Baebol i talemaot se long taem blong yumi, bambae i gat ol wo, ol etkwek, ol strong sik, mo ‘plante samting we i mekem yumi fraet.’ (Luk 21:10, 11) Profet tok ya i kamtru long 2022 sevis yia. a Wo i gohed long Yukren, mo i jenisim laef blong plante milian man. Long semtaem, COVID-19 i gohed long plante ples long wol. Antap long ol samting ya, ol disasta oli spolem plante plante man, olsem ol etkwek long Haiti, ol hariken mo bigfala ren long Sentrol Amerika, Filipin, mo saotis Afrika. ?Olsem wanem ol Witnes blong Jehova oli givhan long ol man we oli safa?

 !Long 2022 sevis yia, oganaesesen i givhan long 200 ples we disasta i spolem! Oli spenem bitim 1,426,000,000 vatu long disasta rilif. b Traem tingbaot olsem wanem oli yusum ol presen mane long taem blong tu disasta.

 Long 14 Ogis 2021, wan bigfala etkwek we oli makem saes blong hem se 7.2, i kilim saot Haiti. Sore tumas, tri Witnes i ded, hemia tu sista mo wan brata. Olgeta we oli laef oli traehad blong winim ol trabol we etkwek i mekem long bodi mo filing blong olgeta. Wan brata we nem blong hem Stephane, i talem se: “Plante plante man oli ded long taon ya, mekem se bitim tu manis oli berem plante man evri wik.” Wan narafala brata we nem blong hem Éliézer, i talem se: “Plante Witnes oli no moa gat haos, klos, sus, mo ol narafala samting we oli nidim blong laef. Ol man oli fraet blong plante manis, from we graon i gohed blong seksek.”

 Oganaesesen blong ol Witnes i kwik blong givhan. Branj ofis blong Haiti i givimaot 53 tan kakae, wetem ol tent, tapolen, matres, mo ol jaja blong mobaelfon we oli wok wetem san. Mo tu, long 2022 sevis yia, ol brata oli bildim mo riperem bitim 100 haos. Oli spenem bitim 118 milian vatu long disasta rilif.

 Ol brata mo sista oli talem bigfala tangkiu from. Lorette i talem se: “Etkwek i spolem haos mo bisnes blong mifala fulwan. Mifala i no moa gat kakae. Be oganaesesen blong Jehova i givhan long mifala, i givim evri samting we mifala i nidim.” Micheline i talem se: “Etkwek i spolem rafraf haos we mi mo tufala boe blong mi i stap long hem. Mi no save wanem blong mekem, mi prea nomo blong kasem help, mo Jehova i yusum oganaesesen blong hem blong ansarem prea ya. Naoia mifala i gat wan strong haos blong stap long hem. Mi gat strong tingting blong mekem evri samting we mi naf blong mekem, blong soemaot tangkiu long Jehova.”

 Ol impoten man long taon oli luk bigfala wok we ol Witnes oli mekem. Daerekta blong taon hol blong L’Asile i talem se: “Mi talem bigfala tangkiu long yufala from we yufala i kwik blong kam givhan. Mi presem yufala from we yufala i soemaot respek long ol bigman blong taon. Mi glad blong luk se yufala i no askem mane. Yufala i wantem halpem ol man nomo. Lav nao i pusum yufala.”

 Long 24 Jenuware 2022, hariken Ana i kilim Mosambik mo i muv i go long wes go kasem Malawi. I gat bigfala ren wetem strong win we i olsem 100 kilometa long wan aoa. Hem i daonem ol pos laet mo rop blong lektrik, i brebrekem ol brij, mo bigfala wota i ron olbaot.

 Hariken ya i spolem ol samting blong bitim 30,000 Witnes long Malawi mo Mosambik. Charles, we i givhan long disasta rilif, i talem se: “Taem mi luk olsem wanem ol brata mo sista oli safa mo lusum plante samting, hat blong mi i hevi mo mi harem se mi no naf blong halpem olgeta.” Mowas, hariken ya i spolem gud ol garen blong olgeta. Plante oli lusum haos blong olgeta. Sore tumas, wan brata i lusum waef mo tu smol gel blong hem, taem bot we i sevem olgeta i kafsaed.

 Ol man oli fraet tumas long hariken ya. Long taon ya Nchalo long Malawi, long wan klok long moning, famle Sengeredo i harem noes blong wota we i ron strong nao oli fraet tumas. !Tu reva i brok mo wota i ron olbaot! Brata Sengeredo i talem long famle se oli mas aot long haos. Hemia wan waes desisen from we i no longtaem, bigfala wota ya i brebrekem haos blong olgeta. Wota i spolem ol samting blong olgeta mo oli lusum plante samting. Famle ya i wantem go haed long Haos Kingdom. Oltaem i tekem 30 minit blong oli wokbaot kasem Haos Kingdom, be long dei ya i tekem tu aoa. Taem oli kamtru long Haos Kingdom, oli wetwet evriwan mo oli taed tumas, be oli sef.

 Branj ofis blong Malawi mo Mosambik i statem disasta rilif kwiktaem. Oli talem long ol eria elda mo ol elda long kongregesen blong oli faenemaot nid blong ol brata mo sista, mo leftemap tingting blong olgeta. Oli askem long plante Disasta Rilif Komiti (DRK) blong lukaot long wok blong givhan long ol brata mo sista, mo ol komiti ya oli kwik blong karem ol kakae mo ol narafala samting i go long olgeta. Oli spenem bitim fo milian vatu blong pem ol samting we ol brata mo sista oli nidim, mo bitim 35,413,000 vatu blong riperem mo wokem bakegen ol haos.

 Ol DRK oli yusum gud ol presen mane, mo hemia i impoten from we praes blong evri samting i go antap. Long ol seven manis afta we oli statem disasta rilif, praes blong flaoa blong kon we ol man Malawi oli yusum evri dei, i go antap 70 pesen. Praes blong bensin i go antap tu. Blong sevem mane, ol brata oli pem bigfala amaon blong kakae wantaem mo ol samting blong bildim haos, mo oli pem long Malawi nomo. From samting ya, ol kampani oli katem praes, mo oli no nid blong pem bigfala mane blong transpot.

 Disasta rilif i tajem hat blong ol man blong Jehova. Wan brata blong Malawi we nem blong hem Felisberto, i talem se: “Mi neva luk wan oganaesesen we i givim plante samting olsem: ol samting blong wokem haos, transpot, ol wokman blong bildim haos, kakae, mo gudfala advaes. Wok ya i nambawan eksampol blong lav we Jisas i tokbaot long Jon 13:34, 35.” Ester, wan wido long Malawi we i lusum haos blong hem, i talem se: “Mi no save wanem blong mekem from we mi no gat mane blong bildim wan narafala haos. Taswe taem ol brata oli kam mo bildim wan haos blong mi, mi harem se mi stap long Paradaes.”

 Taem yumi stap kam klosap moa long niufala wol, yumi save se bambae i gat plante moa disasta. (Matiu 24:7, 8) Nating se i olsem, from ol presen mane we yufala i givim long gladhat, yumi save se ol man blong Jehova bambae oli kasem samting we oli nidim. Yu save luk ol defren rod blong givim presen mane long donate.pr418.com. Tangkiu tumas from presen mane we yufala i givim long gladhat.