?Be from wanem Setan mo ol rabis enjel blong hem oli traehad blong giaman long ol man? From we oli wantem pulum yumi blong joen wetem olgeta blong agensem God. Oli wantem se yumi wosipim olgeta. Oli wantem se yumi bilif long ol giaman tok blong olgeta mo yumi mekem ol samting we Jehova i no laekem, olsem sam kastom blong dedman.

Taem wan famle blong yumi i ded, yumi harem nogud tumas. Long taem ya, yumi krae from we yumi sore tumas. Samting ya i no rong. Taem fren blong Jisas, Lasaros, i ded, Jisas tu “i krae.”—Jon 11:35.

Long olgeta ples long wol, i gat fulap kastom blong dedman. Plante long ol kastom ya, oli no agensem ol rul blong Baebol. Be sam kastom oli stanap long tingting ya se dedman i laef samples yet, mo hem i save lukluk ol man. Sam man oli mekem kakae gogo plante dei i pas, sam oli krae bitim mak, mo sam oli mekem wan flas seremoni blong berem dedman. Oli mekem ol kastom ya from we oli fraet long spirit blong dedman, oli wantem mekem spirit ya i harem gud. Baebol i talem se ol dedman oli “no save wan samting nating.” Taswe ol man we oli folem ol kastom ya oli stap leftemap giaman toktok blong Setan nomo.—Prija 9:5.

 Samfala oli mekem kastom no seremoni from we oli bilif se oli mas givhan long ol dedman. Oli ting se sipos oli no mekem, bambae dedman i save kam kros, mo mekem i nogud long olgeta. Long sam kantri, 40 dei biaen long ded blong wan man, no maet wan yia biaen, ol man oli mekem bigfala lafet mo sakrefaes. Oli talem se samting ya i save givhan long dedman ya blong ‘go insaed’ long ples blong ol spirit. Mo tu, plante man oli folem kastom ya we oli givim kakae mo dring long dedman.

Ol samting ya oli no stret, from we oli leftemap giaman toktok blong Setan long ded. ?Jehova bambae i glad long yumi sipos yumi folem kastom we i stanap long tijing blong ol rabis spirit nomo? Nogat.—2 Korin 6:14-18.

Ol man blong tru God oli no joen long ol kastom we oli sapotem giaman toktok blong Setan. Defren olgeta, taem man i laef i stap, oli traehad blong givhan long hem long kaen fasin, mo blong mekem hem i harem gud. Oli save se taem wan man i ded finis, Jehova nomo i save givhan long hem.—Job 14:14, 15.

Samfala oli singaot ol rabis spirit stret, mo samfala oli go luk wan kleva blong hem i mekem olsem. Hemia nao fasin blong singaot ol rabis spirit. Samfala oli mekem Vudu, go luk kleva, mekem majik, talemaot fiuja, mo toktok wetem ol dedman. Ol man we i mekem olsem oli singaot long ol rabis spirit.

Baebol i agensem ol samting ya, i se: ‘Bambae yufala i no mas . . . go luk ol kleva, mo blong makemgud ol smosmol saen we yufala i luk, mo blong mekem singsing long man, mo blong wokem ol bisnes blong masing mo posen, mo blong singaot long ol devel blong dedman blong oli givhan long yufala. Ol fasin ya i nogud we i nogud, Hae God i no laekem nating ol man we oli stap mekem olsem, i agens long olgeta.’—Dutronome 18:10-12.

?From wanem Jehova i givim strong woning ya long yumi blong yumi agensem ol fasin ya?

 Jehova i wantem se yumi harem gud, taswe hem i givim woning long yumi blong yumi agensem ol fasin we oli joen wetem rabis spirit. Hem i laekem ol man mo i kea gud long olgeta. Mo hem i save se olgeta we oli letem ol rabis enjel oli gat paoa long laef blong olgeta, bambae oli harem nogud.

Wan woman long Brasil, nem blong hem Nilda, hem i wan kleva. Ol rabis spirit oli mekem hem i harem nogud tumas. Woman ya i talem se: “Ol spirit ya . . . oli bos long mi, oli fosem mi blong obei long olgeta. Samtaem mi stap olsem we mi ded nomo, mo samtaem mi wekap gud. Plante taem mi mi mas go long spesel hospital blong oli stretem sik long tingting blong mi. Ol rabis spirit oli mekem trabol long mi gogo tingting blong mi i foldaon olgeta. Mi stat blong yusum drag mo blong dring alkol mo smok oltaem. Samting ya i gohed blong plante yia.”

Jehova mo ol Witnes blong hem oli givhan long Nilda. Sloslo, hem i kam fri long paoa blong ol rabis spirit. Naoia laef blong hem i gud, mo hem i glad. Hem i talem se: “Mi mi talem long olgeta man se oli neva neva mas letem ol [rabis] spirit oli gat paoa long olgeta.”