OL MAN blong God oli wari olsem ol narafala man. Man blong raetem Ol Sam i talem se: “Mi mi wari, mo mi stap tingting tumas.” (Ol Sam 94:19) Jisas i talem se long taem blong en, sam man blong Jehova bambae oli “stap tingting tumas long laef blong wol ya,” nao i had blong oli mekem wok blong Jehova. (Luk 21:34) ?Olsem wanem long yu? ?Yu yu stap wari tumas from mane, no trabol long famle, no sik? ?Jehova i save givhan long yu blong yu winim wari ya?

Yu yu no naf blong winim ol wari yu wan. Aposol Pol i talem se: “Plante taem, mifala i gat trabol . . . mifala i no save rod . . . ol man oli stap kilim mifala.” Be hem i talem tu se, “neva tingting blong mifala i foldaon,” mo “neva mifala i lus olgeta,” mo “neva mifala i ded olgeta.” ?Wanem i save givhan long yu blong yu winim wari? Hemia paoa blong Jehova “we i bigwan tumas.”—2 Korin 4:7-9.

Yu traem tingbaot olsem wanem “paoa ya we i bigwan tumas” i givhan long yu bifo. ?Yu tingbaot yet wan gudfala tok we i mekem yu yu luksave se Jehova i lavem yu tumas? Taem yu stap tijim ol narafala se bambae i gat Paradaes long fiuja, ?yu yu bilif moa long ol nambawan promes ya blong Jehova? Taem yumi go long ol miting blong kongregesen mo yumi talemaot bilif blong yumi long ol narafala, yumi kasem paoa blong winim ol wari blong laef, mo yumi gat pis long tingting blong yumi. Nao yumi glad blong mekem wok blong Jehova.

Maet yu harem se i gat plante samting tumas blong mekem. Jehova i wantem se yu lukaot long ol wok blong Kingdom fastaem mo yu folem wan gudfala program blong wosipim hem. (Matiu 6:33; Luk 13:24) Be yu harem se yu no moa gat paoa, maet from we sam famle mo fren oli agensem yu, no yu stap siksik, no i gat trabol long famle. Maet yu mas spenem plante taem long wok, nao yu no moa gat taem mo paoa blong joen long ol wok long kongregesen. Yu harem se yu gat tumas samting blong mekem mo i hevi tumas. Samtaem maet yu ting se Jehova i stap askem tumas long yu.

Jehova i kasem save long ol trabol blong yu. Hem i no save askem samting we yu yu no naf blong mekem. Mo taem yu kasem wan sik no tingting blong yu i foldaon, hem i save se yu nidim taem blong kamgud bakegen.—Ol Sam 103:13, 14.

Yu traem tingbaot samting we Jehova i mekem long profet Elaeja. Tingting blong Elaeja i foldaon nao hem i ronwe i go long draeples. ?Olsem wanem? ?Jehova i tok strong long hem se hem i mas gobak kwiktaem? Nogat. Tu taem Jehova i sanem wan enjel i go blong givhan long Elaeja. Taem enjel i luk we Elaeja i stap slip, hem i tok slo blong wekemap hem. Afta, enjel i givim kakae long hem. Foti dei biaen, Elaeja i fraet mo i wari yet. ?Olsem wanem? ?Jehova i mekem sam samting bakegen blong givhan long hem? Yes. Fas samting we Jehova i mekem, hem i soemaot sam saen long Elaeja blong pruvum se hem i save protektem hem. Namba tu samting,  Jehova i toktok long voes we i “smosmol” blong leftemap tingting blong Elaeja. Namba tri samting, Jehova i talem long Elaeja se i gat plante taosen narafala we oli stap mekem tru wosip olsem hem. Smoltaem biaen, profet Elaeja i stap wok strong bakegen. (1 King 19:1-19) ?Yumi lanem wanem? Taem Elaeja i harem nogud mo i wari tumas, Jehova i sore long hem mo i gat longfala tingting. Tede, Jehova i stap mekem i sem mak long yumi. Fasin blong hem i no jenis nating.

Yu mas tingbaot samting we yu yu naf blong mekem long wok blong Jehova. Yu no mas skelem wok we yu mekem naoia wetem samting we yu mekem bifo. Yu traem tingbaot wan man blong resis we i no moa tren blong plante manis no plante yia. ?Yu ting se wantaem nomo hem i save mekem strong trening bakegen? Nogat. Hem i mas mekem smol fastaem, gogo bodi blong hem i kam strong bakegen, nao hem i gat paoa blong mekem strong trening. Wan Kristin i olsem man blong resis ya. Hem i mas save gud wanem mak we hem i naf blong kasem, mo hem i mas tren from. (1 Korin 9:24-27) I gud yu traehad naoia blong kasem wan mak we i no strong tumas. Maet yu wantem go long wan miting blong kongregesen. Yu mas askem long Jehova blong i givhan long yu blong yu kasem mak ya. Taem yu kam strong bakegen, bambae yu save gud Jehova mo yu luk se “hem i gud tumas.” (Ol Sam 34:8) Yu no mas fogetem se: Nating we yu mekem wan smol samting nomo blong soemaot se yu lavem Jehova, be Jehova bambae i luk samting ya olsem wan bigfala samting.—Luk 21:1-4.

Jehova i givhan long Sista June blong hem i kambak. Hem i talem se: “Mi mi prea long Jehova oltaem blong hem i givhan long mi. Wan dei, woman blong boe blong mi i tokbaot wan asembli we bambae i stap long ples blong mi. Mi mekem desisen blong joen long wan dei blong asembli ya. !Mi harem gud tumas blong kampani wetem ol man blong Jehova bakegen! Mi kasem paoa we mi nidim. Naoia mi harem gud tumas from we mi stap mekem wok blong Jehova bakegen. Mi mi glad long laef blong mi. Naoia mi save gud se mi nidim ol brata mo sista, mi no save stap mi wan. Mi glad se mi gat janis blong kambak bifo we i let tumas.”