“Sam yia bifo, yumi no tingbaot nomo se bae yumi kasem ol kakae blong spirit tru long fon, tablet, o Intenet.” ?Yu yu gat sem tingting? Hemia haf blong wan gudfala tok we Geoffrey Jackson i givim long 2020 Hed Kampani Apdet #6. Hem i gohed se: “Be ating naoia yumi gat tingting se, ‘Man, ?bae yumi fesem pandemik ya olsem wanem sipos yumi no bin gat JW Laebri? Long ol yia we i pas, Jehova i bin rerem yumi blong yumi rere blong fesem pandemik ya.”

 ?Jehova i stap rerem yumi olsem wanem? ?Olsem wanem oli wokem JW Laebri app, mo oli mekem wanem blong i gohed blong wok gud mo i kam gud moa?

 Long Mei 2013, Hed Kampani i askem long olgeta we oli wok long dipatmen ya MEPS Programming long wol hedkwota, blong wokem wan app we i gat New World Translation long hem we oli wokem bakegen. Pol Wilis, we i wok long MEPS Programming, i talem se: “Kam kasem taem ya, mifala i no bin putum wan app blong mobaelfon o tablet long eniwan long ol app stoa.” Hem i gohed se: “Be mifala i mekem wan tim, stopem sam projek we mifala i wok long olgeta, mo wok wetem sam nara dipatmen blong disaenem mo wokem wan app mo ol samting we i stap long hem. Mifala i prea plante, mo Jehova i givhan bigwan long mifala, mekem se long anuel miting we i kamaot faef manis biaen, oli talemaot se app ya i rere blong yusum.”

 Nekis wok, hemia blong mekem app ya i kam wan laebri we i gat plante moa buk mo lanwis long hem. Long Jenuware 2015, bighaf blong ol buk we mifala i stap yusum naoia long Inglis, oli kamaot long app ya, mo sikis manis biaen, ol man oli save daonlodem long plante handred lanwis.

 Afta long hemia, ol brata oli mekem app ya i kam gud moa long plante rod. Oli ademap ol video, oli putum ol buk mo ol video blong ol miting blong kongregesen oli go long wan ples, mo oli ademap ol refrens long ol vas blong Baebol we i lidim man i go long Buk Blong Mekem Risej.

 !Evri dei, 8 milian man oli openem JW Laebri long divaes blong olgeta, mo evri manis bitim 15 milian man oli openem! ?Olsem wanem blong mekem se app ya i gohed blong wok gud long ol defren divaes? Brata Wilis i eksplenem se: “Wok blong mekem wan app blong mobaelfon o tablet i neva rili finis. Oltaem mifala i stap wokem sam niufala samting blong mekem i kam gud moa mo i isi blong yusum. From we ol sistem long fon mo tablet oli stap apdet, mifala i mas jenisim app ya oltaem blong mekem i stret long olgeta. Mo tu, mifala i lukaot long ol program mo apdetem, taem namba blong ol buk mo rikoding long JW Laebri i stap go antap.” !Sipos yumi kaontem evri lanwis, naoia i gat samwe long 200,000 buk mo bitim 600,000 odio mo video rikoding long JW Laebri!

 Blong gohed blong lukaot gud long app ya, i nidim moa masin i bitim ol kompiuta nomo. Mo tu, plante kompiuta program, mifala i mas pem laesens blong olgeta. Wan laesens olsem, hem i samwe long 166,000 vatu evri yia. Mo tu, MEPS Programming i spenem samwe long 1,116,000 vatu evri yia long ol defdefren divaes, blong meksua se app ya i wok gud long ol niufala kompiuta, tablet, mo mobaelfon.

 JW Laebri i mekem se mifala i no moa spenem bigfala mane blong printim, wokem, mo sanemaot ol buk. Traem tingbaot buklet ya Stadi Gud Long Ol Tok Blong Baebol Evri Dei. Long 2013, mifala i printim klosap 12 milian kopi blong Ridimgud Ol Tok Blong Baebol Evri Dei—2013. Be long 2020, nating se i gat 700,000 moa pablisa long wol, mifala i printim samwe long faef milian nomo. ?From wanem? Plante brata mo sista oli ridim vas blong dei long JW Laebri. a

 JW Laebri i givhan long ol man long plante plante rod. Jeneviev, blong Kanada, i talem se wetem app ya hem i stadi plante moa bitim bifo, i se: “Blong talem stret, sipos mi mas karemaot evri buk we mi nidim blong stadi, mi no ting se bae mi stadi evri moning. Be evri samting we mi nidim blong stadi i stap long app ya. From we mi stadi oltaem, bilif blong mi i kam strong, mo mi kam klosap moa long Jehova.”

 Long taem blong COVID-19 pandemik, app ya i givhan bigwan long plante man. Shalin, blong Yunaeted Stet, i eksplenem se: “From we pandemik i strong long olgeta ples blong wol, bitim wan yia nao, mi no moa luk wan niufala buk we oli printim. Be JW Laebri i givim evri samting we mifala i nidim blong mekem bilif i strong, mo mi talem tangkiu long Jehova from.”

 Fai, blong Filipin, i talem samting we i soemaot filing blong plante man, i se: “Mi yusum app ya long evri haf blong laef blong mi blong stap klosap long Jehova. Evri moning, fas samting we mi mekem, mi openem app ya mo ridim wan samting. Taem mi stap mekem wok long haos, mi lesin long ol rikoding long app ya. Mi yusum app ya taem mi rerem miting o wan Baebol stadi. Taem mi spel, mi wajem ol video long app ya. Taem mi stap wet long laen long wan stoa o nara ples, mi ridim ol atikol o Baebol long app ya. Hem i sas we i sas.”

 Mo tu, app ya i givhan gud long wok blong prij. Wan sista long Kamerun, i wantem yusum wan vas long wok blong prij we i bin luk wan nara sista i yusum sam wik bifo, be hem i no moa tingbaot se vas ya i stap wea. Hem i eksplenem se: “I gud se mi save tingbaot sam tok long vas ya. Mi openem app ya, mi go long Baebol, mo mi lukaot ol tok ya. Kwiktaem nomo mi faenem vas ya. App ya i givhan gud long mi blong faenem ol vas we samtaem mi fogetem.”

 Kaen fasin blong yufala blong givim presen mane folem ol rod we donate.pr418.com i tokbaot, i mekem se mifala i save wokem JW Laebri app, lukaot gud long hem, mo mekem i kam gud moa, blong ol brata mo sista long olgeta ples long wol oli save yusum. Tangkiu tumas blong givim presen mane wetem gladhat blong yufala.

1. Oktoba 2013—Niufala app ya i kamaot mo i gat New World Translation long hem we oli wokem bakegen

2. Jenuware 2015—Oli ademap ol narafala buk long Inglis, mo biaen oli ademap long plante handred lanwis

3. Novemba 2015—Oli ademap ol haelaet

4. Mei 2016—Oli ademap ol miting

5. Mei 2017—Oli mekem se yumi save tekem not

6. Disemba 2017—Oli ademap ol samting blong sapotem Stadi Baebol

7. Maj 2019—Oli mekem se ol man oli save daonlodem ol odio rikoding, wajem ol video, mo faenem ol refrens long Buk Blong Mekem Risej

8. Jenuware 2021—Oli ademap sam gudfala samting long buk ya !Enjoem Laef Olwe!