Taem waef blong mi Kaye, i bonem gel blong mitufala, Lauren, mi no save olsem wanem blong kam wan gudfala papa. Sem mak taem hem i bonem seken pikinini blong mitufala, wan boe we nem blong hem Michael. Taem mi mi yangfala, papa mo mama blong mi i raorao mo faet oltaem. Biaen tufala i divos. Mi mi wantem lidim gud famle blong mi, be mi no save olsem wanem blong mekem.

 Antap long hemia, taem mi wan yangfala, mi dring bitim mak mo mi tekem drag. Taem mi kam bigman, ol fasin ya wetem fasin blong plelaki tu, oli kontrolem laef blong mi. From samting ya, mi mekem plante nogud desisen. Ol samting i kam moa nogud, nao Kaye i seraot long mi mo i tekem tufala pikinini blong mitufala i go wetem hem. Hat blong mi i brok.

 Mi askem long Kaye se mi mas mekem wanem blong i kambak long mi. Kaye i stap storian oltaem wetem Gloria we hem i wan Witnes blong Jehova, taswe hem i talem stret long mi se: “Yu mas stadi Baebol.” Mi no save mining blong samting ya, mo mi no wantem stadi Baebol tu, be blong winimbak Kaye, mi agri blong mitim Gloria mo hasban blong hem Bill.

 Taem Bill mo Gloria i kam long haos blong mifala, mi luk se tufala i joen gud mo lavlavem tufala. Tufala i tokbaot trifala pikinini blong tufala, we oli stap yusum laef blong olgeta blong mekem ol gudfala samting. Hemia fastaem we mi tingbaot se maet Baebol nao i save givhan long mi blong gat wan hapi famle.

 Long fas visit ya, Bill mo Gloria i storian wetem mi long saed blong ol problem we mi mi gat. Tufala i soem wanem we Baebol i talem long Galesia 6:7 we i se: “Wanem sid we man i planem, be frut blong hem nomo, man ya bambae i kasem.” Mi stap tingting se: ‘!Sipos mi bin letem waes ya i lidim mi long ol desisen we mi mekem, bambae mi no gat wan laef we i fulap long trabol!’

 Sloslo, mi luk olsem wanem ol rul blong Baebol oli stap mekem laef blong mi i kamgud moa. Mi mo Kaye i lego fasin blong smok, mo mi kasem help blong winim ol narafala fasin we oli stap holemtaet mi. Long 1985, namba tri pikinini blong mitufala i bon, wan boe we nem blong hem David, be mifala i singaot hem se Davey. Long taem ya nao, mi jes harem se mi mi naf blong kam wan gudfala papa.

 Mi mo Kaye i luksave se taem mitufala i tijim ol pikinini blong oli lavem Jehova, mitufala tu i kam klosap moa long Hem. !Mitufala i lanem plante samting long ol buk olsem Listening to the Great Teacher! Mo tu, i gat ol famle long kongregesen we oli soemaot gudfala eksampol long mifala.

 Taem ol pikinini oli gruap, oli mekem wok blong paenia. Long 2004, Lauren i stap long wan Spanis kongregesen, Michael i jes aot long Betel blong mared, mo hem wetem waef blong hem tufala i rere blong go long Guam blong givhan long wok blong prij long ples ya. Davey, we i gat 19 yia, i jes go long Dominikan Ripablik blong prij fultaem.

 Mi mo Kaye i praod long ol pikinini blong mitufala from ol jus we oli mekem. Mitufala i harem se ol tok blong 3 Jon 4 i stret long mitufala, we i se: “Taem mi harem se ol pikinini blong mi oli stap gohed blong wokbaot long trutok, hemia i mekem mi mi glad moa.” Mitufala i no save nating, olsem wanem wan telefon kol bambae i jenisim laef blong mitufala.

 Long 24 Eprel 2004, mi mo Kaye i go kakae long wan restoron wetem tu narafala kapol. Restoron ya i stap 100 kilometa longwe long ples blong mifala, ale mifala sikis i go long trak blong mi. Afta, mi dropem olgeta long wan narafala ples we bambae mifala i kakae aeskrim, nao mi putum trak long paking. Fon blong mi i ring. Hemia wan fren, mo voes blong hem i soemaot se hem i harem nogud.

 Hem i talem se: “Wan rabis samting i hapen. Davey i gat wan aksiden.”

 Mi askem se: “?Hem i kasem bigfala kil?” Mi fraet blong harem ansa blong hem.

 Fastaem, hem i no save toktok. Biaen, sloslo, hem i talem se Davey i ded.

 Taem mi finis blong storian long fon, mi prea long Jehova blong i givim paoa long mi. Nao mi go insaed long restoron mo mi talem long ol narafala se mi no harem gud, mo i moagud mifala i gobak long haos. Mi no wantem talem rabis nius ya long Kaye taem ol narafala oli stap.

