Long draetaem, Jehova i talem long Elaeja se: ‘Yu girap, yu go long taon ya Jarefat. Wan wido long ples ya bae i givim kakae long yu.’ Taem Elaeja i kam klosap long get blong taon ya, hem i luk wan wido we i stap pikimap faeawud. Hem i askem long woman ya blong i givim smol wota long hem. Taem hem i go blong karem wota, Elaeja i singaot long hem se: ‘Plis, yu karem smol bred i kam tu.’ Be wido ya i talem se: ‘Mi no gat bred blong givim long yu. Mi mi gat naf flaoa mo oel blong wokem wan smol bred nomo blong mi mo boe blong mi.’ Elaeja i talem long hem se: ‘Jehova i promes se sipos yu wokem wan bred blong mi, flaoa mo oel blong yu bae i stap kasem en blong draetaem, bae i no finis.’

Ale, wido ya i go long haos blong hem mo i wokem wan bred blong profet blong Jehova. Stret olsem Jehova i promes, hem mo boe blong hem tufala i gat naf kakae go kasem we ren i kam. Flaoa mo oel blong hem i neva finis.

 Biaen, wan samting i hapen we i nogud tumas. Smol boe blong wido ya i sik mo i ded. Wido ya i krae long Elaeja blong i givhan long hem. Elaeja i karemaot boe ya long han blong mama blong hem, i karem hem i go long wan rum antap. Hem i putum boe ya long bed, nao i prea se: ‘Jehova, plis yu mekem pikinini ya i laef bakegen.’ ?Yu save from wanem samting ya we Elaeja i askem, i narakaen? From we, bifo long taem ya i no gat wan man we i laef bakegen. Mo tu, wido ya mo boe blong hem, tufala i no man Isrel.

!Boe ya i stat pulum win, nao i laef bakegen! Elaeja i talem long wido ya se: ‘!Yu luk! Pikinini blong yu i laef bakegen.’ Woman ya i glad we i glad, mo i talem long Elaeja se: ‘Naoia mi save se yu yu wan man blong God stret. Yu yu stap talemaot ol tok ya nomo we Jehova i givim long yu.’