?TRUTOK long saed blong wanem? Long saed blong ol impoten kwestin we ol man oli askem plante taem. Maet yu yu bin tingbaot ol kwestin ya samtaem se:

?Weples nao yu save faenem ansa blong ol kwestin ya? Sipos yu go long laebri mo ol stoa blong salem ol buk, maet yu save faenem plante taosen buk we oli talem se oli gat ansa blong ol kwestin ya. Be plante taem, bambae yu luk we wan buk i agensem narawan. Sam buk oli no moa stret long laef blong man afta we sam yia i pas, mekem se oli mas raetem bakegen no jenisim ol save we i stap long ol buk ya.

Be i gat wan buk nomo we insaed long hem i gat ol ansa we yumi save trastem. Hem i wan buk we i talemaot trutok. Jisas Kraes i talem long God taem hem i prea se: “Tok blong yu i trutok.” (Jon 17:17, NW ) Tede yumi save we Tok ya blong God hemia nao Tabu Baebol. Long pepa ya, bambae yu faenemaot we Baebol i givim trufala klia ansa long ol kwestin we oli stap antap.

?God i Rili Kea Long Yumi?

?FROM WANEM OL MAN OLI ASKEM KWESTIN YA?: From we wol i fulap long fasin ya we man i spolem narafala mo mekem i no stret. Plante skul oli tijim se ol trabol we yumi stap kasem, oli kamaot long God.

?BAEBOL I TIJIM WANEM?: God i no stamba blong ol nogud fasin. Job 34:12 i talem se: “!God ya, hem i no save mekem wan samting we i no stret! Olgeta samting we hem i stap mekem oli stret nomo.” God i lavem tumas ol man mo i wantem givim wan gudfala fiuja long olgeta. From risen ya nao, Jisas i talem se yumi mas prea olsem: “Papa blong mifala long heven plis mekem…kingdom blong yu i kam. Plis yu mekem samting we yu yu wantem i kamaot long wol, olsem we i kamaot long heven.” (Matiu 6:9, 10, NW ) God i kea tumas long yumi, taswe hem i mekem bigbigfala samting blong bambae stamba tingting ya blong hem i kamtru. Jon 3:16.

Sam narafala vas blong ridim Jenesis 1:26-28; Jemes 1:13; mo 1 Pita 5:6, 7.

?Faet Mo Fasin Safa Bambae i Finis Samtaem?

?FROM WANEM OL MAN OLI ASKEM KWESTIN YA?: Faet i mekem se plante man oli ded. Yumi evriwan i stap safa tede.

?BAEBOL I TIJIM WANEM?: God i talem se i gat taem i stap kam we bambae hem i putum pis long olgeta ples long wol. Aninit long rul blong Kingdom blong God, wan gavman we i stap long heven, “ol man bambae oli no moa save girap blong go kilim ol narafala man, neva bambae oli save mekemrere bakegen blong go mekem faet.” Defren olgeta, “long taem ya, ol man bambae oli hamarem ol naef blong faet blong olgeta, gogo oli kam aean blong digim graon.” (Aesea 2:4) God bambae i finisim ol fasin we i no stret mo fasin safa. Baebol i promes se: “[God] bambae i ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo [olsem fasin we i no stret mo fasin safa] oli lus olgeta.” Revelesen 21:3, 4.

Sam narafala vas blong ridim Ol Sam 37:10, 11; 46:9; mo Maeka 4:1-4.

?Wanem i Hapen Long Yumi Taem Yumi Ded?

?FROM WANEM OL MAN OLI ASKEM KWESTIN YA?: Plante skul tede oli tijim se ol man oli gat wan spirit we i gohed blong laef afta we oli ded. Samfala oli bilif se ol dedman oli save spolem yumi we yumi laef yet mo oli bilif se God i stap panisim ol rabis man long helfaea blong oli safa gogo i no save finis.

