Afta we bom i bosta, mi folem mama blong go lukaotem besfren blong hem. Be mifala i sapraes taem mifala i faenemaot se hem i ded. Sam dei afta, taem nekis bom i faerap, papa blong mi i putum mi mi sidaon long fored blong baskel blong hem, mo mitufala i ronwe kwiktaem i goaot long taon.

 Wol Wo II i spolem plante ples long Itali, mo plante man oli safa from, taswe mi neva fogetem taem ya. Be samting we i gat moa paoa long laef blong mi, hemia se taem mi smol, oltaem mi joen wetem ol man we oli save Jehova mo oli lavem hem tumas.

Wan Presen, Hemia Trutok

 Sam manis bifo we mi bon, hemia long koltaem long 1936, papa blong mi i stap wok long rod blong tren wetem wan man we nem blong hem Vincenzo Artusi. Vincenzo i no baptaes yet olsem wan Witnes, be hem i laekem tumas ol trutok blong Baebol. Taem tufala i stap karemaot ol sno long rod blong tren, hem i stap tokbaot long papa blong mi ol samting we hem i stap lanem.

 Kwiktaem nomo papa blong mi i luksave se ol samting we Vincenzo i stap talem long hem, hemia trutok. Ale, hem mo sam narafala man long taon ya Faenza, oli wantem save moa. Long ol taem ya we ol Fasis oli stap mekem i strong long ol man, ol Witnes oli no save mekem ol miting blong olgeta long klia ples, mo oli no save givimaot ol buk we i tokbaot Baebol from oli save arestem olgeta. Mo oli putum sam Witnes long kalabus. Taswe, papa blong mi mo ol fren blong hem oli stap mit long wan haos we i stap aotsaed long taon, blong oli save ridim Baebol mo stadi long ol buk we oli gat. Mo tu, evri wik, papa blong mi i mekem se mifala evriwan long famle i joen wanples long wan sapa blong stadi long Baebol.

Wan Presen, Hemia Ol Gudfala Eksampol

 Long 1943, bighaf blong ol Witnes we oli kalabus from bilif blong olgeta, oli kam fri. Long olgeta ya, i gat wan yangfala sista we nem blong hem Maria Pizzato. Taem hem i stap gobak long ples blong hem long not blong Itali, hem i slip wetem mifala blong wan naet. Hem i bin mekem wan impoten wok, hemia blong halpem ol Witnes blong oli kasem ol buk mo blong oli gohed blong toktok wetem branj ofis long Swiselan, we long taem ya hem i stap lukaot long ol wok long Itali. Nating se long taem ya Maria i stap siksik, be hem i gat strong tingting mo i no fraet. Afta long wo, wanwan taem hem i kam long Faenza, mo oltaem mifala i glad tumas blong luk hem.

 Wan narafala sista we mi tingbaot gud, hemia Albina Cuminetti. Taem mi mi wan yangfala, olfala wido sista ya i laef long bilding we mifala i stap mekem ol miting long hem. Hem i wan colporteur (fultaem paenia) long Itali, mo hem i statem wok ya long stat blong ol yia 1920. !Albina i talem plante gudfala stori long mi long saed blong ol wok we oli mekem long stat long ol yia ya!

 Albina i bin gat sam buk blong yumi mo sam narafala samting blong histri. Wan dei mi luk wan pin wetem wan kros mo wan hat we ol Baebol Studen (hemia nem blong ol Witnes long taem ya) oli stap werem. Taem mi luk samting ya, mi sapraes from mi save se kros i wan samting we ol giaman skul oli stap yusum, ale mi stat blong laf smosmol. Nao Albina i talem wan samting we bambae mi neva fogetem. Hem i talem ol tok we i stap long Sekaraea 4:10, be long wan defren wei, i se: “!Yu no mas talem se yu no laekem dei blong ol smol samting!”

 Ol tok ya oli tijim mi long wan impoten lesen. Nating we ol Baebol studen long taem ya oli no kasemsave gud long trutok, be mi mas respektem olgeta. Mo tu, from we long taem ya i no gat evri buk long Itali, i tekem plante taem blong ol brata oli kasem ol niufala save we i jenis. Nating se i olsem, Jehova i glad long traehad we oli mekem, mo mi tu mi mas mekem sem mak.

