Long 1906, smoltaem afta we bubu man mo bubu woman blong mi i lusum wan boe from sik ya diphtheria, tufala i harem gud nius blong Kingdom blong Jehova. Dokta blong tufala i wan Baebol Studen, hemia nem blong ol Witnes blong Jehova bifo. Dokta i serem gudfala hop blong Baebol wetem tufala, olsem hop blong laef bakegen. From samting ya, tufala bubu, mama blong mi mo sista blong hem, oli kam ol Baebol Studen.

 Oli wok strong blong plante yia long trutok. Taem oli soem “Photo-Drama of Creation” long Chicago, Illinois, long Yunaeted Stet, ol woman ya nao oli halpem ol man blong faenem ples blong sidaon. Be sore tumas, Mama nomo i gohed blong mekem wok blong Jehova. I no isi long Mama taem ol famle oli lego trutok, from we oli lavlavem olgeta mo oli bin wosipim Jehova tugeta kam kasem ol yia 1930. Be eksampol blong Mama blong fasgud mo obei long Jehova i gat bigfala paoa long mi, olsem eksampol blong papa blong mi we hem tu i wan Baebol Studen.

 Mi mi bon long 1927, mo mi fasbon long 6 pikinini. Mifala evriwan i holemstrong long trutok. Papa i wan kapenta, taswe mifala i stap long wan gudfala haos jes aotsaed long taon ya Chicago. Mifala i gat wan bigfala garen, mo mifala i lukaot long ol faol mo dakdak.

 Mi mi laekem blong wok. Wan wok blong mi i blong somap ol hol long ol stokin blong famle. Tede oli sakemaot ol stokin we oli gat hol long olgeta, be long taem bifo mifala i somap bakegen. Mifala i yusum wan nidel mo tred blong somap. I gud se mi lanem blong mekem wok ya, from we long ol yia biaen mi somap plante.

 Papa i meksua se famle i tinghae long wosip. Taswe mifala i go oltaem long miting, wok blong prij, mo tokbaot wan vas blong Baebol evri dei. Long Sarede naet, mifala i yusum Wajtaoa blong mekem famle stadi.

 Blong givim wan gudfala witnes long ol man raonabaot, Papa i putum wan saen we i wok wetem lektrik, klosap long windo long rum blong sidaon. Ol brata oli wokem saen ya we i talemaot nem blong pablik tok o wan buk blong yumi. Bokis we saen i stap long hem i gat ol laet we oli on mo off oltaem, hemia i pulum ae blong ol man we oli pas. Mo tu, Papa i putum tu saen long trak blong mifala.

 Ol tok mo aksen blong papa blong mi i tijim mifala se i impoten blong obei long Jehova. Mama i sapotem gud hem. Mo tu, taem smol sista blong mi i gat faef yia nomo, Mama i stat blong mekem wok blong Jehova fultaem, mo i gohed ful laef blong hem. Tru ya, mi mi gat wan nambawan papa mo mama.

 Laef blong mifala bifo i defren long laef blong yumi tede. Mifala i no gat televisen, taswe mi mo ol brata mo sista blong mi, mifala i sidaon long floa mo lesin long ol gudfala stori long radio. Mo tu, famle i harem gud long ol program we oganaesesen blong Jehova i mekem long radio.

 Mifala i laekem tumas blong go long ol bigfala asembli blong ol Witnes blong Jehova. Long asembli long 1935, mifala i lanem se “bigfala hip blong ol man” long Revelesen 7:9, 14 we oli pastru long “bigfala trabol,” oli gat hop blong laef olwe long Paradaes long wol. Bifo long 1935, Papa mo Mama i kakae bred mo dring waen long Memoriol. Be afta long asembli ya, Papa nomo i gohed blong mekem olsem. Mama i kasemsave se hop blong hem i no blong rul wetem Kraes long heven, be blong laef olwe long wol.

 Long 1941, long asembli long St. Louis, Missouri, Joseph Rutherford, we i lidim wok blong yumi long taem ya, i soemaot wan niufala buk we nem blong hem, Children. !Ol man oli klapem han longtaem! Mi mi gat 14 yia long taem ya mo mi baptaes wan yia bifo. Mi tingbaot yet olsem wanem mi wetem ol narafala pikinini, mifala i laenap blong go long stej blong kasem wan buk.

