STORI 39
Fas King Blong Isrel
Ol man Isrel oli no glad long ol jaj we Jehova i putumap blong lidim olgeta, oli wantem wan king. Ale, oli talem long Samuel se: ‘Ol narafala kantri raonabaot oli gat king blong olgeta. Mifala tu i wantem wan king.’ Samuel i harem se samting ya i no stret, ale hem i prea long Jehova. Nao Jehova i talem se: ‘I no yu we olgeta oli no wantem, be mi ya. Yu talem long olgeta se oli save gat wan king, be king ya bae i askem plante samting long olgeta.’ Taem Samuel i talem tok ya long ol man Isrel, oli talem se: ‘!Nating! !Mifala i wantem wan king!’
Jehova i talem long Samuel se wan man we nem blong hem Sol bambae i kam king. Ale Sol i go luk Samuel long Rama, nao Samuel i kafsaedem oel long hed blong Sol blong makemaot hem olsem king.
Biaen, Samuel i singaot ol man Isrel oli kam wanples blong luk niufala king blong olgeta. Be oli no save faenem Sol. ?Yu save se hem i stap wea? Hem i stap haed long medel blong olting blong olgeta. Taem oli faenem Sol, oli tekem hem i kam stanap long fes blong olgeta. Sol i longfala moa, i bitim olgeta evriwan, mo hem i naes. Nao Samuel i talem se: ‘!Hemia nao, man ya we Jehova i jusumaot!’ Ol man oli singaot bigwan se: ‘!King, i gud yu stap longtaem!’
Fastaem King Sol i lesin long Samuel mo i obei long Jehova. Be biaen, fasin blong hem i jenis. Wan taem, Samuel i talem se Sol i mas wet blong hem i kam mekem wan sakrefaes long olta, from we king i no gat raet blong mekem olsem. Be Samuel i no kam kwik, ale Sol i girap i mekem sakrefaes. Taem Samuel i luk samting ya, ?hem i mekem wanem? Hem i tok long Sol, i se: ‘!Yu yu mekem krangke fasin! !Yu no obei long Jehova!’ ?Olsem wanem? ?Sol i lanem wan lesen?
Biaen, Sol i go faet agensem ol man Amalek, mo Samuel i talem se hem i no mas letem wan long olgeta i stap laef. Be Sol i letem King Agag i laef. Nao Jehova i talem long Samuel se: ‘Sol i lego mi finis, i no moa wantem lesin long mi.’ Samuel i harem nogud tumas, nao i talem long Sol se: ‘From we yu no moa wantem obei long Jehova, hem i no moa wantem yu. Bae hem i jusumaot wan narafala king.’ Taem Samuel
i tanemraon blong go, Sol i holemtaet klos blong hem, nao klos ya i brok. Ale, Samuel i talem long hem se: ‘Jehova i brekem finis paoa blong yu, olsem klos ya we yu yu brekem.’ Jehova bambae i mekem se wan narafala man we i lavem hem mo i obei long hem, i rul long ples blong Sol.“I moa gud yumi obei i bitim we yumi mekem wan sakrefaes.” —1 Samuel 15:22, NW