?Yu tingbaot wanem, taem yu harem tok ya “apokalips”? Maet yu tingbaot wan bigfala disasta we i kasem fulwol, mo i finisim olgeta laef long wol. Samfala oli ting se yumi stap klosap long wan disasta olsem, speseli taem oli ridim ol nius olsem:

•   “I posibol se i gat wan bigfala faet we oli yusum ol niuklia tul blong faet, maet oli minim nomo blong statem o oli mestem, o maet i kamaot from we oli kasem rong infomesen.”—Bulletin of the Atomic Scientists.

•   “Long ten yia we i pas, long olgeta ples long wol, yumi sapraes long ol bigfala hariken we yumi luk, ol bus faea, bigfala draetaem, korel i ded long samples long solwota, ples i hot bitim mak, mo bigbigfala ren we i mekem wota i ron olbaot.”—National Geographic.

•   “Ol bigfala hip blong lokis long Afrika oli kam bigwan moa mo oli spolem plante moa ples i bitim ol yia bifo.”—The Associated Press.

 ?Olsem wanem? ?Wan bigfala apokalips bambae i spolem fulwol? ?Baebol i talem wanem?

 Nogat. Tok blong God, Baebol, i talem se wol ya bambae i stap blong olwe. (Prija 1:4) God bambae i no spolem wol ya we hem i mekem, be bambae hem i “spolem ol man ya we oli stap spolem wol.”—Revelesen 11:18.

 Baebol i talem se “wol” we bambae hem i finis, hemia ol man we oli no wantem lesin long God mo oli folem ol fasin we olgeta nomo oli wantem. God bambae i finisim “wol we i fulap long ol man we oli no obei long hem,” olsem we hem i mekem long taem blong Noa.—2 Pita 2:5; 3:7.

 Olsem 1 Jon 2:17 i talem, “wol ya wetem evri samting blong hem we ol man oli wantem tumas, oli stap lus.” Vas ya i soemaot se God bambae i no distroem planet blong yumi be bambae i distroem ol man we oli stap gohed blong mekem rabis fasin.

 Baebol i no talem stret wetaem en bambae i kam. (Matiu 24:36) Be hem i soemaot se i klosap. Baebol i talem se bambae yumi luk ol samting olsem:

•   Ol bigfala faet, kakae i sot, ol strong sik, mo ol bigfala etkwek bambae oli hapen “olbaot long wol.”—Matiu 24:3, 7, 14; Luk 21:10, 11; Revelesen 6:1-8.

•   Bighaf blong ol man bambae oli stap tingbaot olgeta nomo. Bambae oli “laekem mane tumas,” oli “no gat tangkiu,” mo oli “no save bos long tingting” blong olgeta.—2 Timoti 3:1-5.

 Plante man oli agri se stat long yia 1914, ol samting we oli hapen long wol ya oli sem mak long samting we Baebol i talem se bambae i hapen klosap long en. Blong kasem save moa, luk ol haf ya “?Fasin Blong Baebol Blong Kaontem Ol Taem Mo Ol Yia, i Soemaot Wanem Long Saed Blong Yia 1914?” mo “?Wanem Saen Blong ‘Ol Las Dei,’ o ‘En Blong Wol’?”

 Tok ya “apokalips” long Baebol, i kamaot long wan olfala Grik tok we i minim “tekemaot lid” o “tekemaot kaliko” we i kavremap samting. Oli yusum tok ya plante taem blong tokbaot ol save we i haed nao i kam long klia ples. Mo tu, Baebol i tokbaot “revelesen [o apokalips] blong Jisas Kraes,” hemia i minim taem we Jisas i soemaot paoa blong hem blong spolem ol rabis fasin long wol mo sevem olgeta we oli wosipim God.—1 Pita 1:7, 13, futnot; 2 Tesalonaeka 1:6, 7.

 Nem blong laswan buk blong Baebol hemia A·po·kaʹly·psis o Revelesen, from we i tokbaot ol samting we bambae i hapen long fiuja. (Revelesen 1:1) Buk ya i tokbaot gud nius we i givim hop. (Revelesen 1:3) Mo i soemaot se God bambae i finisim ol fasin we oli no stret mo i mekem wol ya i kam wan paradaes. Long taem ya, ol man bambae oli no moa harem i soa long bodi blong olgeta, mo bambae oli no moa safa mo ded.—Revelesen 21:3, 4.

 ?Yu yu laekem blong lanem moa long saed blong ol nambawan promes ya long Baebol? Ol Witnes blong Jehova oli glad blong mekem wan fri Baebol stadi long yu. I gud yu askem long olgeta.