 Nating se mi mi yang moa long Albina, be mi laekem blong storian wetem hem. Hem wetem Maria, mo ol narafala sista we oli wok strong long wok blong Jehova mo oli holemstrong long hem nating se oli fesem ol had situesen, oli kam ol gudfala eksampol we mi save folem. Mi glad tumas long nambawan janis ya we mi gat blong joen wetem olgeta.

Wan Presen, Hemia Wok Long Betel

 Long hot taem blong 1955, mi travel i go long Rom blong joen long Asembli ya “Kingdom We i Win.” Long taem ya, mi wetem ol defdefren brata sista blong ol defren kantri, mifala i visitim Betel. Mo mi stap tingting se, ‘!Bae naes tumas sipos mi wok long ples ya!’

 Long 18 Disemba 1955, mi baptaes. Long taem ya mi stap skul yet, be mi wantem tumas blong mekem wok blong Jehova fultaem. Long 1956, long wan asembli long taon ya Genoa, mi harem oli talemaot se i nidim plante volontia blong go wok long Betel. Be brata we branj ofis i sanem, i talemaot stret se oli no nidim ol sista long Betel.

 Biaen, mi storian wetem eria elda blong mifala Piero Gatti, a mo mi tokbaot long hem ol mak we mi wantem kasem. Nao brata ya we i kaen mo i gat strong tingting blong prij, i talem long mi se: “Mi mi leftemap tingting blong yu blong mekem wok blong spesel paenia.”

 Long sem taem ya, mi kasem wan leta we i kam long branj ofis. Mo long tingting blong mi, mi sua se hemia i blong askem mi blong mekem wok blong paenia, be nogat. !Hemia wan leta we oli askem mi blong aplae blong go wok long betel!

 Mi kasem Betel long Jenuware 1958. Long taem ya, famle blong Betel oli no bitim 12 man. Oli askem mi blong givhan long tu transleta long branj. I gat plante wok blong mekem, mo mi no gat save nating long wok blong translesen. Be wetem help blong Jehova, mi stat blong laekem tumas wok we mi mekem.

 I no bitim tu yia yet, ol wok long translesen oli jenis mo oli talem long mi blong mi gobak mekem wok blong paenia. Long taem ya, mi sapraes bigwan from we mi mi laekem tumas laef long Betel. Be nating se i olsem, mi traem blong tingbaot niufala wok ya olsem wan presen we Jehova i givim long mi.

Wan Presen, Hemia Ol Fren We Oli Gat Strong Tingting Blong Prij

 Long 1 Septemba 1959, mi stat blong mekem wok blong spesel paenia long taon ya Cremona. Fren blong mi we mitufala i paenia tugeta, hemia Doris Meyer, we hem i kam long Denmak. Hem i olfala smol long mi, be hem i gat plante ekspiriens long wok blong paenia mo mi laekem hem tumas. Doris i gat strong tingting, i no fraet, mo oltaem hem i faswan blong mekem samting. Mitufala i nidim ol fasin ya blong mitufala i save prij long teritori blong mitufala, from we long ful taon ya mitufala nomo i Witnes.

 Doris i kasem Cremona fastaem long mi, mo hem i mekem plan blong mifala i mekem ol miting long wan apatmen we ol man oli stap rentem. Ol lokol pris blong Katolik oli luksave ol wok we mitufala i stap mekem, nao oli kros tumas, ale oli stap talem long ol man blong oli mas lukaot long mifala.

 Wan dei, ol polis oli askem long mitufala blong go long polis stesen. Oli no arestem mitufala, be oli talem klia long se from we Doris i blong wan narafala kantri, hem i mas aot long Cremona. Nating se hem i gobak long Denmak, be hem i gohed blong wok strong long wok blong Jehova.

 Smoltaem afta, oli sanem wan narafala singel sista i kam long Cremona, nem blong hem Brunilde Marchi. Hem i gat kwaet fasin, i laekem wok blong prij, mo i gat plante gudfala fasin. Mitufala i statem plante Baebol stadi, mo sam long olgeta oli stap gohed gud.

