Long 2021 sevis yia, a ol brata mo sista long fulwol oli safa from COVID-19 pandemik. Olsem haf ya “Halpem Ol Brata Mo Sista Long Fulwol Long Taem Blong Pandemik” i eksplenem, mifala i spenem plante milian vatu b mo stanemap 950 Disasta Rilif Komiti, blong halpem ol brata mo sista long taem blong pandemik.

 Taem pandemik i stap mekem ol man oli safa, i gat sam narafala disasta tu we oli spolem plante brata mo sista raon long wol. Komiti Blong Ol Kodineta Blong Hed Kampani i agri blong spenem bitim 900 milian vatu blong givhan long olgeta we oli safa long moa long 200 defren disasta, hemia antap long mane we oli yusum blong givhan long ol brata mo sista long taem blong COVID-19. Traem luk olsem wanem mifala i yusum presen mane blong yu long tu disasta we oli hapen i no longtaem.

 Long 22 Mei 2021, hil ya Nyiragongo, we i wan volkeno long Demokratik Ripablik blong Kongo, i bosta. Faea blong hem i ron i go spolem ol haos, ol skul, mo wan bigfala tang wota we i saplae blong taon. Be i no hemia nomo we i denja. Asis blong volkeno i stap foldaon long taon blong Goma blong plante dei afta we volkeno i bosta, mo graon i stap seksek bakegen mo bakegen. Gavman i givim oda long bighaf blong ol man long taon ya blong oli muvaot. Plante handred taosen man oli ronwe, samfala oli krosem boda i go long Ruwanda.

 I gat samwe long 5,000 Witnes blong Jehova tu we oli mas ronwe. Faea blong volkeno i spolem haos blong samfala, mo sam narafala, ol man oli stilim olting blong olgeta afta we oli ronwe. Tufala disasta rilif komiti long Ruwanda mo Demokratik Ripablik blong Kongo oli wok tugeta blong givhan long olgeta we oli nidim help. Long saed blong wan rilif komiti, branj ofis blong Kongo (Kinshasa) i talem se: “Nating se ol man oli panik mo evri samting i olbaot long taon ya, be komiti i stat blong sanem kakae, wota, ol matres, mo klos, bifo we gavman i givim oda blong ol man oli aot.” Long wan taon we bitim 2,000 brata mo sista oli hivap, wan rilif komiti i putumap ol tent, givimaot ol mask, mo eksplenem olsem wanem blong lukaot gud blong no kasem COVID-19 mo kolera.

 Long ol tri manis afta long disasta, ol brata oli givimaot bitim sikis tan blong raes, sikis tan blong flaoa blong kon, tri tan blong oel blong kuk, mo tri tan blong wota. Blong daonem praes blong kakae, branj ofis i pem plante wantaem, mo oli pem long kantri ya nomo i bitim we oli odarem ol sas kakae long narafala kantri.

 Wan sista we volkeno i spolem haos blong hem, i talem se: “Mifala i harem nogud tumas mo tingting i foldaon.” Be smoltaem afta, famle blong hem i kasem ol samting we oli nidim long saed blong bodi, mo gudfala toktok blong givhan long bilif blong olgeta. Afta, hem i talem se: “From we Jehova i givhan long mifala, mifala i gat evri samting we mifala i nidim. Mifala i luk we Jehova i karem baden blong mifala, mo i mekem i isi moa blong stanap strong.”

 Blong plante yia finis, Veneswela i gat bigfala trabol long saed blong ekonomi. Laef blong ol brata mo sista i had, oli sot long kakae, mo raf fasin i kam antap. Be oganaesesen blong Jehova i no lego olgeta.

 Long sevis yia we i pas, oganaesesen i spenem bitim 170 milian vatu blong pem mo sanem ol kakae mo sop, long ol famle we oli nidim. Branj ofis blong Veneswela i talem se: “I no isi nating blong karem 130 tan blong kakae i go long olgeta ples long kantri ya evri manis, mo givimaot long ol brata we oli nidim.” Plante taem ol brata oli sanem ol kakae we i save stap longtaem, olsem nao, kakae i no save roten. Branj ofis i gohed i se: “Mifala i pem plante kakae wantaem, mo pem ol kakae we i stret sisen blong hem, mo mifala i pem long taem we praes i daon. Afta, mifala i yusum rod we i no sas tumas blong sanem i go.”

 Leonel, we i wok long Disasta Rilif Komiti long Veneswela, i laekem tumas wok blong hem. Hem i talem se: “Rilif wok hem i spesel. Spesel wok ya i rili leftemap tingting blong mi afta we gudfala waef blong mi i ded from COVID-19. Mi stap bisi oltaem, mo mi harem se ol brata oli nidim mi blong givhan long olgeta. Mi luk wetem prapa ae blong mi olsem wanem Jehova i holem promes blong hem blong no lego ol man blong hem.”

 Wan brata we i kasem help, i bin wok long wan rilif komiti bifo. Hem i talem se: “Naoia i taem blong mi mi kasem help. Mifala i kasem ol samting we mifala i nidim long saed blong bodi, be i no hemia nomo. Ol brata oli halpem mi mo waef blong mi blong gat kwaet tingting. Oli lukaot gud long mifala, kamfotem mifala, mo leftemap tingting blong mifala.”

 Samtaem i no gat taem blong kasem woning bifo long disasta. Be oganaesesen blong Jehova i wok kwik nomo blong kasem mo sanem olting. Oli save mekem samting ya nomo from presen mane we yufala i givim blong sapotem wok long fulwol, long ol rod we donate.pr418.com i tokbaot. Tangkiu tumas from presen mane we yufala i givim long gladhat blong yufala.