Jehova i mekem fas woman ya, Iv, mo i tekem hem i kam long man ya Adam, blong i kam woman blong Adam.—Jenesis 2:21, 22.

Jehova i mekem tufala we tingting mo bodi blong tufala i stret gud olgeta, i no gat wan samting i rong long tufala.

Tufala i stap long garen blong Iden. Ples ya i naes tumas, i wan Paradaes. Garen ya, i gat ol reva long hem mo ol tri we oli karem frut, mo i gat ol anamol.

Jehova i toktok long tufala mo i tijim tufala. Sipos tufala i lesin long hem, bambae tufala i laef olwe long Paradaes long wol.

Long garen ya, i gat wan tri we Jehova i soem long Adam mo Iv, mo hem i talem long tufala se sipos tufala i kakae frut blong tri ya bambae tufala i ded.

Wan enjel i girap, i agensem God. Rabis enjel ya hemia Setan.

Setan i no wantem se Adam mo Iv, tufala i obei long Jehova. Taswe hem i yusum wan snek blong talem long Iv se sipos hem i kakae frut ya we God i blokem se i tabu, bambae hem i no ded be bambae hem i kam olsem God. Ol tok ya blong Setan oli giaman nomo.—Jenesis 3:1-5.