Mi mi wan helti bebi, be long Ogis 1967, taem mi gat 18 manis, mi fiva strong. Taem mi wekap long nekis moning, tufala leg blong mi i no moa gat paoa. Long ples blong mi, Freetown, long Siera Leon, oli faenemaot long hospital se mi gat polio, hemia wan sik we vaeras i stamba blong hem. Bighaf blong olgeta we oli kasem sik ya, oli ol pikinini we oli no gat faef yia yet, mo sik ya i mekem se oli no moa save wokbaot. Hospital i halpem mi blong mekem ol eksasaes, be tufala leg blong mi i no kam gud. Sloslo tufala i kam slak moa, nao mi no moa save stanap. Plante taem papa blong mi i talem se mi mi “haf pikinini” nomo, from we mi handikap. Mi save kalkal nomo, plante narafala oli daonem mi, mo mi harem se mi nating nomo.

 Mi stap wetem mama blong mi long wan komuniti we oli pulum fenis i goraon long hem, mo ol narafala famle we oli stap long ples ya oli pua tu. Nating se plante narafala oli laekem mi, mi wantem tumas we papa blong mi i lavem mi, be i no olsem. Samfala oli ting se sik blong mi i kamaot from we wan man i mekem wan samting long mi. Sam narafala oli talem long mama blong mi blong i lego mi mi stap long doa blong wan hospital blong ol handikap. Olsem nao, bambae mi no moa wan baden long hem. Mama i no lesin long advaes ya, be hem i wok had blong lukaot long mi.

 From we mi no save stanap o wokbaot, mi mas kalkal nomo. Be taem mi dragem bodi blong mi long graon, mi stap kasem kil. Taswe, mi werem ol klos we oli tik mo mi yusum slipa olsem hanglaf blong protektem tufala han blong mi. Biaen, mi yusum tufala pis wud we oli katem olsem leta U, hemia i moa gud blong protektem tufala han blong mi. Mi stap pusum tufala han blong mi i go long fored, mo yusum wud ya blong pulum bodi blong mi i go. Afta, mi benem baksaed blong mi mo swingim tufala leg i go long fored. Hemia i olsem we mi tekem wan “step,” ale biaen mi mas mekem sem samting bakegen blong tekem wan narafala “step.” Hemia i wan hadwok we i mekem tufala han mo solda blong mi i soa. Taswe klosap mi neva go afsaed long fenis we i raonem komuniti we mifala i stap long hem. Mi no save go long skul mo pleplei wetem ol narafala pikinini. Mi wari se sipos mama blong mi i ded, bambae i no moa gat wan blong lukaot long mi.

 Mi prea long God blong i halpem mi, mo i no letem mi mi kam wan gel blong asaskem kakae olbaot. Mi ting se sipos mi kam klosap long God mo mekem wok blong hem, bambae hem i lukaot long mi. Taswe, long wan dei long 1981, mi go afsaed long komuniti we mifala i stap long hem blong go long jos, nating se i mekem bodi blong mi i soa tumas. Ol man long jos ya oli lukluk nogud long mi, mo mi harem se mi no welkam long ples ya. Pasta tu i no talem halo long mi, mo i tok long Mama from we mi sidaon long wan jea we narafala i pem finis blong sidaon long hem. Mi no moa gobak long jos ya.

 Long 1984, taem mi gat 18 yia, wan moning mi klaem i go antap long ol step long haos blong mifala, blong sidaon klosap long windo. Hemia samting we mi mekem evri dei, blong wajem ol samting we i stap hapen afsaed. Afta we smoltaem i pas, mi wantem go afsaed long wan ples blong spel, we klosap oltaem i no gat man long hem. Taem mi kasem ples ya, mi luk tu man we tufala i stap prij long ol haos wanwan. Tufala i tokbaot wan nambawan fiuja long mi, we ol sik olsem hemia we mi mi gat, bambae oli finis. Tufala i ridim Aesea 33:24 mo Revelesen 21:3, 4, mo givim naes pija buk ya Yu Yu Save Harem Gud Blong Olwe Long Wol. Tufala i promes blong kambak mo tijim mi long sam moa samting.

