“Hed Kampani i mekem desisen se, stat long wik blong 1 Eprel, bambae ol kongregesen oli joen bakegen long Haos Kingdom blong mekem ol miting, sipos i no gat wan rul blong gavman we i blokem.” Ol Witnes blong Jehova long fulwol oli glad tumas taem oli ridim mesej ya long jw.org, long stat blong Maj 2022. Be COVID-19 pandemik i no finis yet. a ?Wanem ol jenis we oli mas mekem, mo ol samting we oli mas pem, blong protektem olgeta we oli joen long ol miting? From we yumi no moa mekem ol miting blong tu yia, ?ol Haos Kingdom bambae oli rere?

 Blong talem stret, blong plante manis finis, ol brata oli stap rerem ol Haos Kingdom blong mekem miting bakegen.

 Wan manis afta we yumi stopem ol miting long Haos Kingdom long 2020, Dipatment Blong Disaen/Konstraksen Blong Fulwol (DKF), long Warwick, New York, i stat blong tingbaot wanem we yumi mas mekem long ol Haos Kingdom, blong protektem ol brata mo sista long COVID-19.

 Samting we yumi nidim long ol defren ples long wol, oli no sem mak. Matthew De Sanctis, we i wok long DKF, i talem se: “Long sam kantri, i no gat ol ples blong wasem han long ol Haos Kingdom. Taem i no gat tap wota, oli mas pem wota o karem i kam long wan reva o wel we i klosap. Long sam narafala kantri, gavman i jenisim ol rul long saed blong ekondisen, ol windo mo fan, mo ol saen blong rimaenem ol man blong wasem han o putum mask.”

 ?Olsem wanem ol brata oli folem ol rul ya? Matthew i talem se, long plante Haos Kingdom, “ol isi rod we oli no sas tumas blong folem, oli wok gud.” Wan eksampol: Long PNG, blong setemap ol ples blong wasem han, oli yusum ol plastik baket blong 20 lita we i gat tap long olgeta. Praes blong mekem olsem long wan Haos Kingdom long bus, hemia 4,600 vatu. Blong givhan long ol Haos Kingdom long Afrika, oli pem bitim 6,000 samting blong wasem han wetem sop, long wan kampani long Esia.

 Narafala samting we ol brata oli mekem, oli putum ol fan o masin long Haos Kingdom, blong pulum win i kam insaed. Mo tu, plante kongregesen oli pem ol longfala stik blong fasem maekrofon long hem, blong mekem se olgeta long kongregesen oli no nid blong tajem maekrofon taem oli ansa. Oltaem oli yusum meresin blong klinim ol samting we ol man oli stap tajem, olsem handel blong ol doa mo ol tap. Sam kongregesen oli putum ol spesel tap long toelet, we wota i stat mo i stop otomatik nomo. Long Jili, praes blong mekem ol jenis olsem long wan Haos Kingdom, hemia samwe long 160,600 vatu.

 Taem ol brata oli traehad blong mekem ol Haos Kingdom oli sef, oli lukaot gud tu blong no westem ol presen mane. Wan eksampol: Long sam kantri, gavman i givhan long olgeta long saed blong mane, blong pem ol samting blong putum sop long hem mo ol longfala stik blong maekrofon. Ol branj ofis oli joen blong pem plante samting wantaem, mo hemia i jip moa. Ol branj ofis mo Dipatmen Blong Pem Ol Samting Long Hedkwota oli pem plante samting stret long kampani we i wokem, nao praes i daon moa, mo i kwik moa blong kasem ol samting ya.

 Ol plan ya blong mekem ol Haos Kingdom oli sef, oli protektem olgeta we oli kam long miting, mo mekem oli harem se oli sef. Wan sista long Peru we nem blong hem Dulcine, i talem se hem i “fraet smol” taem hem i harem se bambae yumi joen bakegen long ol miting long Haos Kingdom. Hem i talem se: “Long stat blong pandemik, mi kasem COVID-19, taswe mi fraet blong go long Haos Kingdom from we mi ting se maet mi kasem vaeras ya bakegen. Be taem mi go, mi luk se ol elda oli mekem plante samting blong mifala i stap sef, olsem ol ples blong wasem han wetem sop, mo ol longfala stik blong fasem maekrofon long olgeta, mo wan program blong klinim gud Haos Kingdom bifo mo afta long evri miting. Olgeta samting ya i mekem mi mi harem se mi sef.” b

 Wan sista blong Sambia we nem blong hem Sara, i fesem wan narafala problem. Hem i talem se: “Sam manis i pas, hasban blong mi i ded from COVID-19. Mi wari se bae mi harem nogud taem mi go long faswan miting long Haos Kingdom we hem i no moa stap wetem mi.” ?Wanem tingting blong Sara naoia? Hem i talem se: “Ol miting ya oli soemaot long mi se Jehova i stap wetem yumi long ol las dei ya. Mi luksave moa naoia bitim bifo, se mi kasem lav, sapot, mo ol tok blong leftemap tingting we mi nidim, long ol elda mo ol narafala brata mo sista.”

 Ol brata mo sista long olgeta ples long wol, oli glad tumas blong joen wanples bakegen long ol Haos Kingdom. Tangkiu tumas long ol presen mane we yufala i givim, we plante taem i kamtru long donate.pr418.com. Presen mane ya i givhan long mifala blong mekem ol ples blong tru wosip oli sef, mo ol ples we yumi save harem gud blong mekem miting long olgeta.