!I gat plante spirit we oli laef i stap! I gat sam gudfala spirit mo sam rabis spirit we yumi no save luk. ?Olsem wanem? ?Ol spirit ya, oli man we fastaem oli stap long wol, nao biaen oli ded?

Nogat. Plante man oli ting se taem wan man i ded, hem i go long ples blong ol spirit. Be tingting ya i no stret. ?Olsem wanem yumi save samting ya? Baebol nao i talem. God ya we nem blong hem Jehova, hem nomo i tru. Hem nao i givim Baebol mo i wokem ol man. Hem i save gud wanem i hapen long man taem hem i ded.—Ol Sam 83:18; 2 Timoti 3:16.

Baebol i talem se God “i tekem graon,” nao i mekem fas man ya Adam long hem. (Jenesis 2:7) God i putum man ya long Paradaes, long garen blong Iden. Sipos Adam i obei long loa blong Jehova, hem i no save ded, bambae hem i laef yet kasem tede, be hem i brekem loa blong God. Nao God i talem long hem se: “Bambae [yu] gobak bakegen long graon ya we mi mi wokem yu long hem fastaem. Mi mi wokem yu long graon fastaem, mo bambae yu yu kam graon bakegen.”—Jenesis 3:19.

?Hemia i minim wanem? Yu traem tingbaot: ?Bifo we Jehova i wokem Adam long graon, Adam i stap wea? Hem i no stap nating. Hem i no wan spirit long heven, we i no bon yet long wol. Hem i no laef samples. Taswe taem Jehova i talem long Adam se bambae hem i “gobak long graon ya bakegen,” hemia i min se Adam bambae i ded. Hem i no go long ples blong ol spirit. Taem Adam i ded, hem i sem mak olsem bifo. Hem i no laef, hem i no stap samples. Ded i min se man i no moa laef.

 ?Be olsem wanem long ol narafala we oli ded finis? ?Oli laef i stap samples, no nogat? Baebol i ansa se:

• “Bambae tufala tugeta [ol man mo ol anamol tu] i mas gobak long graon. Tufala i kamaot long graon, mo bambae tufala i gobak long hem bakegen.”—Prija 3:20.

• “Ol man we oli ded finis oli no moa save wan samting.”—Prija 9:5.

• “Ol fasin blong olgeta we oli laekem tumas ol man, no oli no laekem olgeta nating oli agens long olgeta, no oli jalus tumas long olgeta, be taem oli ded, ol samting ya oli lus wetem olgeta.”—Prija 9:6.

• “Bambae i no gat wok, mo tingting, mo save, mo waes long Hom blong ol Dedman, mo hemia nao ples we bambae yumi go long hem.”—Prija 9:10.

• “Taem oli ded, oli stap gobak long graon nomo, nao ol plan blong olgeta oli no save kamtru.”—Ol Sam 146:4.

 ?Olsem wanem? ?Yu harem se i had blong yu bilif long samting we ol vas ya oli talem? Sipos yes, i gud yu tingbaot samting ya: Long plante famle, papa nomo i winim mane blong sapotem famle blong hem. Taem hem i ded, plante taem famle blong hem i trabol tumas. Samtaem waef mo ol pikinini blong hem oli no gat inaf mane blong pem kakae. Maet ol enemi blong man ya oli tok nogud long famle ya. Yu traem tingbaot: ‘?Sipos man ya i laef i stap long ples blong ol spirit, from wanem hem i no gohed blong givim ol samting we famle blong hem oli nidim? ?From wanem hem i no lukaot long famle blong hem, blong ol rabis man oli no mekem i nogud long olgeta?’ From we ol vas ya blong Baebol oli tru nomo. Man ya i no laef samples, hem i no save mekem wan samting nating.—Ol Sam 115:17.

?Hemia i min se ol dedman bambae oli no save laef bakegen samtaem? Si. Biaen bambae yumi tokbaot laef bakegen. Ol dedman oli no save ol samting we yu yu stap mekem. Oli no save luk yu, mo harem yu, mo toktok wetem yu. Yu no mas fraet long olgeta. Olgeta oli no save mekem i nogud long yu, mo oli no save givhan long yu tu.—Prija 9:4; Aesea 26:14.