ASTER PARKER | LAEF STORI
Mi Wantem Yusum Laef Blong Mi Fulwan Blong Ona Long Jehova
Mi mi glad se gudfala papa mo mama blong mi i tijim mi long trutok, stat taem mi bebi nomo. Tufala i yusum ol pija mo stori long buk ya From Paradise Lost to Paradise Regained blong putum trutok long hat blong mi. Mi tokbaot ol samting we mi lanem wetem ol pikinini long nekis yad, mo wetem bubu man blong mi taem hem i kam luk mifala. Papa mo Mama i folem wan gudfala program blong wosip, mo samting ya i givhan long famle long ol jenis we mifala i mas mekem, taem mifala i aot long Asmara, Eritrea, blong muv i go long Addis Ababa, Itiopia.
Taem mi mi smol nomo, mi laekem trutok. Mi wantem givim laef blong mi long Jehova mo baptaes. Taem mi gat 13 yia, mi glad tumas blong kasem mak ya blong baptaes. Taem mi gat 14 yia, Brata Helge Linck a i askem long mi sipos mi bin tingbaot wok blong paenia. Mi no save fogetem taem ya. Papa mo mama blong mi i bin mekem wok blong paenia wanwan taem (naoia yumi kolem haftaem paenia), be mi no save nating long wok blong fultaem paenia. Kwestin blong Brata Linck i planem wan sid long hat blong mi, mo mi wantem mekem moa long wok blong Jehova.
Taem mi mi yangfala, wetem brata blong mi Josiah
Rere Blong Kasem Fasin Agens
Long 1974, ol problem blong politik long Itiopia i mekem se oli arestem mo kilim i ded plante man, mo i gat plante trabol. Biaen, mifala i no moa save prij long ol haos wanwan, mo oli letem mifala i joen long ol smol grup nomo. Papa mo mama blong mi i rerem mifala ol pikinini from plante moa fasin agens. Ol rul mo tingting blong Baebol oli givhan long mifala blong kasem save long fasin blong ol Kristin blong no joen long politik. Mifala i kasem save se Jehova bambae i halpem mifala blong save stret samting blong talem taem oli kwestinim mifala, mo stret taem blong stap kwaet.—Matiu 10:19; 27:12, 14.
AFP PHOTO
Long taem blong faet insaed long kantri, 1974
Afta we mi finis long skul, mi stat blong wok blong Ethiopian Airlines. Wan dei, taem mi statem wok, ol narafala wokman oli talem se mi mas lidim wan maj blong selebretem ol yia we gavman i rul. Kwiktaem nomo mi talem long bos blong mi se mi mi wan Kristin mo mi no joen long politik, taswe mi no save joen long selebresen ya.
Long nekis dei, taem mi stap wok long epot, mi luk sam man we oli karem masket oli wokbaot i kam long ples blong pem tikit. Mi ting se oli stap kam blong arestem wan man we i stap traem blong ronwe long kantri. !Be oli poenem mi! ?Mi mekem wanem samting we i rong? Dei ya we i stat olsem ol narafala dei blong wok, i jenis kwiktaem.
Help We Mi Kasem Long Prisen
Ol soldia oli tekem mi mi go long wan ofis nao oli askem kwestin long mi blong plante aoa. Oli wantem save se: “?Hu i stap pem ol Witnes blong Jehova? ?Yu yu wok blong Eritrean Liberation Front? ?Yu o papa blong yu i wok blong gavman blong Yunaeted Stet?” Hemia wan taem blong fraet, be Jehova i givhan long mi blong gat kwaet tingting.—Filipae 4:6, 7.
Afta we oli askem plante kwestin, ol soldia oli tekem mi long trak blong olgeta i go long wan haos we oli yusum olsem prisen. Oli putum mi long wan rum we longfala blong hem i 28 meta mo bigfala blong hem i 28 meta. I gat 15 yangfala woman long rum ya, we oli arestem olgeta from tingting we oli gat long saed blong politik.
Mi wok blong wan kampani blong plen
Long naet ya, mi slip long floa we mi werem yunifom blong wok nomo, mo mi harem nogud from mi save se famle blong mi bambae oli wari. Oli save se polis i arestem mi, be oli no save se mi stap wea. Mi askem long Jehova blong i halpem famle blong mi blong faenemaot ples we mi stap.