 Mi harem nogud tumas long trip blong gobak long haos, we i tekem 90 minit. Mi harem Kaye i stap talem wetem glad se i no longtaem Davey bambae i kam visitim mifala. Long semtaem, bifo we Kaye i save se boe blong mitufala i ded, ol fren oli stap sanem ol teks mesej oli kam long fon blong mi blong talem sore.

 Mitufala i dropem tu narafala kapol ya long haos blong olgeta, nao mitufala i gobak long haos. Taem Kaye i luk fes blong mi, hem i save se wan nogud samting i bin hapen. Hem i askem se: “?Wanem i rong?” Mi save se ansa blong mi bambae i spolem gud hat blong Kaye mo jenisim laef blong hem, olsem we fon kol we mi kasem tu aoa bifo i bin mekem long mi.

 Mi mo Kaye i fesem plante trabol bifo, mo mitufala i save se Jehova i kamfotem ol man blong hem. (Aesea 41:10, 13) Be hemia wan trabol we i defren olgeta. Mi stap tingting se: ‘?Olsem wanem samting ya i save hapen long Davey? Hem i yusum ful laef blong hem blong mekem wok blong Jehova. ?From wanem Jehova i no protektem hem?’

 Tu narafala pikinini blong mitufala, tufala tu i harem nogud bitim mak. Lauren i olsem namba tu mama blong Davey, taswe taem Davey i ded, hem i harem i soa bitim mak long hat blong hem. Michael tu i harem nogud bitim mak. Faef yia bifo hem i aot long famle, be long ol laswan manis we i pas, hem i luksave se smol brata blong hem i gruap i kam wan bigman we i stap mekem ol gudfala desisen.

 Wantaem nomo, kongregesen i stat blong givhan long mifala. Jes afta we Kaye i harem se Davey i ded mo i stap krae, ol brata mo sista long kongregesen oli stap kamtru long haos blong kamfotem mo givhan long mitufala. (Ol Proveb 17:17) !Bambae mi neva fogetem lav we oli soemaot!

 Blong traem kontrolem filing blong mitufala, mi mo Kaye i gohed blong prea, stadi Baebol, mo go long ol Kristin miting. Hemia i no tekemaot soa we i stap long hat blong mitufala, be mitufala i save se i impoten blong gohed long ol samting ya, blong mekem bilif blong mitufala i stap strong.—Filipae 3:16.

 Long semtaem, Michael mo Diana i muv i kam klosap long mitufala, mo Lauren i joenem Inglis kongregesen blong mitufala bakegen. Taem mifala i stap klosap long mifala oltaem blong sam yia, hemia i halpem mifala blong stat blong winim filing ya blong harem nogud bitim mak. Taem Lauren i mared, hasban blong hem Justin i sapotem gud famle tu.

 Smoltaem afta we Davey i ded, mifala i mekem wan narafala samting we i no isi blong mekem, be i kam wan blesing we i givhan long mifala. Kaye bambae i talem stori ya.

 “Taem hasban blong mi i talem long mi se Davey i ded, i olsem we mi foldaon long wan hol we i dak we i dak insaed, mo mi stap longtaem long hol ya. I had blong mi mekem ol samting we mi mas mekem evri dei, from we mi harem nogud tumas mo mi krae oltaem. Blong talem stret, samtaem mi kros long Jehova mo long evriwan we oli laef i stap yet. Mi harem se mi stap lusum hed.

 “Mi wantem go long Dominikan Ripablik. Mi wantem stap long ples we Davey i bin stap long hem, mo we i mekem wok blong Jehova long ol laswan manis blong laef blong hem. Be mi harem se mi no gat paoa, mo mi no naf blong mekem trip ya.

 “Wan gudfala fren i halpem mi taem hem i talem se ol fren blong Davey long Dominikan Ripablik oli stap harem nogud tumas tu, mo oli wantem mitim famle blong Davey. Sapot blong sista ya i givim paoa long mi blong mekem trip ya.

 “Trip ya i stret samting we famle i nidim. Mifala i kasem save olsem wanem Davey i putum fulhat blong hem long wok blong Jehova. Wan brata we hem nomo i elda long kongregesen blong Davey, i talem se oltaem hem i save trastem Davey blong mekem gud eni wok we hem i kasem.

 “Taem mifala i wokbaot long rod we Davey i bin stap long hem, ol man raonabaot oli kam talem long mifala ol gudfala samting we Davey i mekem blong givhan long olgeta. Mi save finis se Davey i kaen, be hemia i halpem mi blong save olsem wanem Davey i traehad bigwan blong folem trak blong leg blong Jisas.

 “Mo tu, mifala i mitim wan Baebol stadi blong Davey, wan man we i stap long wan smol haos mo i no save kamaot long bed blong hem from hem i sik tumas. Man ya i pua we i pua, be ol brata mo sista oli talem long mifala se Davey i soemaot bigfala respek mo i kea long man ya. !Mi harem se mi praod we mi praod long boe blong mi!