 Taem tufala i kam luk mi bakegen, tufala i talem se wan niufala misinari, Pauline, bambae i kam wetem tufala blong gohed blong storian wetem mi. Pauline i kam, mo sloslo hem i kam olsem wan mama blong mi. Stret mama blong mi i pulum mi blong gohed blong stadi Baebol wetem “niufala mama” blong mi. Pauline i soemaot lav, longfala tingting, kaen fasin, i intres long mi, mo oltaem hem i stap jekem mi blong meksua se mi oraet. Hem i tijim mi blong rid, mo i yusum Buk Blong Ol Baebol Stori blong givhan long mi blong save Papa ya we i lavem mi, mo we mi wantem tumas long laef blong mi.

 Mi glad tumas long ol samting we mi lanem long Baebol. Wan dei, mi askem long Pauline sipos mi save kam long miting ya Buk Stadi Blong Kongregesen, a we oli mekem long haos blong wan Witnes blong Jehova long nekis rod. Pauline i talem se mi save kam. Long nekis wik long Tusde, hem i kam long haos, mo i wet long mi blong mi swim mo jenis, blong mitufala i go long miting tugeta. Wan man i talem se Pauline i sud pem wan taksi blong mi, be mi ansa se: “Bae mi wokbaot long tufala pis wud ya we mi stap yusum oltaem.”

 Taem mitufala i aot long haos, mama blong mi mo ol neba oli wajem mitufala mo mi luk se oli stap wari. Taem mi stap krosem yad, sam neba oli kros, oli singaot strong long Pauline se: “!Yu yu stap fosem hem!”

 Long kaen fasin, Pauline i askem long mi se: “Jay, ?yu wantem kam?” Hemia stret taem blong soemaot se mi trastem Jehova. (Ol Proveb 3:5, 6) Mi talem se: “!Yes! Hemia desisen blong mi.” Ol neba oli no moa toktok, be oli gohed blong wajem mi mo taem mi kam klosap long get, oli jenisim fasin blong olgeta. Taem mi goaot long get, oli singaot long bigfala voes mo klapem han blong olgeta.

 !Mi laekem tumas miting ya, i mekem mi mi harem gud tumas! Evriwan oli welkamem mi. I no gat wan we i lukluk nogud long mi. Mi harem se mi stap wetem ol fren, ale mi stat blong go oltaem long miting. Smoltaem biaen, mi askem sipos mi save go long ol narafala miting long Haos Kingdom. Mi mi pua mo mi gat tu dres mo wan slipa nomo. Nating se i olsem, mi gat strong tingting se ol man blong God bambae oli no tanem baksaed long mi. Mo i tru, oli no mekem olsem.

 Blong kasem Haos Kingdom, mi mas kalkal go kasem en blong rod, nao mi singaot wan taksi blong tekem mi mi go long Haos Kingdom long botom blong hil. Long ples ya, ol brata oli karem mi long han blong olgeta, blong go insaed long Haos Kingdom.

 Mi harem se Jehova i gud tumas, mo mi wantem se hem i kam olsem ples blong haed blong mi. Ale mi mekem desisen blong kam oltaem long miting. (Ol Sam 34:8) Long ren taem, mi mas jenisim klos blong mi taem mi kasem Haos Kingdom, from we mi wetwet mo sofmad i kavremap mi. !Nating se i olsem, mi glad nomo!

 Stori blong mi i stap long 1985 Yearbook of Jehovah’s Witnesses. Wan Witnes long Swiselan we nem blong hem Josette, i ridim stori ya, nao hem i sanem wan wiljea long mi. Wiljea ya i olsem wan baskel we i gat tri wil mo mi save yusum tufala han blong mi blong tanem ol wil ya. I gat ol naes aean long ol wil blong blokem sofmad, mo ol kalakala laet biaen. Hemia i mekem se mi no moa sem blong wokbaot i go long ol ples. Ol pikinini oli stap talem se oli laekem blong luk mi mi ron long flas wiljea blong mi. Mi no moa kalkal long graon mo harem se mi nating nomo, be mi harem se mi wan kwin we ol narafala oli respektem mi.

