Mi mo bigfala sista mo brata blong mi, mitrifala i gruap long wan plantesen klosap long taon ya Bicester, long Yunaeted Kingdom. Papa mo mama blong mi i rentem wan smol haos long plantesen ya. Taem mi gat 19 yia, mi statem wok blong paenia, we bigfala sista mo brata blong mi i stap mekem finis. Biaen, mi go mekem wok blong spesel paenia long Skotlan. Long 1970, taem mi gat 23 yia, oli singaot mi mi go wok long Betel long London. Long ples ya, mi jes kasem save se i gat saen lanwis blong olgeta we sora i fas. Hemia i mekem se mi folem wan niufala rod long laef blong mi, we i givim bigfala glad mo plante blesing.

Lanem Saen Lanwis

 Taem mi stap long Betel, mi stap joen wetem kongregesen blong Mill Hill, mo long ples ya mi mitim sam Witnes we sora blong olgeta i fas. Mi no wantem se mi mi olsem wan strenja long olgeta from we mi no save toktok long olgeta. Taswe, mi mekemap tingting blong mi se long ol miting, bambae mi go sidaon wetem olgeta.

 Long taem ya, i no gat wan saen lanwis kongregesen long Briten. Olgeta we sora blong olgeta i fas, oli go long ol Inglis miting, nao sam brata mo sista we oli save harem ol tok, oli yusum ol saen blong tanem evri wod folem fasin blong toktok long Inglis. Be sloslo ol brata mo sista we sora blong olgeta i fas oli tijim mi long saen lanwis, mo mi luksave se i gat prapa fasin blong hem we i defren long Inglis. Long tingting blong olgeta, Inglis i olsem lanwis blong wan narafala kantri. Taem mi luksave samting ya, mi lavem mo respektem moa olgeta we oli stap kam oltaem long ol Kristin miting, nating se sora blong olgeta i fas. Mo tu, mi traehad moa blong lanem saen lanwis.

 Long Briten, olgeta we sora blong olgeta i fas oli yusum Saen Lanwis blong Briten o BSL. Sloslo, olgeta we oli tanem ol miting, oli lanem blong yusum prapa lanwis, i bitim we oli tanem evri wod folem fasin blong Inglis. From samting ya, olgeta we sora i fas, oli stat blong kasem save gud long ol miting. Mo tu, oli stat blong joen gud wetem ol brata mo sista we sora blong olgeta i no fas. Naoia, taem mi tingting bak long ol fifti yia we i pas, mi luksave olsem wanem Jehova i blesem bigwan ol wok long saed blong saen lanwis. Bambae mi tokbaot sam wok we Jehova i letem mi mi joen long olgeta.

Saen Lanwis i Kam Antap

 Long 1973, hemia samwe long wan yia afta we mi kam wan elda, Brata Michael Eagers we sora blong hem i fas, i talem se i gud sipos i gat sam miting long BSL. Branj ofis i agri se mi wetem wan narafala elda bambae mitufala i mekem program blong wan miting evri manis long saen lanwis, hemia long Deptford, long saot is blong London.

 !Evriwan oli sapraes! Plante Witnes we sora blong olgeta i fas oli kam long London mo ol narafala ples long saot is Inglan blong joen long faswan miting long BSL. Naoia ol brata mo sista we sora blong olgeta i fas, oli kasem save long Baebol long prapa lanwis blong olgeta. Afta we miting i finis, mifala i storian gud tugeta mo kakae smol. Mo tu, mi gat janis blong leftemap tingting blong plante brata mo sista we sora blong olgeta i fas.

 Biaen, oli statem ol miting long saen lanwis long Birmingham mo Sheffield. Plante brata mo sista we sora blong olgeta i no fas be oli wantem lanem BSL, oli kam long ol miting. Biaen, plante oli givhan blong mekem wok blong prij long saen lanwis i gohed long ol narafala ples long Inglan.

Mi Faenem Wan Gudfala Sista Blong Maredem

 Long 1974, mi mitim wan naesfala sista we i mekem wok blong spesel paenia long wan kongregesen klosap long Betel, nem blong hem Stella Barker. Sloslo, mitufala i lavlavem mitufala, mo long 1976 mitufala i mared. Biaen, mitufala i mekem wok blong spesel paenia long kongregesen blong Hackney, long Not London. Stella i joenem mi blong prij long olgeta we sora blong olgeta i fas. Naoia mi save talem se, wok ya blong paenia tugeta i nambawan rod blong statem mared blong mitufala.