 Long taem bifo, wok blong prij i defren long tede. Long ol yia 1930, mifala i yusum ol fonograf we mifala i karem blong plei rikoding long ol man blong haos, long saed blong wan tok we i stanap long Baebol. Bifo we mifala i noknok long doa, mifala i tanem handel blong fonograf mo meksua se rikod mo nidel i stap long stret ples. Taem man i openem doa, mifala i talem smol toktok, mo biaen mifala i plei wan Baebol tok blong fo minit haf, mo givim wan buk. Ol man long ples blong mifala oli lesin wetem respek. Mi no save tingbaot wan man we i tok nogud long mifala. Taem mi gat 16 yia, mi stat long wok blong paenia, mo Papa i givim wan fonograf long mi we mi glad tumas blong yusum long wok blong prij. Mi paenia wetem wan gudfala sista we nem blong hem Lorraine.

 Wan narafala rod blong prij we mifala i yusum, hemia blong wokbaot long rod long ol grup mo prij long ol man. Blong smoltaem, oli singaotem wok ya se ol wokbaot wetem sanwij saen, from we mifala i werem tu saen, wan long fran blong bodi mo wan long baksaed. Long ol saen ya, i gat ol tok olsem “Skul i Wan Trap Mo Wan Kruked Bisnes,” mo “Mekem Wok Blong God Mo Kraes We i King.”

 Ol miting oli rerem mifala from fasin agens, mo oli tijim mifala olsem wanem blong toktok blong leftemap trutok. Mo i tru se mifala i kasem fasin agens. Eksampol, long faswan taem we mifala i givimaot ol magasin long fored blong ol stoa we i gat plante man, polis i holem mifala mo tekem mifala i go long polis stesen. Sam aoa biaen oli lego mifala i fri. Mifala i glad blong kasem trabol ya from we mifala i obei long Jehova.

 Wan dei, Lorraine i tekem mi blong mitim wan brata we nem blong hem Eugene Rosam. Hem i bin mitim brata ya long wan asembli long Minneapolis, Minnesota. Eugene i gruap long Key West, Florida. Taem hem i stap long klas ten, oli sakemaot hem long skul from hem i no wantem joen long seremoni blong leftemap kantri. Wan taem nomo, hem i joen long wok blong paenia. Wan dei, hem i mitim wan gel we hem i bin skul wetem. Eugene i wan studen we i gat hed, taswe gel ya i wantem save from wanem oli sakemaot hem. Taem Eugene i yusum ol vas blong Baebol blong ansa long ol kwestin blong hem, hem i wantem stadi Baebol. Hem i bilif long trutok mo i kam wan gudfala sista.

 Long 1948, mi mo Eugene i mared, mo mitufala i paenia long Key West. Biaen oli singaot mitufala blong go long Namba 18 klas blong Skul Blong Gilead we i finis long 1952. Mitufala i joen long wan klas blong lanem Spanis, taswe mitufala i ting se bambae oli sanem mitufala i go long wan kantri we ol man oli toktok Spanis. Be i no olsem. Taem mitufala i stap long Skul Blong Gilead, wo long Koria i stap gohed, mo oli singaot Eugene blong i joen long ami. Mitufala i sapraes long samting ya from we long Wol Wo Tu, oli bin agri se hem i no nid blong joen long ami from we hem i wan man blong jos. From we oli singaotem hem bakegen, mitufala i stap nomo long Yunaeted Stet. Mi mi krae from we mi harem nogud tumas. Tu yia biaen, Eugene i kasem nius se hem i no nid blong joen long ami. Samting ya i tijim mitufala se taem wan doa i sat, Jehova i save openem wan narafala doa. Yumi mas gat longfala tingting nomo.

 Mifala i paenia long wan Spanis kongregesen long Tucson, Arizona, mo long 1953 oli askem long Eugene blong mekem eria elda. Biaen mitufala i wok long plante defren ples long Ohio, California, mo New York City. Long 1958, hem i statem wok blong distrik elda a long California mo Oregon. Mitufala i stap long haos blong ol brata mo sista. Long 1960, mitufala i go long Kanada, mo Eugene i tijim olgeta we oli lukaot long kongregesen, long Kingdom Ministri Skul. Mitufala i stap long Kanada go kasem 1988.

 Wan gudfala memori we mi gat long Kanada, hemia long saed blong wan famle we mi mo wan narafala sista i mitim long wok blong prij. Fastaem mitufala i mitim mama blong famle ya, nem blong hem Gail, mo hem i talem se tufala boe blong hem oli harem nogud from bubu man blong tufala i ded. Tufala i stap askem long hem se: “?From wanem hem i ded? ?Hem i go wea?” Gail i no save ansa long ol kwestin ya. Ale mitufala i serem ol vas blong Baebol we oli givim ansa mo leftemap tingting.

