Sam yia nomo afta we famle blong mifala i muv i go long taon ya Roodepoort long Saot Afrika, papa blong mi i ded. Long 1947, mi mi gat 16 yia, mo blong givhan long famle, mi stap wok fultaem long ofis blong gavman long saed blong telefon. Wan dei, taem mi stap long haos, wan olfala man i noknok long doa, mo i askem long mifala sipos mifala i wantem se oli sanem Wajtaoa magasin long mifala evri taem we i gat wan niuwan i kamaot. Mifala i agri, from we mifala i sore long olfala ya.

 Be i no longtaem, mifala i stat blong intres long Baebol, mo mifala i wantem kasem save moa. Taem mama blong mi i yangfala, hem i go long Daj Refom Jos, be hem i luksave se ol tijing blong Baebol oli defren long samting we jos i tijim. Mifala i agri blong stadi Baebol, mo i no longtaem, mifala i stat blong go long ol miting blong kongregesen. Long 1949, mi mi faswan long famle blong baptaes. Mi gohed blong wok blong sam yia, be mi wantem mekem moa long wok blong Jehova.

 Long 1954, mi kam wan fultaem paenia mo mi askem long branj ofis blong Saot Afrika weples i nidim moa man blong prij. Branj ofis i talem taon ya Pretoria, mo oli mekem plan blong wan narafala paenia sista i joenem mi long ples ya. Mitufala i faenem wan gudfala ples blong stap long hem, mo mi tingbaot yet ol naes gato wit [koeksisters] we oli salem long stoa klosap, wetem swit jam blong olgeta.

 Biaen, sista we mi paenia wetem hem i mared, ale Brata George Phillips, we i lukaot long branj ofis, i askem sipos mi wantem kam wan spesel paenia. Mi glad blong akseptem wok ya.

 Long 1955, mi stat long wok blong spesel paenia long taon ya Harrismith. I had blong mi mo sista we mi paenia wetem, i stap longtaem long wan haos. Wan taem, ol lida blong jos oli fosem woman we i ona blong haos we mitufala i stap long hem, blong aotem mitufala, from we oli faenemaot se mitufala i Witnes.

 Biaen, oli askem long mi blong go long Parkhurst long Johannesburg. Tu misinari sista i kam joenem mi long ples ya. Biaen, wan long tufala i mared, mo narawan i muv i go long narafala ples. Wan gudfala sista we nem blong hem Eileen Porter, i tekem mi mi go stap wetem hem mo famle blong hem, nating se haos blong olgeta i smol. Mi slip long wan smol spes we oli pulum kaliko blong blokem hem long ol narafala rum long haos. Eileen i kaen tumas mo oltaem hem i leftemap tingting blong mi. Mi harem gud blong stap long haos blong hem. Mi laekem hem tumas from we hem i wok strong long trutok, nating se hem i gat plante narafala wok tu long famle.

 I no longtaem, oli askem long mi blong go long Not Aliwal, wan taon long provins blong Isten Kep. Long ples ya, mi wok wetem sista Merlene (Merle) Laurens. Mitufala i gat samwe long 20 yia nomo, be eksampol blong olfala sista Dorothy i givhan bigwan long mitufala. Mitufala i singaot hem se Anti Dot. Taem hem i yangfala, sam dog oli atakem hem taem hem i stap prij, be samting ya i no mekem hem i kam slak.

 Long 1956, Merle i go joen long namba 28 klas blong Gilead. !Mi wantem tumas blong go wetem hem! Be Anti Dot i lukaot gud long mi, mo mitufala i fren gud, nating se hem i gat 50 yia moa i bitim mi.

 !Traem tingbaot glad blong mi taem oli singaot mi blong go long Skul Blong Gilead, olsem Merle! Bifo we mi go, mi spenem eit manis long taon ya Nigel, mo mi wok wetem Kathy Cooke, wan sista we i tren finis long Gilead. Kathy i tokbaot Gilead long fasin we i mekem se mi wantem tumas blong go, ale long Jenuware 1958, mi aot blong go long New York.