 Mi talem bigfala tangkiu long Jehova from nambawan janis ya we mi gat blong joen long wan samting i jes stat, hemia wok blong prij long Cremona. !Tede, i gat faef kongregesen long taon ya!

Wan Gudfala Sapraes

 Afta we mi stap klosap tu yia long Cremona, olgeta long branj oli kolem mi. I gat plante wok blong mekem long translesen, blong mekem rere from Asembli ya “Ol Man Oli Joen Gud Blong Mekem Wosip” we i blong sikis dei, we bambae oli mekem long Julae 1961. Taswe, oli askem mi blong gobak long Betel. !Long taem ya, mi jamjam from mi glad tumas! Mi gobak long Betel long 1 Februari 1961.

 Mifala i wok plante aoa, be i wan blesing blong stap bisi evri dei blong wok long ol buk we i stanap long Baebol. Ol manis ya oli pas kwiktaem nomo, mo i no longtaem dei ya blong asembli i kamtru.

 Long asembli ya, mi harem oli talemaot se bambae oli mas transletem Niu Wol Translesen Baebol—Matiu-Revelesen, i go long lanwis blong Itali. Nao mi stap tingting se, ‘!Ah! Hemia i min se i gat plante wok yet blong mekem.’ Mo samting we mi tingbaot i tru. Ol brata oli talem long mi se bambae mi stap longtaem moa long Betel. !Be blong talem stret, mi stap yet long Betel kam kasem tede, naoia i bitim 60 finis!

Wan Narafala Presen We Jehova i Givim

 Wan narafala presen we mi glad tumas long hem long ol yia we i pas, hemia blong stap singel. Hemia i no min se mi neva gat tingting ya se bambae mi no mared. Blong talem stret, samtaem mi harem nogud blong stap mi wan. Taswe, mi tokbaot samting ya long Jehova tru long prea, from we hem i save gud mi moa i bitim eni narafala man. Mi askem hem blong i halpem mi blong mi kasemsave beswan samting we mi mas mekem.

 Ol vas olsem Matiu 19:11, 12 mo 1 Korin 7:8, 38, oli givhan bigwan long mi, mo mi talem tangkiu long Jehova from i halpem mi blong kasemsave gud long ol vas ya, mo i mekem se mi gat pis long tingting. Mi neva rigret from desisen we mi mekem, mo mi glad tumas se mi save yusum taem ya we mi singel blong mekem bes blong mi long wok blong Jehova.

 Long ol yia we i pas, mi bin luk plante jenis we Dipatmen Blong Translesen i mekem, taem oganaesesen blong Jehova i stap yusum ol niufala teknoloji mo ol “melek blong ol nesen.” (Aesea 60:16) Ol jenis ya oli mekem ol brata mo sista long fulwol oli joen gud. Eksampol, long 1985, ol Wajtaoa long lanwis Itali oli stat blong kamaot long semtaem we Inglis i kamaot. Tede, plante buk mo ol video oli stap kamaot long plante lanwis, long jw.org, mo plante long olgeta oli stap kamaot long semtaem wetem Inglis. I klia se Jehova i meksua se ol man blong hem oli joen gud mo oli kasem ol kakae long saed blong spirit long stret taem.

 Jehova i kaen tumas long mi. Hem i letem mi mi mekem wok blong spesel paenia mo yusum mi blong halpem plante man blong oli kam klosap long hem. Hem i mekem se mi kasem samting we mi wantem tumas, hemia blong wok long Betel. Long ples ya, mi gat plante gudfala fren we oli kamaot long ol defren bakgraon mo oli gat defren yia. Antap long hemia, mi kasem wan spesel blesing, hemia blong luk mama blong mi we i gat 68 yia, i baptaes mo i kam wan Witnes blong Jehova. Mi wantem tumas blong luk hem mo ol narafala famle blong mi taem oli kamaot long ol beregraon blong olgeta, oli laef bakegen.—Jon 5:28, 29.

 Mi wantem tumas blong luk samting we Jehova bambae i mekem long ol man blong hem long fiuja, taem i mekem “olgeta samting oli kam niuwan.” (Revelesen 21:5) Mi mi sua gud se: Jehova bambae i neva stop blong givim “olgeta gudfala presen mo ol presen we oli nambawan” long yumi.—Jemes 1:17.