Baebol i talemaot plante samting we oli stap hapen tede. Hem i talem se bambae ol man oli laekem mane tumas, bambae ol pikinini oli no obei long papa mama blong olgeta, bambae ol man oli wael olgeta, mo bambae oli laekem tumas ol pleplei.

Bambae graon i seksek bigwan, mo bambae i gat ol bigfala faet. Bambae i gat hadtaem blong kasem kakae, mo ol strong sik we oli kasem plante man. Ol samting ya oli stap kamtru naoia.

Mo tu, Jisas i talem se gud nius blong Kingdom bambae i go kasem ol man long olgeta ples long wol.—Matiu 24:14.

I no longtaem bambae Jehova i spolem olgeta man nogud.

Bambae Setan mo ol rabis enjel oli kasem panis.

Ol man we oli lesin long God bambae oli sef, nao bambae oli stap long niufala wol we i gat stret fasin long hem, mo we i no moa gat man i fraet. Bambae man i trastem narafala man, mo bambae oli lavlavem olgeta.