Long bitim 200 kantri, ol Witnes blong Jehova oli tijim ol man long Baebol, mo oli mekem ol narafala impoten wok blong givhan long olgeta. Be long 35 kantri nomo, oli gat naf mane blong pem ol samting we oli nidim. ?Olsem wanem oli pem ol samting long ol pua kantri?

 Hed Kampani blong ol Witnes blong Jehova i skelem wok blong ol Witnes long fulwol, blong luk wanem samting oli nidim. Oli yusum gud presen mane blong pem ol samting ya, mo oli lukaot blong no westem mane. Sipos wan branj ofis i kasem moa mane i bitim wanem we i nidim long kantri ya, hem i givim haf long wan kantri we i no gat naf mane. Hemia sem plan we ol Kristin bifo oli folem, taem oli givgivhan long olgeta blong “evriwan i gat naf samting.” (2 Korin 8:14) Oli givim ol mane we oli no nidim long ol Kristin we oli gat nid.

 ?Wanem tingting blong ol brata we oli kasem mane long ol narafala branj ofis? Long Tansania, bighaf blong ol man oli laef long smol mane nomo, i no kasem 200 vatu long wan dei. Long ples ya, oli yusum presen mane blong wokem gud bakegen Haos Kingdom long Mafinga kongregesen. Kongregesen i talem se: “Afta we oli mekem wok ya, i gat plante moa man oli kam long ol miting. Mifala i talem tangkiu tumas long oganaesesen blong Jehova mo long ol brata long fulwol we oli gat gladhat blong givim presen mane. Hemia i mekem se mifala i gat wan naes haos wosip.”

 Long Sri Lanka, COVID-19 pandemik i mekem se sam brata oli sot long kakae. Tu long olgeta, hemia Imara Fenando mo smol boe blong hem Enos. Be from presen mane blong ol brata mo sista blong ol narafala kantri, tufala i kasem ol samting we tufala i nidim. Long wan kad we tufala i mekem, tufala i raetem se: “Mitufala i talem tangkiu long ol brata we oli soemaot bigfala lav long mitufala long ol hadtaem ya. Mitufala i glad tumas blong stap long bigfala famle ya, mo mitufala i prea se Jehova bambae i givhan long olgeta brata long ol las dei ya.”

 Nomata weples ol brata mo sista oli laef long hem, oli glad blong serem ol samting we oli gat. Enos i mekem wan smol bokis blong presen mane, blong hem tu i save givhan long ol famle we oli gat nid. Guadalup Alvares i gat sem tingting. Hem i laef long wan ples long Meksiko we ol man oli kasem smol pei nomo, o oli no kasem pei nating. Be hem i givim presen mane we hem i naf blong givim. Hem i se: “Mi talem tangkiu tumas long Jehova from we hem i gud tumas mo hem i lavem yumi. Mi save se smol presen mane we mi givim i joen wetem hemia blong ol narafala, blong givhan long ol brata we oli gat nid.”

 Ol branj ofis oli glad tumas blong sanem presen mane i go long ples we i gat nid. Antoni Kavalo, we i wok long branj komiti long Brasil, i talem se: “Long plante yia, mifala i nidim presen mane blong ol brata blong ol narafala kantri blong givhan long wok long kantri ya. From we mifala i kasem help ya, fulap man oli kam long trutok. Naoia mifala i gat naf mane, mo mifala i gat janis blong halpem ol narafala. Ol brata long Brasil oli luk wok blong prij we i stap gohed long fulwol, mo oli tingbaot samting we oli save mekem blong givhan long wok ya olsem ol disaepol blong Jisas.”

 ?Olsem wanem ol Witnes blong Jehova oli save sapotem ol brata mo sista we oli gat nid? Yumi save givim presen mane blong sapotem wok blong prij long fulwol, be yumi no mas sanem presen mane i go stret long branj ofis blong wan narafala kantri. Yumi save putum presen mane long bokis we kongregesen i makem se “Wok Blong Prij” o sanem tru long donate.pr418.com. !Tangkiu tumas long ol presen mane ya!