 Long Gilead, mi serem wan rum wetem Tia Aluni we i kam long Samoa, mo Ivy Kawhe, wan Maori sista. Taem mi stap long Saot Afrika, gavman i seraotem ol waetman long ol blakman, taswe i wan spesel samting blong stap long sem rum wetem tufala sista ya. Kwiktaem nomo mi laekem tufala, mo mi glad blong stap long wan klas blong ol brata mo sista we oli kam long ol defren ples long wol.

 Brata Maxwell Friend i wan tija blong Gilead. Mo samtaem hem i givim trening we i strong. I gat tri laet long klasrum blong hem, nem blong trifala se “Voes,” “Spid,” mo “Paoa.” Taem studen i stap givim tok o mekem wan pleplei, Brata Friend i onem laet we hem i ting se studen i mas kamgud moa long hem. Plante taem, hem i onem wan long ol laet ya taem mi mi stap mekem wan haf, mo from we mi wan woman blong sem, !mi stat blong krae! Nating se i olsem, mi laekem Brata Friend. Taem i no gat klas mo mi stap mekem wok blong klinim ol samting, samtaem hem i karem wan kap kofi i kam long mi.

 Taem ol manis oli stap pas, mi stat blong tingbaot weples bambae oli sanem mi afta long Gilead. Merle, we mi paenia wetem hem bifo, i finisim trening blong hem long Gilead mo oli sanem hem i go long Peru. Merle i talem long mi blong askem long Brata Nathan Knorr, we i lidim wok long taem ya, sipos mi save joenem hem, from we sista we i stap wok wetem hem bambae i mared. Sam samtaem Brata Knorr i visitim klas blong Gilead, taswe mi gat janis blong toktok wetem hem. Taem skul ya i finis, !oli sanem mi mi go long Peru!

 !Mi glad tumas blong joen bakegen wetem Merle long Lima, Peru! Kwiktaem nomo, mi statem sam Baebol stadi we oli gohed gud, nating se mi stap lanem Spanis nomo. Biaen, oli sanem mi mo Merle i go long Ayacucho, we i stap antap long ol hil. Mi talem stret se hemia wan had ples. Mi save smol Spanis, be plante man long ples ya oli toktok lanwis Quechua nomo. Mo tu, i tekem taem blong lan long ples we i antap, from we i no gat plante oksijen long win.

 Mi harem se wok blong mi long Ayacucho i no karem plante frut, mo mi stap tingbaot sipos bambae i gat plante man we oli akseptem trutok long eria ya long fiuja o nogat. Be tede, i gat bitim 700 pablisa long taon ya wetem wan translesen ofis blong lanwis Quechua (Ayacucho).

 Biaen, Merle i maredem wan eria elda we nem blong hem Ramón Castillo, mo long 1964, Ramón i go long wan kos blong 10 manis long Gilead. Long klas blong hem, i gat wan yangfala brata we nem blong hem Fu-lone Liang. Brata ya i bin stap long sem klas blong Gilead we mi mi stap long hem. Oli sanem hem i go long Hong Kong, be oli askem long hem blong kambak long Gilead blong kasem moa trening from ol wok blong hem long branj ofis. a Fu-lone i askem long Ramón sipos mi stap gohed gud long Peru, mo biaen, hem i raetem leta long mi mo mi mi raetbak.

 Smoltaem biaen, Fu-lone i soemaot klia se mitufala i stap fren from se mitufala i stap raetem leta long mitufala. Wan narafala misinari, Harold King, i stap long Hong Kong wetem Fu-lone, mo Harold i stap go oltaem long postofis. Hem i agri blong karem ol leta blong Fu-lone blong postem. Harold i droem ol smol pija mo raetem smol not long envlop blong ol leta we Fu-lone i raetem long mi, ol mesej olsem: “!Bae mi traem pulum hem blong raet moa!”

 Afta we mitufala i raet blong 18 manis, mi mo Fu-lone i mekem desisen blong mared, ale, mi lego Peru we mi bin stap long hem samwe long seven yia.