 I no longtaem, oli askem long mi mo Stella blong kam wok sam dei evri wik long Betel. !Mitufala i bisi we! Sam samtaem mi tekem ples blong eria elda blong visitim ol kongregesen, mi tijim ol elda long Kingdom Ministri Skul, mo biaen, mi givhan blong mekem plan blong tanem ol bigfala asembli long Inglis oli go long saen lanwis. Long en blong evri dei, mitufala i taed be mitufala i harem gud.—Matiu 11:28-30.

 Long 1979 mo 1982, tufala boe blong mitufala i bon, nem blong tufala, Simon mo Mark. Mitufala i glad tumas, be hemia wan narafala bigfala wok bakegen. ?Olsem wanem mitufala i naf blong mekem evri samting? Taem mi stap go blong mekem ol defdefren wok longwe long ples blong mifala, mi mo Stella i luk se i gud blong ful famle i go mo tekem sam taem blong spel tu. !Mitufala i wantem se tufala boe blong mitufala i luksave se wok blong Jehova i givim bigfala glad! ?Olsem wanem? ?Samting ya i hapen? Yes. Taem tufala boe ya i stap kam bigwan moa, tufala i lanem saen lanwis mo tufala i stat long wok blong paenia. Samwe long 40 yia afta we papa mo mama blong mi i givim pikinini buluk blong i “wok long Betel,” Simon mo Mak tu i go wok long Betel. !Mitufala i glad bitim mak!

Lukaot Long Olgeta We Sora i Fas

 Kam kasem ol yia afta 1990, i no gat ol elda long Briten we sora blong olgeta i fas, i gat sam man blong givhan nomo. From samting ya, ol elda we sora blong olgeta i no fas mo oli no save saen lanwis, oli mas traem blong luksave sipos eniwan long ol brata we sora blong olgeta i fas, oli “naf blong tijim ol narafala” mo mekem wok blong elda long kongregesen. (1 Timoti 3:2) Wan man blong givhan we sora blong hem i fas, Bernard Austin, i stap long wan Inglis kongregesen. Ol narafala oli respektem bigwan brata ya, from we hem i rili lavem ol sipsip blong Jehova. Mi glad tumas taem mi harem nius ya se Bernard i kam wan elda. !Hem i faswan brata we sora blong hem i fas, we i kam wan elda long Briten!

 Long 1996, wan impoten samting i hapen. Branj ofis i agri blong gat faswan kongregesen long saen lanwis long Briten, hemia long Ealing, long Wes London. Biaen wok i kam antap bigwan.

Oli Kasem Ol Gudfala Samting Long Olgeta Miting Mo Asembli

 Long ol yia afta 1980 mo 1990, mi givhan long Sevis Dipatmen long Betel, be mi stap mekem wok ya long haos nomo. Mi ansarem ol kwestin we samfala oli askem long saed blong wok blong prij long saen lanwis. Sam brata oli raet long branj ofis blong askem olsem wanem oli save givhan long olgeta we sora i fas blong oli kasem save long ol miting mo asembli long Inglis. Fastaem, i no gat wan brata o sista we i tanem ol tok long ol miting mo asembli i go long saen lanwis, mo i no gat ol buk tu we oli tanem i go long saen lanwis. Taswe plante taem mi talem long ol brata mo sista we sora i fas mo olgeta we sora i no fas tu, se oli mas gat longfala tingting mo wet long Jehova.

 !Jehova i blesem longfala tingting blong evriwan! I no longtaem, branj ofis i mekem plan blong samfala we oli toktok saen lanwis, oli tanem ol Inglis miting mo asembli. Antap long hemia, olgeta we sora i fas oli sidaon long ol faswan laen blong jea. Long ples ya, oli save luk klia brata we i givim tok mo hemia we i tanem i kam long saen lanwis. Naoia ol brata mo sista we sora blong olgeta i fas oli harem se Jehova i rili lavem olgeta, mo se oli ol sas memba blong famle blong hem.