Taem mi wekap long nekis moning, mi luksave wan yangfala gad. Hem i sapraes blong luk mi mo i askem se: “Aster, ?yu stap mekem wanem long ples ya?” Mi plis long hem blong i go luk Papa mo Mama mo i talem long tufala weples mi stap. Long sem dei, mi kasem wan pasel blong kakae mo klos we tufala i sanem long mi. Gad ya i bin talem long tufala weples oli holem mi mi stap. !Jehova i ansarem prea blong mi! Samting ya i mekem tingting blong mi i strong se mi no stap mi wan.
Mi no save gat wan Baebol o sam buk blong yumi, mo oli no letem ol famle mo ol fren oli kam visitim mi. Nating se i olsem, Jehova i yusum ol woman prisena blong leftemap tingting blong mi. Mi prij long olgeta evri dei, mo oli laekem trutok long saed blong Kingdom blong God. Plante oli talem se: “Mifala i stap faet from wan gavman blong man, be yu yu stap faet from gavman blong God. !Yu no mas lego, nating se oli wantem kilim yu yu ded!”
Samtaem ol gad oli askem plante kwestin long ol prisena mo wipim olgeta. Wan naet, samwe long 11 klok, oli kam tekem mi mi go long wan rum blong askem plante kwestin long mi mo putum plante poen agens long mi. Oli talem se mi no sapotem gavman. Oli wantem se mi ripitim ol tok blong advetaesem wan politik pati, be taem mi no wantem, tu gad i wipim mi. Plante taem oli tekem mi mi go blong askem ol kwestin olsem. Evri taem mi prea long Jehova wetem fulhat blong mi, mo mi haremsave se hem i stap givim paoa long mi.
Afta we tri manis i pas, wan gad i kam talem long mi se mi save gohom. Mi mi sapraes mo mi glad, be mi sore tu se mi no moa save serem hop blong Kingdom wetem ol yangfala woman long prisen.
Sam manis afta we mi aot long prisen, ol soldia oli kam long haos taem mi mi no stap, mo oli arestem tufala sista mo wan brata blong mi. Long taem ya, mi luksave se mi mas aot long kantri ya. Mi harem nogud tumas blong lego famle blong mi, be Mama i leftemap tingting blong mi blong stap strong mo trastem Jehova. Smoltaem biaen, mi jam long wan plen we i stap go long Yunaeted Stet. Long naet ya, ol soldia oli kam long haos blong arestem mi bakegen. Taem oli luk se mi no stap, oli hariap blong kam long epot, be plen we mi stap long hem i aot finis.
Tu misinari, Haywood mo Joan Ward, we tufala i bin stadi wetem papa mo mama blong mi, tufala i welkamem mi taem mi kamtru long Maryland. Faef manis biaen, mi kasem mak ya blong kam wan paenia. Gel blong tufala we nem blong hem Cyndi, hem i paenia wetem mi, mo mitufala i gat plante gudfala taem long wok blong prij.
Mi wetem Cyndi Ward we mitufala i paenia tugeta
Bisi Long Wok Blong God Long Betel
Mi wetem hasban blong mi long Betel long Wallkill, New York
Long hot taem blong 1979, mi visitim Betel long New York, mo mi mitim Wesley Parker. Mi laekem tumas ol gudfala fasin blong hem, mo hem tu i wantem mekem moa long wok blong Jehova. Long 1981, mitufala i mared, mo mi muv i go long Wallkill, New York, blong wok long Betel wetem Wesley. Fastaem mi klinim ol rum mo wasem klos, biaen mi kasem wan wok long Kompiuta Dipatmen. Betel i givim janis long mi blong wok fulwan blong Jehova, mo blong save plante brata mo sista we oli stap olsem ol gudfala fren blong mitufala kam kasem tede.
Long Itiopia, famle blong mi i stap fesem bigfala trabol from fasin agens, mo mi mi wari long olgeta. Tufala sista mo wan brata blong mi we oli bin arestem olgeta, oli stap long prisen. b Evri dei mama blong mi i mas rerem kakae mo karem i go long trifala, from we prisen i no stap givim kakae long olgeta.