 Long taem ya, Eugene i stap mekem wok blong eria elda long wan kongregesen, taswe mitufala i stap wan wik nomo long ples ya. Be sista we i prij wetem mi i gobak blong luk Gail bakegen. ?Wanem i hapen? Gail mo hasban blong hem Bill, wetem ol trifala boe blong tufala Christopher, Steve, mo Patrick, oli akseptem trutok. Naoia Chris i wan elda long Kanada. Steve i tija long wan Baebol skul long Palm Coast, Florida. Mo Patrick i wan memba blong Branj Komiti long Taelan. Long ol yia we i pas, mi mo Eugene i gohed blong frengud wetem famle ya. !Mi glad tumas se mi mekem smol wok blong givhan long olgeta blong save Jehova!

 Taem mitufala i stap long Kanada, Jehova i openem wan doa blong Eugene i kasem wan niufala wok we hem i laekem tumas. Bambae mi eksplenem wok ya long yu.

 Plante yia bifo, ol man oli no kasemsave long bilif blong yumi long saed blong blad transfusen, mo from samting ya i gat plante nogud toktok agensem yumi long ol niuspepa. Long Kanada, ol niuspepa oli talem se plante pikinini blong ol Witnes oli ded from we papa mo mama blong olgeta i no letem olgeta i tekem blad. Mi mo hasban blong mi i gat bigfala blesing ya blong givhan long ol man, blong oli kasemsave se ol ripot ya oli no stret.

 Bifo long intenasnal asembli long 1969 long Buffalo, New York, Eugene i joen wetem plante brata blong visitim ol bigfala hospital. Oli eksplenem se 50,000 Witnes blong Kanada mo Yunaeted Stet bambae oli kam long asembli ya. Taswe, sipos eniwan long olgeta oli mas kam long hospital, i gud se ol dokta oli kasemsave long bilif blong mifala long saed blong blad, mo from wanem desisen ya i stret. Ol brata oli givim plante atikol long ol dokta long saed blong ol narafala tritmen we oli no yusum blad. Ol atikol ya oli kamaot long ol buk we ol dokta oli respektem. Ol dokta oli glad tumas, mo samting ya i pulum Eugene mo sam narafala brata blong stat blong visitim ol hospital long Kanada. Mo tu, oli halpem ol elda blong oli save wanem blong mekem taem i gat wan emejensi.

 Sloslo ol wok ya oli karem gudfala frut. Blong talem stret, !mifala i no tingbaot bigfala samting we bambae i kamaot from wok ya! ?Wanem samting?

 Samwe long 1980, Milton Henschel we i stap long wol hedkwota long Brooklyn, New York, i ring long Eugene. Hed kampani i wantem se wan program we i stap gohed long Yunaeted Stet, i kasem plante moa dokta blong givim infomesen long olgeta. Taswe mi mo Eugene i muv i go long Brooklyn, mo long Jenuware 1988 Hed Kampani i setemap wan dipatmen long wol hedkwota we nem blong hem Hospital Infomesen Dipatmen. Biaen oli askem long Eugene mo tu narafala brata, blong oli mekem ol miting wetem ol dokta, fastaem long Yunaeted Stet mo biaen long sam narafala kantri. I no longtaem, oli setemap ol Hospital Infomesen Dipatmen long ol branj ofis, mo Komiti Blong Toktok Wetem Dokta long plante defren taon. Plante Witnes mo ol pikinini blong olgeta oli kasem help long plan ya we Jehova i putumap. Taem Eugene i visitim ol hospital mo mekem miting wetem ol dokta, mi mi wok long Betel, mo plante taem mi wok long ples blong somap o long kijin.

 Long 2006, mi fesem wan hadtaem olsem mi neva fesem bifo. Gudfala hasban blong mi Eugene i ded. !Mi misim bigwan lav mo kampani blong hem! ?Wanem i halpem mi blong stanap strong long hadtaem ya? Plante samting, olsem prea mo ridim Baebol blong stap klosap long Jehova. Mi lesin long vas blong dei we Betel famle i mekem. Mo mi ridim japta blong Baebol we vas ya i kamaot long hem. Mo tu, mi stap bisi long wok blong mi long Betel long ples blong somap, mo mi luk wok ya olsem wan bigfala blesing. Plante yia bifo, mi gat janis blong givhan blong somap ol kaliko blong ol Haos Asembli long New Jersey mo New York. Naoia mi wok long Betel long Fishkill, mo mi mekem ol smosmol wok nomo blong somap. b

 Samting we i moa impoten long mi, i blong lavem Jehova mo obei long hem mo oganaesesen blong hem. (Hibru 13:17; 1 Jon 5:3) Mi mi glad se mi mo Eugene i bin putum Jehova long fasples long laef blong mitufala. From samting ya, mi gat strong tingting se Jehova bambae i blesem mitufala wetem laef we i no save finis long paradaes long wol, we mitufala i save luk mitufala bakegen.—Jon 5:28, 29.