!LUKAOT GUD OLTAEM!

2022: Wan Yia Blong Trabol Mo Wari ?Baebol i Talem Wanem?

PLEI

Long 2022, yumi harem nius oltaem blong wo, hadtaem long saed blong mane, mo ol bigfala disasta. Baebol nomo i eksplenem mining blong ol samting ya we i stap hapen.

Mining blong ol samting we i hapen long 2022

Ol samting we i hapen long yia we i pas, oli soemaot moa se yumi stap laef long taem ya we Baebol i kolem “ol las dei.” (2 Timoti 3:1) Taem ya i stat long yia 1914. Makem gud olsem wanem ol samting we i hapen oli sem mak long samting we Baebol i tokbaot:

“Ol faet.”—Matiu 24:6.

“2022 Hemia Yia We Rabis Faet i Kasem Yurop Bakegen.” a

Yu luk atikol ya “Ol Ami Blong Rasia Oli Atakem Yukren.”

“Kakae i sot.”—Matiu 24:7.

“2022: Hanggri i Bigwan Moa i Bitim Ol Narafala Yia.” b

Yu luk atikol ya “Kakae i Kam Sot Moa Long Fulwol From Wo Long Yukren.”

“Ol strong sik.”—Luk 21:11.

“Sik ya polio i kambak, mangkipoks i kam antap, mo COVID-19 i gohed blong spolem fulap man. Hemia i soemaot denja blong ol sik we oli pas kwiktaem i go long ol narafala, mo olsem wanem i isi blong ol man oli kasem.” c

Yu luk atikol ya “6 Milian Man Oli Ded From COVID.”

‘Plante samting we i mekem ol man oli fraet.’—Luk 21:11.

“Ples i hot bitim mak, bigfala draetaem, ol faea blong bus, mo bigfala wota i ron olbaot. Bambae ol man oli no fogetem hot taem blong 2022 from ol narakaen weta we i spolem ol ples, i kilim plante handred taosen man i ded, mo i mekem se plante milian man oli lusum haos blong olgeta.” d

Yu luk atikol ya “Wol i Stap Long Denja From We i Hot Tumas.”

“Ol man oli stap raorao [o, “girap agens long gavman,” fut.].”—Luk 21:9.

“Long 2022, ol protes agensem gavman oli plante moa from we ol man oli kros tumas long saed blong ol problem blong mane, speseli praes blong ol samting we i stap go antap.” e

Yu luk atikol ya “Long Fulwol, Praes Blong Evri Samting i Stap Go Antap.”

?Wanem bambae i hapen nekis yia?

I no gat man i save wanem bambae i hapen long 2023. Be samting we yumi save finis se i no longtaem Kingdom blong God, hemia gavman blong hem long heven, bambae i mekem ol bigfala jenis oli kamaot long wol. (Daniel 2:44) Gavman ya bambae i finisim fasin safa mo i mekem se wil blong God i kamaot long wol ya.—Matiu 6:9, 10.

Mifala i askem long yu blong folem advaes blong Jisas Kraes blong “lukaot gud oltaem,” blong luksave olsem wanem ol samting we i hapen long wol oli stap mekem ol profet tok long Baebol oli kamtru. (Mak 13:37) Sipos yu wantem save olsem wanem Baebol i save givhan moa long yu naoia, mo olsem wanem i save givim trufala hop blong wan gudfala fiuja long yu mo famle blong yu, plis kontaktem mifala.

a AP Nius, “2022 Hemia Yia We Rabis Faet i Kasem Yurop Bakegen,” we Jill Lawless i raetem long 8 Disemba 2022.

b Program Blong Givim Kakae Long Fulwol, “Wan Bigfala Trabol Long Fulwol Long Saed Blong Kakae.”

c JAMA Miting Long Saed Blong Helt, “Laef Long Taem Blong Ol Pandemik—COVID-19, Mangkipoks, Polio, mo Sik Ya X,” we Lawrence O. Gostin, JD, i raetem long 22 Septemba 2022.

d Earth.Org, “?From Wanem Weta i Hot Tumas Long 2022 Bitim Ol Narafala Yia Bifo?” we Martina Igini, i raetem long 24 Oktoba 2022.

e Carnegie i Givim Mane Blong Mekem Pis Long Fulwol, “Long Fulwol Ol Man We Oli Kros Oli Protes Long 2022 From Trabol Long Saed Blong Mane,” we Thomas Carothers mo Benjamin Feldman oli raetem long 8 Disemba 2022.