem yumi mekem wosip long Jehova olsem we hem i wantem.—Ol Wok 20:35; Revelesen 4:11.

Mo tu, sipos yu mekem wosip bakegen wetem ol man blong Jehova, bambae yu kasem ol samting we yu nidim blong fren gud wetem hem. (Matiu 5:3) Plante man long olgeta ples blong wol oli stap askem se: ‘?Yumi laef blong mekem wanem?’ Oli wantem tumas blong faenem ansa blong kwestin ya. Hemia from we Jehova i wokem man wetem tingting ya se hem i mas save samting ya. Hem i wantem se yumi harem gud blong mekem wok blong hem. I no gat wan samting we i mekem yumi harem gud moa, i bitim we yumi mekem wosip long Jehova from we yumi lavem hem.—Ol Sam 63:1-5.

Plis brata no sista, Jehova i wantem we yu kambak long hem. ?Wanem i save mekem yu yu sua long samting ya? Yu traem tingbaot: Taem mifala i stap mekem rere buklet ya, mifala i prea plante mo mifala i tingting gud long ol save blong hem. Maet wan elda no wan narafala Kristin i soem buklet ya long yu. Nao yu harem se yu wantem ridim mo folem ol save insaed. Ol samting ya i soemaot se Jehova i no fogetem yu, be hem i stap pulum yu sloslo i kambak long hem.—Jon 6:44.

Yumi harem gud blong save se Jehova i no fogetem ol man blong hem we oli lusum rod. Wan sista, nem blong hem Donna, i harem save samting ya. Hem i talem se: “Sloslo mi mi gowe long trutok. Be plante taem mi tingbaot tok blong Ol Sam 139:23, 24, se: ‘God, plis yu lukluk gud long mi, blong yu savegud ol tingting blong mi. Plis yu skelem laef blong mi, blong yu faenemaot ol samting we mi stap tingting long hem. Mo sipos i gat sam samting nogud long laef blong mi, plis i gud yu traem faenemaot, nao yu lidim mi long rod ya we i no save lus.’ Mi mi neva harem gud taem mi joen wetem ol man blong wol, mi save se ogenaesesen blong Jehova nao i stret ples blong mi. Ale, sloslo mi luksave se Jehova i no lego mi, be mi nao mi mas kambak long hem. !Mi glad tumas se mi kambak!”

Mifala i prea wetem fulhat blong mifala se bambae yu kambak long Jehova, nao hem bambae ‘i mekem yu yu glad’ bakegen. (Nehemaea 8:10) Sipos yu kambak, yu no save sore.