Yu traem tingbaot stori ya: Tim wetem ol fren blong hem oli stap pleplei wetem wan balong. Tim i sakem balong ya mo i mestem balong ya, i bangem brekem glas blong trak blong man we i stap long nekis yad.

Sipos yu yu Tim, ?bambae yu mekem wanem?

I GAT TRI ROD BLONG FOLEM:

1. Ronwe.

2. Blemem narafala.

3. Talemaot mastik ya, mo talem se bambae yu fiksimap.

Maet i isi nomo blong jusum Rod Namba 1. Be yu mas tingbaot se, oltaem i gat gudfala frut i kamaot taem yu talemaot mastik blong yu, nating se yu brekem wan glas blong trak, no yu mekem wan narafala mastik.

1. Hemia stret samting blong mekem.

   Baebol i talem se: “Mifala i wantem tumas we oltaem mifala i stap mekem i stret nomo.”—Hibrus 13:18.

2. Ol man oli glad moa blong fogivim man we i talemaot ol mastik blong hem.

   “Sipos yu stap traem haedem ol sin blong yu, bambae yu no save win long laef blong yu. Be sipos yu tanem tingting blong yu, nao yu talemaot ol sin ya blong yu long Hae God, mo yu gowe long olgeta, hem bambae i gat sore long yu.”—Ol Proveb 28:13.

3. Samting we i moa impoten se, yu mekem God i glad.

   Baebol i talem se: “Hae God i no laekem nating ol man we oli stap mekem ol samting nogud, i agens long olgeta. Hem i trastem ol stret man, mo i stap talemaot tingting blong hem long olgeta.”—Ol Proveb 3:32.

Karina we i gat 20 yia, i haedem wan risit we hem i pem long ol polis from we hem i spid tumas long trak. Afta long wan yia, papa blong hem i faenem risit ya. Karina i se: “Mi kasem bigfala trabol taem papa i faenem risit ya.”

?Yumi lanem wanem? Karina i se: “Problem i kam mowas taem yu haedem ol mastik. Mo wan dei, bae yu kakae frut blong hem.”

Baebol i talem se: ‘Plante taem, yumi evriwan i mekem mastik.’ (Jemes 3:2) Taem man i talemaot mastik blong hem, hemia i soemaot se hem i gat tingting daon, mo i kam bigman long tingting.

Narafala samting hemia, blong lanem lesen from mastik we yu mekem. Frida wan yangfala, i talem se: “Mi luk ol mastik blong mi, olsem wan rod blong tijim mi blong mi no moa mekem sem mastik bakegen.” Yu traem tingbaot:

Yu ronron long baskel blong papa blong yu, be yu spolem sam pat blong hem. ?Bambae yu mekem wanem?

• Yu no talemaot mo yu ting se papa blong yu bambae i no save.

• Yu talemaot stret samting we i hapen.

• Yu talemaot samting we i hapen, be yu blemem narafala.

Yu no pasem eksam blong yu from yu no bin stadi. ?Bambae yu mekem wanem?

• Yu talem se eksam i had tumas.

• Yu akseptem mak we yu kasem, from we yu no bin stadi.

• Yu blemem tija blong yu.

 Yu traem tingbaot sipos yu nao, (1) yu papa blong yu mo (2) yu tija blong yu. ?Bambae papa mo tija blong yu, tufala i gat wanem tingting long yu, sipos yu talemaot ol mastik blong yu??Bambae tufala i gat wanem tingting long yu, sipos yu haedem ol mastik blong yu?

Yu traem tingbaot wan mastik we yu mekem las yia, mo yu ansa long ol kwestin ya.

?Wanem mastik we yu bin mekem? ?Long taem ya, yu yu mekem wanem?

• Mi haedem mastik ya.

• Mi blemem narafala.

• Mi talemaot mastik ya kwiktaem.

Sipos yu no talemaot mastik ya, ?yu yu harem olsem wanem?

• Mi glad—Mi winim problem ya finis.

• Mi no glad—Mi sud talem tok we i tru.

?Olsem wanem blong stretem gud mastik ya?

?Mastik we yu mekem i tijim yu long wanem?

?From wanem sam man oli haedem ol mastik blong olgeta?

?Ol man bambae oli gat wanem tingting, sipos oltaem yu stap haedem ol mastik blong yu? ?Ol man bambae oli gat wanem tingting, sipos yu talemaot ol mastik blong yu?—Luk 16:10.