Ol Gudfala Brata Mo Sista:

Lav we yumi gat long God mo ol man i pusum yumi blong ‘go long ol man long olgeta nesen . . . , yumi pulum olgeta oli kam disaepol mo yumi baptaesem olgeta.’ (Mat. 28:​19, 20; Mak 12:​28-31) Sipos yumi lavem ol man, bambae yumi naf blong halpem “olgeta we oli soemaot se oli stret blong kasem laef we i no save finis.”—Wok 13:48.

Bifo, yumi tingbaot moa blong lanem baehat ol fastok, mo givimaot ol buk mo ol magasin. Be naoia yumi nid blong kam gud moa long fasin blong yumi blong toktok wetem ol man. Yumi wantem soemaot lav long ol man taem yumi tokbaot ol samting we olgeta oli intres long hem. Hemia i min se yumi mas rere blong jenisim fastok blong yumi, tingbaot situesen blong wanwan man, mo samting we oli intres long hem. ?Olsem wanem buklet ya i save halpem yumi blong mekem olsem?

Long buklet ya, i gat 12 lesen we i tokbaot ol fasin we yumi mas wokem blong yumi save soemaot lav mo mekem disaepol. Long wanwan lesen i gat wan stori long Baebol we i tokbaot wan fasin we Jisas, o wan Kristin long faswan handred yia i soemaot long wok blong prij. Mak blong yumi i no blong lanem baehat ol fastok, be yumi wantem traem faenem rod blong soemaot lav long ol man. Yumi nidim evri fasin ya long olgeta haf blong wok blong prij we yumi mekem. Taswe naoia bambae yumi luk olsem wanem yumi save soemaot sam long ol fasin ya, taem yumi statem wan storian, yumi mekem ol visit, o ol Baebol stadi.

Taem yu stap gotru long wanwan lesen, tingbaot olsem wanem yu save soemaot fasin ya taem yu stap toktok long ol man long teritori blong yu. Traehad blong mekem lav we yu gat long Jehova mo ol man i kam bigwan moa. Lav ya i moa impoten i bitim gudhan we yumi gat, from we bambae i halpem yumi blong kasem mak ya blong pulum ol man oli kam disaepol.

Mifala i glad tumas long nambawan privilej ya blong wok wetem yufala, we solda blong wan i joen long solda blong narawan. (Sef. 3:9) !I gud Jehova i blesem yufala bigwan, taem yufala i stap gohed blong lavem ol man mo pulum olgeta oli kam disaepol!