 I isi blong mi mi kam klosap long Jehova, from we laef blong mi i klin finis mo i simpol. Wiljea blong mi i mekem se mi save joen long wok blong prij, mo long 9 Ogis 1986, mi mi baptaes. Baptaes i jenisim laef blong mi, i leftemap mi bitim samting we mi save tingbaot. Mi glad tumas, mi no moa harem se laef blong mi i blong nating nomo, mo mi gat strong tingting, from we naoia mi gat wan Papa we i lavem mi, mo ol fren we oli rili kea long mi.

 Mi stap lukaot wan rod blong talem tangkiu long Jehova. Mi tingbaot wok blong fultaem paenia, be mi no sua sipos mi naf blong mekem. (Ol Sam 116:12) Mi prea long Jehova mo mi mekem desisen blong traem. Long 1 Jenuware 1988, mi stat blong paenia mo mi stap gohed kasem tede. !Hemia wan bigfala blesing long mi! I gat ol brata mo sista we oli lavem mi mo oli halpem mi blong kasem mak blong paenia evri manis. Mo mi luk olsem wanem Jehova i yusum tabu spirit blong sapotem mi.—Ol Sam 89:21.

 From we mi mi paenia, mi stap muvmuv olbaot bitim bifo, mo hemia i givhan long tufala leg blong mi, nating se oli no strong gud. Afta we sam taem i pas, mi go long wan niufala klinik we mi hop se bambae i givhan long mi blong mekem ol eksasaes mo folem wan program. Be nes we i stap long klinik ya i talem long mi se mi westem taem blong kam, from we i no longtaem bambae mi ded. Taem narafala nes we i wok wetem hem i talem sem samting, tingting blong mi i foldaon. Ale mi kambak long haos mo mi prea long Jehova blong i halpem mi blong winim tingting ya we i foldaon, mo blong faenem tritmen we i save givhan long mi.

 Mi faenemaot se wok blong prij nao i beswan tritmen we mi save kasem. Taem mi stap prij, mi mekem plante eksasaes. Sam yia biaen, wan long tufala nes ya we i bin talem se i no longtaem bambae mi ded, i pas long Haos Kingdom mo i luk mi. !Hem i sapraes blong luk se mi laef yet!

 Nating se mi handikap, mi traehad blong gohed strong long wok blong Jehova. Ol brata oli talem ol gudfala toktok long mi from we mi wok strong mo mi kam eli long ol miting. Mi mekem olsem blong mi save talem halo long ol brata mo sista mo soemaot se mi kea long olgeta.

 Mi luksave olsem wanem Jehova i mekem i gud long mi mo mi kasem plante blesing long laef blong mi. Mi glad tumas blong halpem tri woman blong gohed go kasem we oli baptaes. Wan long olgeta, Amelia, i joen long klas namba 137 blong Gilead. !Mo tu, mi kasem wan nambawan blesing long Jehova taem mi gat janis blong mekem Skul Blong Paenia, i no wan taem nomo be bitim wan taem! Jehova i leftemap mi, i mekem mi mi glad, mi no moa harem se mi gud blong nating nomo, be mi gat strong tingting. Naoia ol narafala oli respektem mi, mo mi no moa stap sem. Mi gat ol gudfala fren long trutok, i no long ples blong mi nomo long Freetown, be long plante ples long kantri ya mo long fulwol.

 Klosap 40 yia finis mi kasem save long promes blong God se bambae i gat wan niufala wol we ol man we oli handikap bambae oli kam gud bakegen. Promes ya i gohed blong leftemap tingting blong mi mo mi wantem tumas blong luk we i kamtru. Mi glad blong wet from we mi save se God blong mi, Jehova, bambae i no let blong mekem promes ya i kamtru. (Maeka 7:7) From we mi glad blong wet, mi kasem plante blesing. Jehova i halpem mi blong stanap strong, nating se mi gat plante problem mo hadtaem. Mo tu, hem i givhan long mi long stret taem nomo. Mi glad tumas mo mi smael oltaem from we Jehova i leftemap mi long graon we bifo mi kalkal long hem, mo i givim ol blesing we mi neva ting se mi save kasem.