 “Trip ya i had moa i bitim eni narafala trip we mi mekem long laef blong mi, be i givhan bigwan long famle blong mifala. Mifala i harem gud moa taem mifala i krae wetem ol narafala we olgeta tu oli misim Davey, mo taem mifala i serem ol tok blong leftemap tingting. Hemia i givhan blong tekemaot sam soa long hat blong mifala.”

 Long Wekap! blong Jenuware 2005, i gat wan atikol we i tokbaot ded blong Davey mo wok we hem i mekem long Dominikan Ripablik. Long taem ya, mifala i no save olsem wanem atikol ya bambae i halpem plante narafala we oli ridim. Eksampol: Long Mei 2019, wan brata we nem blong hem Nick i kontaktem mifala, mo i talem olsem:

 “Long en blong 2004, mi stap long haeskul mo mi no gat tingting blong mekem wok blong Jehova fultaem. Be mi no hapi. Mi prea long Jehova, blong askem long hem blong i halpem mi blong yusum yangtaem blong mi long rod we i moagud. I no longtaem afta long hemia, mi ridim stori blong Davey long Wekap! !Hemia ansa blong prea blong mi!

 “Mi lego haeskul mo mi stat long wok blong paenia. Mi wantem tu blong lanem Spanis mo muv i go long wan narafala kantri. Biaen, mi muv i go long Nikaragwa, mo tu, mi mo waef blong mi i go long Skul Blong Kingdom Ivanjelis. Taem ol narafala oli askem long mi wanem i halpem mi blong mekem desisen blong paenia, mi tokbaot stori blong Davey.”

 Mifala i gat wan narafala sapraes taem mifala i mitim wan sista we nem blong hem Abi. Hem i stap long sem hotel wetem mifala long 2019 Intenasnal Asembli long Buenos Aires, Ajentina. Mifala i laekem tumas fasin blong hem we i kaen mo i soemaot lav. Hem i mekem mi mo Kaye i tingbaot ol gudfala fasin blong Davey.

 Taem mitufala i gobak long hotel, mitufala i sanem wan link long Abi long saed blong atikol long Wekap! we i tokbaot Davey. Sam minit biaen, hem i ansa. Hem i wantem tumas blong toktok wetem mitufala, ale mitufala i go mitim hem long ples blong sidaon long hotel. Abi i stat blong krae, mo i talem long mitufala olsem wanem stori blong Davey i givhan long hem blong stat long wok blong paenia long Septemba 2011, mo blong go wok long wan ples long bus we i gat moa nid. Hem i talem se: “Taem mi fesem ol problem long ples we mi wok long hem, mi ridim bakegen stori blong Davey.” !Hem i stap karem magasin ya wetem hem!

 Ol stori olsem oli soemaot se yumi stap long wan bigfala famle blong ol brata mo sista long fulwol. !I no gat wan samting we i naes olsem fasin joen gud blong ol man blong Jehova!

 Taem mi mo Kaye i luk olsem wanem stori blong Davey i givhan long plante narafala blong mekem wan gudfala desisen, hemia i leftemap tingting blong mitufala. Sem mak long ol narafala yangfala tu we oli wok had long wok blong Jehova. Maet oli no luksave se strong tingting blong olgeta blong gohed i tajem hat blong plante man, mo eksampol blong olgeta i pusum plante narafala blong mekem bes blong olgeta long wok blong Jehova.

 Long Luk 20:37, Jisas i talem bakegen tok blong Jehova, se hem i “God blong Ebraham, God blong Aesak, mo God blong Jekob.” !Jehova i no talem se hem i God blong trifala taem trifala i laef nomo, be hem i God blong trifala ya yet! ?From wanem hem i talem olsem? Long vas 38, Jisas i talem se: “Long tingting blong hem, olgeta evriwan oli laef nomo.”

 Yes, Jehova i tingbaot ol gudfala man blong hem we oli ded olsem se oli laef yet. !Hemia i soemaot strong tingting we hem i gat blong mekem olgeta oli laef bakegen! (Job 14:15; Jon 5:28, 29) Mi mi bilif strong se Jehova i gat tingting olsem long saed blong Davey, mo ol narafala man blong hem tu we oli stap slip long ded.

 Mi wantem tumas blong luk Davey bakegen, be mi wantem moa blong luk taem ya we Kaye i joen wetem Davey bakegen. Mi neva luk wan we i harem nogud tumas olsem Kaye. Ol tok blong Luk 7:15 oli gat spesel mining long mi, se: “Nao boe ya [we i bin ded] i sidaon mo i stat blong toktok, ale Jisas i givim hem long mama blong hem.”

 Long Septemba 2005, mi joenem Kaye long wok blong paenia. I gud we i gud blong wok klosap long waef blong mi mo tufala pikinini blong mi wetem hasban mo waef blong tufala, long wok blong paenia. Famle i joengud mo mifala i sapotem mifala. Mifala i tingbaot nambawan hop blong fiuja we long niufala wol, bambae mifala i joen bakegen wetem Davey, we mifala i lavem hem tumas.