Long hadtaem ya, Jehova i kam olsem ples blong haed blong mi, mo ol brata mo sista long Betel oli kamfotem mo sapotem mi. (Mak 10:29, 30) Wan dei, Brata John Booth i talem se: “Mifala i glad se yu stap wok long Betel. Hemia i save hapen nomo from blesing blong Jehova.” c Gudfala toktok ya i mekem mi mi sua se Jehova i blesem desisen blong mi blong aot long Itiopia, mo se hem bambae i lukaot long famle blong mi.
Mekem Wok Blong Jehova Olsem Wan Famle
Long Jenuware 1989, mi faenemaot se mi gat bel. !Mitufala i sek long nius ya! Be afta we sam dei i pas, mitufala i glad tumas. Nating se i olsem, mitufala i stap tingbaot sipos mitufala i naf blong mekem wok blong wan papa mo mama, weples bambae mitufala i laef long hem taem mitufala i aot long Betel, mo wanem kaen wok we mitufala i save mekem blong sapotem famle.
Long 15 Eprel 1989, mitufala i fulumap olting blong mitufala long trak mo mekem trip i go long Oregon, ples we bambae mitufala i mekem wok blong fultaem paenia long hem. Be taem mitufala i kasem ples ya, sam fren we oli ting se oli stap givim gudfala advaes long mitufala, oli talem se i no stret we mitufala i traem blong paenia. I tru se mitufala i no gat plante samting mo i no longtaem bambae mitufala i gat wan pikinini. ?Bambae mitufala i mekem wanem desisen? Stret long taem ya, eria elda mo waef blong hem, Guy mo Penny Pierce, tufala i kam visitim kongregesen blong mifala. d Tufala i pulum mitufala blong gohed long plan we mitufala i gat. Ale mitufala i stat long wok blong fultaem paenia mo trastem Jehova blong i halpem mitufala. (Malakae 3:10) Mitufala i gohed blong paenia afta we faswan boe blong mitufala, Lemuel, i bon, mo afta we seken boe, Jadon, i bon.
Mitufala i laekem tumas blong tingting bak long taem ya we mitufala i paenia wetem tufala boe blong mitufala. Mitufala i gat janis blong eksplenem trutok blong Baebol long tufala boe ya long semtaem we mitufala i eksplenem long ol neba. (Dutronome 11:19) Be afta we namba tri boe blong mitufala, Japheth, i bon, mitufala i no save mekem wok blong paenia blong smoltaem.—Maeka 6:8.
Tijim Trifala Boe Blong Mitufala Blong Wosipim Jehova
Mitufala i save se wok we i moa impoten hemia blong halpem wanwan long trifala boe blong mitufala, blong oli save Jehova olsem wan tru fren blong olgeta. Taswe, mitufala i traem blong mekem famle wosip i kam olsem wan samting we oli laekem tumas. Taem oli smol, mifala i ridim ol stori long ol buk olsem Listening to the Great Teacher mo Buk Blong Ol Baebol Stori. Mo tu, mifala i aktem sam stori. I gat wan woman nomo long haos, taswe taem mifala i aktem stori blong Jesebel, mi nao mi mas mekem Jesebel. !Trifala boe i laekem tumas blong pusumaot mi long jea, blong mi foldaon olsem Jesebel, mo oli mekem olsem ol dog we oli kakae hem! Antap long famle wosip, Wesley i mekem Baebol stadi wetem wanwan long ol boe ya.
Mitufala i lavem mo lukaot gud long trifala boe ya, mo mifala i prea blong joen gud olsem wan famle. Taem oli stap kam bigwan, mitufala i tijim olgeta blong mekem ol wok olsem wasem ol plet, klinim rum, mo wasem klos blong olgeta. Mo tu, oli lanem olsem wanem blong kukum kakae blong olgeta.
I no ol boe ya nomo we oli lanem sam lesen, be mitufala tu i lanem plante samting. Samtaem mitufala i talem sam tok we i no kaen long ol boe o long mitufala bakegen. Long taem olsem, mitufala i mekem tingting blong mitufala i stap daon mo talem sore.
