Long yia ya, wan long ol samting we ol Witnes blong Jehova oli glad tumas from, hemia Episod 1 blong Gud Nius Blong Jisas. Plante milian man oli luk video ya finis. !Mo hemia i wan nomo long ol 18 episod we bambae i kam! ?Ol brata oli mekem wanem blong yumi save wajem video seri ya? ?Mo olsem wanem yu sapotem wok blong olgeta?

 Long branj ofis long Ostrelesia, hemia nao ples we oli rikodem bighaf blong video ya Gud Nius Blong Jisas, i gat samwe 50 kasem 80 man i stap, taem oli rikodem ol wanwan haf blong video ya. a Mo i gat ol brata mo sista we oli stap blong rerem kakae blong lanj, sapa, mo ol smosmol kakae blong ol akta mo olgeta we oli stap rikodem video. Ol brata oli mekem plan longtaem finis se bambae oli kakae wanem long taem ya. Esther, we i wok long Dipatmen Blong Lukaot Long Kakae i talem se: “Mifala i pem kakae long ol defdefren kampani, olsem nao mifala i save kasem ol gudfala kakae long ol praes we i stret. Mo tu, mifala i yusum gud ol samting ya blong mekem ol defdefren kakae, olsem nao mifala i no westem.” Evri dei, mifala i spenem klosap fo dola (U.S.) blong pem kakae blong wan man.

 Ol akta mo olgeta we oli stap rikodem video oli no nidim kakae nomo, be oli nidim blong stap sef tu. ?Stap sef long wanem? Long Ostrelia, ples i wom from i gat san, be laet blong san i denja tumas. Taswe, blong protektem evriwan long hot blong san ya, ol brata mo sista oli stanemap ol tent blong oli save haed long hem. Mo tu, oli meksua se i gat naf krim blong san, ambrela, mo wota blong dring. Kevin, we i wok long Odio Video Sevis, i talem se: “Plante long ol brata mo sista we oli kam givhan long ol wok ya, hemia olgeta we oli stap go wok sam dei long Betel. Olgeta oli glad nomo blong mekem wok ya mo plante narafala wok bakegen. Mifala i no save finisim projek ya sipos olgeta oli no bin givhan long mifala.”

 Sam haf blong video ya bambae i no luk ril, sipos oli rikodem biaen long wan ples long branj ofis o long studio. Long taem olsem, oli mas go long wan narafala ples blong rikod. Blong rikodem ol haf we i soemaot ol taem long Baebol bifo we i no gat ol rop blong laet, kolta rod, mo ol gudfala haos o bilding, oli mas go long ol ples we i stap longwe. From samting ya, oli mas rerem ol klos blong ol akta, ol samting blong aktem video, ol tul blong rikodem video, tekem i go long ol ples ya, mo meksua se oli stap gud. Bifo we oli stat blong rikod, brata we i givhan blong lukaot long ol wok ya bambae i meksua se i gat jenereta, klin wota blong dring, mo ol toelet we oli save yusum. Ol akta mo olgeta we oli stap rikodem video ya, oli slip long haos blong ol lokol brata mo sista, long ol haos we trak i pulum, long ol hotel o long ol gest haos.

 I sas blong go mekem rikoding long ol ples olsem, i tekem plante taem, mo i mekem evriwan we oli joen long projek ya oli taet. Taswe long 2023, Hed Kampani i agri blong oli save pem wan bigfala skrin we saes blong hem i olsem wol blong wan bigfala haos, mo praes blong hem i 2.5-million-dollar (U.S.). Long bigfala skrin ya, i gat ol video we i soemaot ol defren bakgraon, we i mekem se taem oli rikodem ol haf blong video long ples ya, hemia bambae i luk olsem se yu stap long wan narafala ples. Bigfala skrin ya i mekem se ol pija oli klia gud, mo ol brata oli mekem se ol laet we oli stap raonabaot oli stret gud wetem pija we i stap long skrin, blong mekem i luk olsem se oli bin tekem video ya long wan narafala ples. From samting ya, mifala i no spenem tumas mane blong go rikod long ol narafala ples. Darren, wan memba blong Branj Komiti Blong Ostrelia, i talem se: “Naoia we mifala i gat ol defren bakgraon long bigfala skrin ya blong rikodem ol video, hemia i mekem se ol akta oli no taet tumas, mo ol brata oli save rikodem sam haf blong wan video bakegen mo bakegen sipos i nidim. Eksampol, sipos mifala i rikod aotsaed, mifala i gat sam minit nomo blong rikodem san we i stap godaon, from we smoltaem afta san i godaon. Be wetem bigfala skrin ya, mifala i wokem wan video blong san we i stap godaon, mo mifala i save ripitim video ya plante taem, mo mekem ol rikoding blong mifala kasem we mifala i glad long haf blong video we mifala i rikodem.”

 I nidim plante moa akta mo ol man blong rikodem wanwan episod blong video seri ya Gud Nius Blong Jisas. ?Wanem filing blong ol akta ya long ol traehad we ol brata mo sista oli mekem blong lukaot gud long olgeta?

 Amber, we i travel blong bitim 700 kilometa stat long haos blong hem long Melbourne blong joen long projek ya, i raetem se: “Taem mi kasem epot, ol brata long Betel oli lukaot gud long mi. Plante Betelaet oli invaetem mi blong kakae o drong ti wetem olgeta. Mo long taem blong rikoding, evriwan oli mekem mi haremsave se oli lavem mi mo mi no fraet. Long trip blong mi, mi kasem fulap blesing. !Mi harem olsem se samting we mi mekem i no naf nomo!”

 Derek we i joen long wok blong mekem ol video ya, i talem se: “Plante dipatmen oli sapotem mifala stat taem mifala i statem projek ya. Mi glad tumas blong stap wetem ol brata mo sista we oli yusum taem, ol samting blong olgeta, mo paoa blong olgeta long projek ya. Oli sapotem gud mifala, oli rere blong givhan, mo oli kaen. I klia se Jehova i blesem olgeta mo mifala tu. Mi mi sua se Jehova i tinghae long gudfala frut we i kamaot long wok blong mifala. Be tu, hem i glad blong luk olsem wanem mifala i mekem wok ya.”

 Tangkiu tumas we yu sapotem projek ya blong wokem ol video seri ya, taem yu givim presen mane long Haos Kingdom, o tru long donate.pr418.com.