Ol enjel we Jehova i mekem fastaem oli gud nomo. Biaen wan enjel i kam nogud. Hemia Setan. Hem i wantem we ol man long wol oli wosipim hem nomo, be hem i no wantem we oli wosipim Jehova. Hemia nao samting we i kamaot long taem ya:

Long garen blong Iden, i gat plante tri we oli karem gudfala frut. Jehova i talem long Adam mo Iv se tufala i save kakae frut blong ol tri ya. Be i gat wan tri nomo we tufala i no mas kakae frut blong hem. Sipos tufala i kakae frut blong tri ya, bambae tufala i ded.—Jenesis 2:9, 16, 17.

Wan dei Iv i stap hem wan, nao wan snek i toktok long hem. Hem i no wan prapa snek, be hemia Setan we i yusum wan snek blong toktok. Setan i talem long Iv se sipos hem i kakae frut blong tri ya we i tabu, bambae hem i kam waes olsem God, mo bambae hem i no ded. Tufala tok ya oli giaman nomo. Be Iv i trastem ol tok ya. Ale hem i kakae frut blong tri ya we i tabu, biaen hem i givim long Adam tu.—Jenesis 3:1-6.

Long stori ya, yumi lanem se Setan i man blong agens mo hem i man blong giaman. Hem i talem se, sipos Iv i kakae frut ya, bambae hem i no save ded. Be hemia i no tru, from we biaen, Iv i ded, mo Adam tu i ded. Long taem ya Setan i no ded, be bambae hem i mas ded from we hem i mekem sin. Tede, Setan i laef i stap, mo hem nao i stap pulum ol man oli go krangke. Hem i no jenisim fasin blong hem nating. Hem i stap giaman yet. Mo hem i traehad blong pulum ol man, blong oli no obei long God.—Jon 8:44.

Biaen, sam narafala enjel tu oli kam nogud. Ol enjel ya oli lukluk ol naes woman long wol, nao oli wantem slip wetem olgeta. Ale oli kamdaon long wol, nao oli tekem bodi olsem man, mo oli stap tekem ol woman ya olsem we oli wantem. Fasin we ol enjel ya oli mekem, i agensem tingting blong God.—Jenesis 6:1, 2; Jud 6.

Mo tu, samting ya i mekem bigfala trabol long ol man. Ol woman blong ol enjel ya, oli bonem ol pikinini we oli narakaen. Taem ol pikinini ya oli gruap, oli kam ol lariken man blong faet, mo oli stap kilim man i ded. Sloslo wol i stap kam fulap long ol raf fasin. From samting ya, Jehova i mekem desisen blong spolem ol rabis man. Ale hem i mekem bigfala ren i foldaon. Be i gat Noa mo famle blong hem nomo, we oli stap obei gud long God, mo oli laef taem God i mekem bigfala wota i ron, mo i spolem ol rabis man.—Jenesis 6:4, 11; 7:23.

Ol rabis enjel oli no ded long taem ya, from we olgeta oli gobak long heven. Be God i panisim olgeta, mo hem i no letem olgeta blong oli joen bakegen wetem famle blong hem, we hemia ol gudfala enjel. Mo tu, Jehova i no moa letem blong olgeta oli tekem bodi olsem ol man. Ol rabis enjel ya, bambae oli ded long dei blong bigfala jajmen.—2 Pita 2:4; Jud 6.

Smoltaem afta long yia 1900, i gat wan bigfala faet i kamaot long heven. Buk blong Revelesen i tokbaot faet ya, i se: “Nao i gat bigfala faet i stat long heven. Mikael [Jisas Kraes we i laef bakegen] wetem ol [gudfala] enjel blong hem oli stap faet agens long bigfala algita ya [Setan]. Nao bigfala algita ya wetem ol [rabis] enjel blong hem oli traem faet agens long Mikael olgeta, be oli lus, mo i no moa gat ples blong olgeta long heven. Bigfala algita ya, hem i snek ya blong bifo we nem blong hem ‘Setan’ no ‘Man we i agensem man,’ we i stap giaman long olgeta man long wol, i lidim olgeta oli go krangke. Nao olgeta long heven oli sakemaot hem wetem olgeta [rabis] enjel blong hem oli aot long heven, oli kamdaon long wol.”

?Wanem i kamaot from? Baebol i gohed se: “From samting ya, yu heven, mo yufala evriwan we i stap long heven, yufala i mas harem gud. Be sore tumas long yu, graon, mo long yu, solwota, from we Setan i kamdaon finis long yufala. Mo hem i kros tumas, from we hem i save se i gat smol taem nomo blong hem i stap yet.”—Revelesen 12:7-9, 12.

Yes, Setan wetem ol rabis enjel blong hem oli pulum plante man oli go krangke, mo oli mekem bigfala trabol long ol man long wol. Ol rabis enjel ya, hemia ol rabis spirit, no ol devel we Baebol i tokbaot. Olgeta oli enemi blong God. I no gat wan long olgeta we i gud.