LONG Baebol, Jehova i talem bakegen mo bakegen se hem i olsem Man blong lukaot long sipsip. Hem i promes se: “Mi bambae mi go lukaot ol sipsip blong mi gogo mi faenem olgeta, mo bambae mi stap lukaot gud long olgeta.”—Esikel 34:11, 12.

?Hu ya ol sipsip blong Jehova? Hemia ol man we oli lavem hem mo oli wosipim hem. Baebol i talem se: “Yufala i kam, yumi bodaon, yumi nildaon long fes blong hem, yumi mekem wosip long hem. Hem i God blong yumi. Yumi ol man blong hem, mo hem i stap lukaot gud long yumi ol sipsip blong hem, mo yumi stap long han blong hem.” (Ol Sam 95:6, 7) Olsem ol sipsip we oli folem man blong lukaot long olgeta, ol man we oli wosipim Jehova oli glad blong folem Bigfala Man ya we i stap lukaot long olgeta. ?Olsem wanem? ?Ol man blong God oli stret gud olgeta? Nogat. Samtaem sam long olgeta oli kam olsem ‘ol sipsip we  oli stap wanwan olbaot,’ no “ol sipsip we oli lusum rod.” (Esikel 34:12; Matiu 15:24; 1 Pita 2:25) Be Jehova i no save tanem baksaed long olgeta. Hem i no gat tingting ya se oli no moa save kambak long hem.

?Olsem wanem? ?Yu harem se Jehova, we i Bigfala Man blong lukaot long sipsip, i stap lukaot long yu yet? ?Jehova i stap mekem wanem tede we i soemaot se hem i lukaot long ol sipsip blong hem? Yu traem tingbaot trifala samting ya:

Hem i givim save we i olsem kakae. Jehova i talem se: ‘Bambae mi letem olgeta oli kakae gudfala gras long ol levelples long medel blong ol hil, mo long ol narafala ples we i gat gudfala gras long hem.’ (Esikel 34:14) Jehova i neva mestem blong givim plante gudfala save we i olsem kakae, long stret taem we yumi nidim. ?Yu tingbaot wan taem we yu prea blong askem help blong Jehova, nao wan magasin, no wan tok, no wan video, i ansa long prea blong yu? ?Samting ya i no soemaot se Jehova i stap tingbaot yu?

Hem i protektem yumi mo i givhan long yumi. Jehova i promes se: “Olgeta we oli mestem rod, oli stap wokbaot olbaot, mi bambae mi tekem olgeta i kambak. Mo olgeta we oli karekil, bambae mi fasem ol soa blong olgeta blong mekem olgeta oli kam gud bakegen, mo olgeta we oli no strong, bambae mi lukaot gud long olgeta blong mekem olgeta oli kam strong bakegen.” (Esikel 34:16) Jehova i save mekem olgeta we oli slak no oli wari tumas oli kam strong bakegen. Hem i fasem soa blong olgeta we oli karekil, maet from wan narafala man blong God nomo. Olgeta we oli lusum rod mo maet oli gat ol nogud tingting, hem i karem olgeta oli kambak long hem.

Hem i harem se hem i mas lukaot long yumi. Jehova i talem se: ‘Mi bambae mi tekem olgeta we oli go stap wanwan olbaot long ol narafala ples, oli kambak bakegen.’ Mo hem i talem bakegen se: “Ol sipsip blong mi we oli lus, mi bambae mi go lukaot olgeta.” (Esikel 34:12, 16) Taem wan sipsip i lus, Jehova i save. Hem i neva ting se sipsip ya i no moa save kambak long hem. Hem i lukaot sipsip ya mo taem hem i faenem, hem i glad we i glad. (Matiu 18:12-14) Yes, hem i talem se ol man we oli wosipim hem, oli ‘sipsip blong hem, we hem i stap givim kakae long olgeta.’ (Esikel 34:31) Mo yu nao yu wan long ol sipsip ya.

?From wanem Jehova i stap lukaot yu, mo i stap askem se yu kambak long hem? From we hem i wantem se yu harem gud. Hem i promes se bambae hem i blesem ol sipsip blong hem, olsem we hem i mekem ren i foldaon long stret taem. (Esikel 34:26) Hemia i no wan giaman promes. Yu yu luk samting ya finis long laef blong yu.

Yu traem tingbaot taem ya we yu jes save Jehova. ?Yu harem olsem wanem taem yu save se God i gat wan prapa nem, mo se hem i gat wan stamba tingting we bambae i kamtru long ol man? ?Yu yu tingbaot yet olsem wanem yu harem gud taem yu joen wetem ol brata mo sista long ol asembli? Taem yu stap prij mo yu faenem wan man we i intres long gud nius, ?yu yu glad tumas?

Yu save kasem ol blesing ya bakegen. Ol man blong God bifo oli prea se: “Plis yu tekem mifala i kambak long yu. Plis yu leftemap mifala bakegen, blong mifala i save harem gud bakegen olsem bifo.” (Ol Krae 5:21) Jehova i ansa long prea ya. Ol man blong hem oli kambak long hem, mo oli glad tumas blong wosipim hem bakegen. (Nehemaea 8:17) Jehova i save mekem i sem mak long yu.

Be i tru se i no isi blong kambak long Jehova. Yu traem tingbaot sam samting we oli save mekem se i had blong kambak, mo olsem wanem blong winim olgeta.