Plante taem mifala i singaot ol brata mo sista long kongregesen blong oli kam long haos, wetem sam brata mo sista blong Betel, sam misinari, mo ol eria elda we oli visitim kongregesen, mo tu, olgeta we oli kam blong prij long ples we i gat moa nid. (Rom 12:13) Taem oli kam long haos, mitufala i no sanem ol pikinini oli go pleplei long narafala rum. Oli stap wetem mifala mo lesin long storian mo ol ekspiriens. Plante taem ol pikinini oli save tingbaot ol smosmol poen long ol stori, bitim mi mo Wesley.
Mi mo Wesley i wok had blong mekem se famle i harem gud long wok blong Jehova. Wan samting we mitufala i mekem, mitufala i sevem mane mo spel blong mitufala, blong tekem famle i go long ol trip long ol defdefren kantri. Long evri ples, mifala i go visitim branj ofis, go long ol miting, mo joen long wok blong prij. Hemia i mekem se mifala i laekem tumas oganaesesen blong Jehova long fulwol, mo tu, mifala i laekem blong joen insaed long famle.
Famle i visitim wol hedkwota long Brooklyn, New York, 2013
Gohed Blong Yusum Laef Blong Mifala Fulwan Long Wok Blong Jehova
Mifala i luk se i gat plante man long eria blong mifala we oli toktok Spanis, be i no gat man blong prij long olgeta. Taswe, taem ol boe oli smol yet, mifala i askem long Brata Pierce sipos hem i ting se i gud blong muv i go long wan Spanis kongregesen. Hem i smael bigwan mo i talem se: “Sipos yu yu man blong hukum fis, yu go long ples we i gat plante fis.” Tok ya i leftemap tingting blong mifala blong muv i go long Spanis kongregesen long Woodburn, Oregon. Mifala i glad blong statem plante Baebol stadi we oli gohed gud, halpem sam long olgeta blong oli kasem baptaes, mo halpem wan smol grup blong i kam wan Spanis kongregesen.
Wan taem, Wesley i lusum wok blong hem mo mifala i mas muv i go long California blong faenem wan narafala wok. Tu yia biaen, mi, Lemuel, mo Jadon, i stat long wok blong paenia. Long 2007, mi glad tumas blong joen long Skul Blong Paenia wetem tufala boe blong mi. Smoltaem biaen, mifala i luk se i gat plante man we oli toktok lanwis Arabik long ples blong mifala. Ale, afta we famle i bin stap 13 yia long Spanis kongregesen, mifala i mekem desisen blong joen long Arabik kongregesen. Mifala i harem gud blong serem trutok wetem plante man we oli toktok Arabik we oli kam stap long ples blong mifala, mo tu, mifala i joen long plante kampen blong prij long ol kantri we ol man oli toktok Arabik. Mifala i gohed yet blong mekem wok blong paenia long Arabik teritori long San Diego, California.
Wesley i wan nambawan hasban mo hed blong famle. Hem i respektem oganaesesen blong Jehova, mo hem i neva talem wan samting agensem ol plan we Betel o kongregesen i mekem. Oltaem hem i faenem wan gudfala samting blong talem. Hem i prea wetem mi mo i prea from mi. Taem mifala i kasem trabol o wari, ol prea blong hem oli leftemap tingting blong mi mo givhan long mi blong mi no moa wari.
Taem mi tingting bak, mi luksave olsem wanem mifala i bin harem gud tumas blong mekem wok blong Jehova fultaem, tijim mo lukaot gud long ol pikinini, mo wok wetem ol kongregesen we oli nidim moa man blong prij. Mifala i luk se Jehova i blesem ol man we oli putum hem long fasples long laef blong olgeta, mo mifala i neva sot long wan samting. (Ol Sam 37:25) Mi sua se jus we mi mekem blong yusum laef blong mi fulwan blong ona long Jehova, hemia beswan desisen blong mekem.—Ol Sam 84:10.
Mi wetem (stat long lefsaed) Japheth, Lemuel, Jadon, mo Wesley
a Branj ofis blong Kenia we Brata Linck i wok long hem, i lukaot long wok long Itiopia.
b Tufala sista mo wan brata blong mi, trifala i kam fri afta we trifala i stap fo yia long prisen.
c Brata Booth i wan memba blong Hed Kampani go kasem we laef blong hem long wol ya i finis long 1996.
d Biaen Brata Pierce i wan memba blong Hed Kampani go kasem we laef blong hem long wol ya i finis long 2014.