Jehova God i wantem se olgeta man oli kasemsave long hem mo long Kingdom blong hem long heven, nating se laef blong olgeta i olsem wanem. (1 Timoti 2:3, 4) From samting ya, ol Witnes blong Jehova oli traem wokem ol Baebol mo ol buk blong stadi Baebol we oli stret long olgeta man, hemia olgeta we sora i fas tu. !Oganaesesen blong yumi i wokem plante taosen saen lanwis video, a long bitim 100 defdefren saen lanwis! ?Olsem wanem yumi wokem mo givimaot ol video ya? ?Mo olsem wanem ol rod we yumi yusum naoia oli moa gud i bitim bifo?

 Ol tim blong translesen long plante ples long wol oli wokem ol video long saen lanwis. Fastaem, wanwan long ol tim ya oli tingting gud long samting we bambae oli transletem. Afta, oli tokbaot beswan rod blong soemaot save ya long saen lanwis. Biaen, oli rikodem long video. Naoia, i gat 60 tim we oli stap wok oltaem blong transletem ol buk blong stadi Baebol i go long saen lanwis, mo 40 tim bakegen oli wok sam samtaem nomo.

 Bifo, i sas blong wokem ol video long saen lanwis. Ol video kamera mo ol narafala masin oli sas moa i bitim naoia. Mo tu, oli nidim wan studio blong rikodem ol video ya, mo yumi mas bildim ol studio ya. Samtaem yumi bin wokem gud bakegen wan olfala bilding. Long taem ya, praes blong setemap wan tim long saen lanwis, hemia bitim 3,500,000 vatu. b

 Oganaesesen blong yumi i wantem yusum gud ol presen mane, taswe i lukaot ol rod blong mekem translesen i kam gud moa mo i isi moa. From samting ya, yumi yusum ol masin we oli kamaot i no longtaem, oli no sas tumas, mo i isi blong yusum. Ol translesen tim oli no nidim wan studio, be oli save putum wan skrin we i grin long ofis blong olgeta, mo rikodem ol video long ples ya. Taem i nidim plante brata mo sista blong rikodem wan video, oli save rikodem haf blong olgeta long ofis o long haos nomo. Oli no moa nidim blong go long wan studio.

 Yumi wokem ol softwe tu blong halpem olgeta we oli wokem ol video long saen lanwis. Samting ya i katem taem we ol tim oli nidim blong mekem translesen blong olgeta, i godaon long 50%. Ol transleta oli glad tumas long jenis ya. Wan brata we nem blong hem Alexander, i talem se: “Naoia i gat plante moa niufala saen lanwis video. Mi mi glad tumas long samting ya. Mi wajem ol video ya evri dei.”

 Naoia, praes blong setemap wan translesen tim, hemia samwe long 587,000 vatu. Taswe, yumi save wokem ol saen lanwis video long plante moa lanwis.

 Taem wan tim i rikodem wan video, video ya i mas kasem olgeta we oli nidim. Long ol yia we i pas, yumi wokem ol video kaset mo DVD, be i sas, i tekem taem, mo i hadwok. Yumi bin sanem ol DVD i go long wan narafala kampani blong oli wokem plante moa kopi. Afta, yumi bin sanem ol video kaset ya mo DVD i go long ol kongregesen. Long yia 2013, yumi spenem bitim 234,000,000 vatu blong wokem ol DVD long saen lanwis.

 Olgeta we sora i fas oli glad tumas blong kasem ol samting ya. Be i no isi blong yusum ol video ya, speseli taem i gat plante moa kaset mo DVD i kamaot. Samtaem oli mas yusum bitim wan DVD blong rikodem wan buk blong Baebol. Wan brata long Brasil we nem blong hem Gilnei, i talem se: “Taem mifala i wantem ridim wan vas, mifala i mas faenem stret video kaset, mo stret ples long kaset ya we vas i stap long hem. Hemia i had tumas.” Wan sista we i yusum ol saen lanwis DVD bifo, nem blong hem Rafayane, i talem se: “Taem mi stadi mi wan, mi kam taed we. Mi spenem plante taem blong faenem ol vas mo refrens.” Plante brata mo sista we oli stap prij, oli bin tekem ol DVD mo video kaset wetem olgeta, blong oli save plei olgeta long TV blong man we i intres. Sam brata mo sista oli tekem ol prapa DVD pleia blong olgeta. Be smoltaem biaen, ol smol DVD pleia we oli gat skrin oli kamaot, nao plante brata mo sista oli karem i go wetem olgeta. Bobby, blong Yunaeted Stet, i talem se: “Sipos mifala i ridim wan vas mo wantem ridim wan narawan, plante taem mifala i mas jenisim DVD. Hemia i tekem taem mo i mekem i had blong yusum Baebol taem mifala i storian wetem ol man.”

 Long 2013, oganaesesen blong Jehova i wokem JW Library Sign Language app. Olsem nao, ol brata mo sista oli save daonlodem mo plei ol saen lanwis video long fon o tablet blong olgeta. Fastaem, app ya i kamaot long Saen Lanwis blong Amerika. Long 2017, app ya i kamaot long plante defren kaen saen lanwis. Ol brata mo sista long fulwol oli glad tumas. Juscelino, wan brata long Brasil, i talem se: “!Mi sapraes we! Mi stap tingbaot oltaem olsem wanem Hed Kampani i lavem mifala we sora i fas, mo olsem wanem i wantem tumas blong mifala i kam ol Kristin we oli bigman, olsem olgeta we oli save toktok. Mi glad we mi glad long app ya, mo i pulum mi blong stadi Baebol moa.”

 Tede ol saen lanwis video oli kamaot long websaet blong yumi, mo long JW Library Sign Language app. Naoia yumi save transletem, rikodem, mo givimaot ol saen lanwis video long sam dei nomo, i no tekem sam manis o yia olsem bifo. Mo tu, plante saen lanwis video blong ol buk, oli kamaot long semtaem olsem ol narafala lanwis.

 Makem gud sam tok we ol brata mo sista we sora i fas oli talem. Wan sista, nem blong hem Klízia, i talem se: “I no gat wan narafala oganaesesen olsem oganaesesen blong Jehova we i kea gud long ol man we sora i fas. Hem i givim ol save we mifala i nidim blong mekem bilif i stap strong, mo i isi blong mifala i kasem. I no gat wan narafala samting long wol, we i gud olsem samting we oganaesesen blong Jehova i mekem long mifala.” Vladimir i talem se: “Ol video oli soemaot long mi se Jehova i tingbaot olgeta we sora i fas, sem mak olsem we i tingbaot ol narafala man.”

 Plante saen lanwis video oli talem se: “Oli yusum video ya long fulwol blong tijim ol man long Baebol. Wok ya i stanap long presen mane nomo.” Tangkiu tumas long yufala from presen mane we yufala i givim, mo plante taem hemia tru long donate.pr418.com. Presen mane ya i mekem se yumi save wokem ol Baebol mo ol buk blong stadi Baebol, long lanwis blong ol man mo long saen lanwis tu.