 Long 17 Novemba 1965, mitufala i mared. Mi laekem niufala laef blong mi long Hong Kong. Mi stap long branj ofis wetem hasban blong mi mo tu narafala kapol. Fu-lone i mekem wok blong translesen long branj ofis mo mi mi go prij. I had blong lanem lanwis ya Kantonis, be ol narafala misinari sista mo gudfala hasban blong mi oli halpem mi. Mi harem gud blong mekem ol Baebol stadi wetem ol pikinini, from oli halpem mi blong no fraet tumas taem mi stap lanem lanwis ya.

 Afta we sam yia i pas, mi mo Fu-lone i muv i go long wan haos blong ol misinari long Kwun Tong, wan narafala haf blong Hong Kong. Long ples ya, Fu-lone i tijim ol niufala misinari blong toktok lanwis Kantonis. b Mi laekem tumas wok blong prij long eria ya. !Evri dei, mi wantem gohed nomo, mi no wantem gohom!

 Long 1968, mi glad tumas blong kasem niufala buk ya blong stadi, Trutok Blong Soemaot Rod Blong Itenel Laef. Hem i isi moa long ol studen we oli no save nating Baebol mo Kristin jos, i bitim buk ya “Let God Be True.”

 Be mi mi gat rong tingting, mi ting se taem ol studen oli givim stret ansa long ol kwestin long buk, oli stap soemaot se oli bilif long trutok. Wan studen we mi finisim ful Trutok buk wetem hem, i talem long mi se, !hem i no bilif yet long God! Mi kasem save se mi mas toktok moa wetem ol studen, blong faenemaot tingting blong olgeta long ol samting we oli stap lanem.

 Mitufala i stap sam yia long Kwun Tong, mo afta, mitufala i muv i gobak long branj ofis. Nao Fu-lone i kam wan memba blong Hong Kong Branj Komiti. Blong plante yia, mi givhan blong klinim ples mo mi wok long ofis we ol visita oli kam long hem. Sam samtaem Fu-lone i mas mekem trip i go long sam ples we mi no save go wetem hem, be mi mi glad blong sapotem hem taem hem i gohed blong mekem wok blong hem.

 Long 2008, i gat wan jenis long laef blong mi we mi no tingbaot nating. Gudfala hasban blong mi i ded long wan trip we hem i mekem, smoltaem bifo long Memoriol blong ded blong Jisas. Mi mi harem nogud bitim mak. Kwiktaem nomo ol brata mo sista oli kam blong sapotem mi. Long Memoriol, mi givhan long wan studen blong faenem ol vas we brata i ridim nao hemia i blokem mi blong mi no krae. Wan vas we Fu-lone i laekem tumas i givim paoa long mi, i se: “Mi, Jehova God blong yu, mi stap holem raethan blong yu, . . . ‘Mi bambae mi halpem yu.’”—Aesea 41:13.

 Seven yia afta we Fu-lone i ded, ol brata long Hong Kong oli ting se i gud we mi muv i go long wan branj ofis we i bigwan moa, mo mi save kasem moa help wetem helt blong mi. Ale long 2015, mi muv i go long branj ofis blong Saot Afrika, hemia i klosap long ples we mi lanem trutok long 1947.

 Mi spenem plante gudfala yia long wok blong Jehova, mo mi harem se Jehova i blesem mi from we mi rere oltaem blong folem samting we hem i wantem. Sam samtaem mi kasem nius long samfala we mi bin stadi wetem olgeta, mo mi glad se oli stap holemstrong long Jehova. Mo tu, mi luk olsem wanem Jehova i blesem ol smosmol samting we mi mekem blong givhan long wok blong prij. Wan eksampol: Long 1958 i gat 760 pablisa long Peru, be namba ya i gru i kam 133,000 long 2021. Mo tu, long 1965, i gat samwe long 230 pablisa long Hong Kong, be long 2021 i gat 5,565.

 Naoia mi mi olfala, mo mi no moa save mekem plante wok olsem bifo. Be mi rere yet blong mekem samting we Jehova i wantem, mo mi wantem holemtaet fasin ya go kasem niufala wol. Long taem ya, bambae i nidim plante man we oli rere blong wok, mo mi bambae mi talem se: “Mi mi glad nomo blong go.”