 Long 1 Eprel 1995, i gat faswan wan dei asembli long saen lanwis, long Haos Asembli long Dudley long Wes Midlands. Mi mi givhan long Brata David Merry, we i wan eria elda bifo, blong rerem asembli ya. Sam Witnes we sora i fas oli kam long ol ples we oli stap plante handred kilometa longwe, olsem Skotlan long not mo Cornwall long saot wes. Mi tingbaot yet olsem wanem evriwan oli glad, taem i gat bitim 1,000 man long spesel asembli ya.

 Long 2001, branj ofis i askem long mi mo Brata Merry blong rerem wan bigfala asembli long BSL long yia 2002. !Hemia wan bigfala wok! Be Jehova i blesem hadwok blong plante we oli rere blong givim taem mo paoa blong olgeta fri nomo, nao asembli ya i rongud mo plante brata mo sista oli neva fogetem asembli ya. Blong plante yia, mi gat blesing ya blong givhan blong rerem ol asembli long saen lanwis, go kasem we Jehova i yusum sam brata we oli yangfala moa, mo oli naf blong mekem wok ya.

Ol Video Blong Olgeta We Sora i Fas

 Long 1998, mifala i glad tumas taem oganaesesen blong Jehova i tanem faswan buk i go long BSL, hemia ?Wanem Samting We God i Wantem Yumi Blong Mekem?—Long Video. Ol brata mo sista oli yusum video ya blong mekem plante Baebol stadi.

 Long bigfala asembli long 2002, hemia faswan taem we oli tanem ol singsing blong Kingdom i go long BSL. Naoia, ol brata mo sista we sora blong olgeta i fas oli save “singsing” ol naesfala toktok wetem transleta, mo folem bit blong miusik ya. Hemia i tajem hat blong olgeta. Mi tingbaot yet wan elda we sora blong hem i fas, we i krae from glad taem hem i “singsing” long asembli ya.

 I gat wan narafala niufala samting long bigfala asembli ya long 2002. Oli askem long Saen Lanwis kongregesen long London blong mekem wan drama we oli rikodem long kaset. Be mifala i neva mekem bifo. ?Olsem wanem bambae mifala i mekem samting ya? Bakegen Jehova i givhan long mifala. Hem i halpem mifala blong faenem ol brata we oli save olsem wanem blong wokem mo jekem ol muvi. !Drama ya i nambawan! Mo tu, long 2003 kasem 2008, mifala i yusum bakegen ol samting we mifala i lanem, taem mi lukaot long wok long Betel blong mekem ol drama blong ol bigfala asembli long BSL.

 Mi mo Stella i laekem tumas blong stap long Betel wetem tufala boe blong mitufala. !Be wok ya i had! Afta we mifala i lanem drama blong plante wik mo meksua se ol haf oli folem stret taem blong olgeta, tim we i aktem mo wokem ol muvi ya i taed long bodi mo tingting. Nating se i olsem, taem mifala i luk ol stori blong Baebol long saen lanwis, mifala i glad bitim mak. Plante brata mo sista we sora blong olgeta i fas, oli krae taem oli luk ol muvi ya.

 Jehova i gohed nomo blong givim ol presen long mifala. Long 2015, mifala i kasem Wajtaoa blong stadi, long video long BSL. Long 2019, buk blong Matiu long Baebol i kamaot. Naoia, mifala i gat Kristin Grik haf blong Baebol fulwan, mo oli stap wokem Hibru haf. Ol brata mo sista we sora blong olgeta i fas oli talem bigfala tangkiu long Jehova from.

 Ol man blong Jehova oli olsem wan bigfala famle we i soemaot fasin blong Papa blong yumi long heven. Hem i lavem ol man mo i stap mekem i sem mak long olgeta. (Wok 10:34, 35) Mi mo famle blong mi i sapraes oltaem long hamas taem, paoa, mo mane we oganaesesen i yusum blong halpem olgeta kaen man. Hemia i minim tu ol man we sora blong olgeta i fas mo ol blaen man. a

 Ol hadwok ya i no blong nating nomo, from we naoia i gat samwe long seven BSL kongregesen long Briten. Mi mi glad tumas se mi gat janis blong stap taem wok ya i “jes stat,” mo mi luk olsem wanem i kam antap. (Sekaraea 4:10) Yumi presem Jehova from. Hem nao i lidim oganaesesen blong hem. Hem nao i givim evri samting we ol man blong hem oli nidim blong talemaot gud nius long olkaen man. Mo hem nao i mekem sid blong trutok blong Kingdom i gru long hat blong ol man we oli stret blong kasem trutok.