?BAEBOL I TIJIM WANEM?: Taem man i ded, i no gat wan samting we i gohed blong laef. Prija 9:5 i talem se: “Ol dedman oli no save wan samting nating.” From we ol dedman oli no save wan samting, oli no save filim wan samting, mo oli no save mekem wan samting, taswe oli no save spolem yumi mo oli no save halpem yumi tu. Ol Sam 146:3, 4.

Sam narafala vas blong ridim Jenesis 3:19 mo Prija 9: 6, 10.

?Ol Dedman Bambae Oli Laef Bakegen Samtaem?

?FROM WANEM OL MAN OLI ASKEM KWESTIN YA?: I tru, yumi wantem laef mo yumi wantem haremgud long laef wetem olgeta we yumi laekem olgeta. Taswe yumi wantem tumas se ol famle mo fren blong yumi we oli ded oli kambak blong yumi save luk olgeta bakegen.

?BAEBOL I TIJIM WANEM?: Bighaf blong ol man we oli ded bambae oli laef bakegen. Jisas i promes se “ol dedman bambae…oli aot long beregraon blong olgeta.” (Jon 5:28, 29) Folem stamba tingting blong God, olgeta we bambae oli laef bakegen, oli gat janis ya blong laef long paradaes long wol. (Luk 23:43) Long taem ya, ol man we oli obei bambae oli gat wan bodi we i strong, mo bambae oli laef blong olwe. Baebol i talem se: “Ol stret man ya bambae oli tekem graon ya i blong olgeta, mo bambae oli stap long hem gogo i no save finis.” Ol Sam 37:29.

Sam narafala vas blong ridim Job 14:14, 15; Luk 7:11-17; mo Ol Wok 24:15.

?Olsem Wanem Mi Save Prea Blong God i Harem Mi?

?FROM WANEM OL MAN OLI ASKEM KWESTIN YA?: Ol man long klosap evri skul long wol tede oli stap prea. Nating se i olsem, plante man oli harem olsem se God i no ansarem prea blong olgeta.

?BAEBOL I TIJIM WANEM?: Jisas i talem se yumi no mas talem bakegen mo bakegen ol semfala prea. Hem i se: “Taem yufala i prea, yufala i no mas talem semfala toktok bakegen mo bakegen.” (Matiu 6: 7, NW ) Sipos yumi wantem we God i harem prea blong yumi, yumi mas prea olsem we Jeova i wantem. Blong mekem olsem, yumi nidim blong save wanem ol tingting blong God mo yumi save prea folem. Fas Jon 5:14 i eksplenem se: “Sipos yumi askem samting long hem we i stret long tingting blong hem, hem bambae i harem prea blong yumi.”

Sam narafala vas blong ridim Ol Sam 65:2; Jon 14:6, 14 mo 1 Jon 3:22.

?Olsem Wanem Mi Save Glad Long Laef?

?FROM WANEM OL MAN OLI ASKEM KWESTIN YA?: Plante man oli ting se mane, haenem, no naesfala bodi mo fes, hemia nao i save mekem man i glad. Taswe, oli traehad blong kasem ol samting ya be oli no glad yet.

?BAEBOL I TIJIM WANEM?: Jisas i soemaot rod blong kasem glad taem hem i talem se: “Olgeta we oli stap lukaot God from we oli no gat paoa blong hem long laef blong olgeta, oli save harem gud.” (Matiu 5:3) Yumi save gat trufala glad nomo sipos yumi lukaot rod blong kasem samting ya we i olsem stamba nid blong man hemia blong kasem save long ol trutok long saed blong God mo ol plan we hem i gat long saed blong yumi. Trutok ya yumi save faenem long Baebol. Taem yumi kasem save long trutok ya samting ya i save halpem yumi blong save wanem samting we i impoten mo samting we i no impoten. Sipos yumi folem trutok blong Baebol, hem i save lidim yumi blong tekem ol gudfala desisen we oli save lidim yumi blong gat wan laef we i gat mining. Luk 11:28.

Sam narafala vas blong ridim Ol Proveb 3:5, 6, 13-18 mo 1 Timoti 6:9, 10.