Evri yia, sam brata mo sista we oli mekem wok blong Jehova fultaem, oli kam long olgeta ples long wol blong joen long Wajtaoa Baebol Skul Blong Gilead, we oli mekem long Wajtaoa Edukesen Senta, Patterson, New York. a Long skul ya, ol studen oli lanem olsem wanem blong kamgud moa long ol defren wok long oganaesesen blong Jehova. Trening ya i mekem se oli kamgud moa blong givhan long kongregesen mo long branj, blong oli gohed strong long wok blong Jehova.

 I tru tumas se Gilead i wan intenasnal skul. Traem tingbaot klas namba 147 long 2019. I gat 56 studen long klas ya we oli kam long 29 kantri. Ol studen we oli kam long Gilead oli stap mekem wan spesel fultaem wok blong Jehova, maet oli Betelaet, eria elda, misinari, o spesel paenia.

 I gat plante samting blong rerem longtaem bifo we ol studen oli sidaon long klasrum. Wan samting se, Wol Hedkwota Travel Dipatmen (WHQ Travel) i pem ol tikit blong ol studen. Long namba 147 klas blong Gilead, oli pem bitim 117,000 vatu blong wanwan studen we i kam. Ol studen we oli kam long Solomon Aelan oli mas tekem fo defren plen blong kam long Patterson mo tri plen blong gobak long hom blong olgeta, hemia i mekem se oli travel bitim 35,400 kilometa. Praes blong wanwan tikit blong olgeta, hemia 251,000 vatu. Blong sevem mane, WHQ Travel i yusum wan program long kompiuta blong faenem ol tikit we oli no sas tumas. Afta we oli bukum ol tikit, kompiuta program ya i gohed blong plante wik mo manis blong jekem sipos praes i godaon. Mo tu, oli yusum kredit we ol kampani blong plen oli givim from we oli bukum plante tikit.

 Plante long ol studen oli nidim visa blong kam long Yunaeted Stet. Ale, Ligol Dipatmen blong Wol Hedkwota i givhan long olgeta blong oli kasem visa blong studen. Praes blong wanwan visa ya i bitim 55,000 vatu.

 ?Trening we ol studen oli kasem i givhan olsem wanem long yumi? Hendra Gunawan i wan elda long Saotis Esia. Long kongregesen blong hem i gat wan kapol we i bin go long Gilead. Hem i se: “Bifo, i no gat fultaem paenia long kongregesen. Be afta we kapol ya i kam, strong tingting mo fasin blong tufala blong wok had i gat paoa long sam narafala, nao oli stat long wok blong paenia. !Biaen wan sista long kongregesen i joen long Skul Blong Kingdom Ivanjelis!”

 Sergio Panjaitan i wok long Betel long Saotis Esia, wetem samfala we oli bin mekem Skul blong Gilead. Hem i se: “Trening we oli kasem i no wan blesing long olgeta nomo, be i wan blesing long mifala tu. !Oli lanem fulap samting! Be oli no traem soem olgeta. Oli serem nomo ol samting we oli lanem. Hemia i leftemap tingting blong mifala, nao mifala i save leftemap tingting blong narafala.”

 ?Mane blong mekem skul ya i kam wea? I kamaot long presen mane blong sapotem wok long fulwol, we plante taem i kamtru long websaet ya donate.pr418.com. Tangkiu tumas long presen mane we yufala i givim wetem gladhat, we i mekem se plante studen oli save kam long olgeta ples long wol blong joen long skul ya.