Long 9 Oktoba 2024, oganaesesen ya World Wildlife Fund, i talemaot wan ripot we i soemaot se ol samting we ol man oli mekem, i stap spolem ol animol. Ripot ya i talem se: “Long ol 50 yia we i pas (1970-2020), namba blong ol animol i godaon samwe 73 pesen.” Mo ripot ya i givim wan woning tu se: “Fiuja blong ol laef samting long wol, i dipen long ol samting we bambae yumi mekem long ol faef yia we i kam.”

 Plante man oli harem nogud taem oli harem ol ripot olsem. Hemia from we yumi laekem tumas naesfala wol blong yumi, mo yumi no wantem luk we ol animol oli safa. I stret nomo we yumi harem olsem, from we God i wokem yumi blong yumi lukaot gud long ol animol.—Jenesis 1:27, 28; Ol Proveb 12:10.

 Taswe, maet yu stap tingting se: ‘?Bambae yumi naf blong protektem ol animol? ?Baebol i talem wanem?’

 Nating se yumi traehad blong protektem ol animol, be God nomo i naf blong protektem gud olgeta. Long Revelesen 11:18, Baebol i talem se God bambae i “spolem ol man ya we oli stap spolem wol.” Vas ya i tijim yumi long tu samting:

1.  1. God bambae i no letem ol man oli spolem wol fulwan.

2.  2. I no longtaem, God bambae i mekem wan samting. ?Olsem wanem yumi save samting ya? Taem yumi luk ol samting we oli stap hapen tede, yumi luksave se ol man oli stap spolem wol moa i bitim bifo.

 ?God bambae i mekem wanem blong stretem problem ya? Bambae hem i yusum gavman o Kingdom blong hem long heven, blong rulum fulwol. (Matiu 6:10) Gavman ya bambae i tijim ol man we oli stap aninit long rul blong hem, blong oli lukaot gud long ol animol.—Aesea 11:9.