Nating se ol gavman mo ol oganaesesen oli traehad blong mekem se i gat pis long fulwol, be oli no naf. Tede, i gat plante moa faet i bitim olgeta narafala taem afta long Wol Wo Tu. Samwe tu bilian man oli laef long ol ples we i gat faet long hem.

 ?From wanem ol man oli no naf blong mekem se i gat pis? ?Baebol i talem wanem?

1.  1. Fasin blong ol man i mekem se i had blong oli gat pis. Baebol i talemaot finis se long taem blong yumi, bambae “ol man oli tingbaot olgeta nomo, oli laekem mane tumas, oli tok flas, tingting blong olgeta i go antap tumas, . . . oli no holemstrong long ol narafala, . . . oli no save agri long wan tingting, . . . oli no save bos long tingting, oli wael olgeta, . . . oli stronghed, oli flas gogo tingting blong olgeta i go antap tumas.”—2 Timoti 3:2-4.

2.  2. Ol man oli no naf blong stretem ol problem long wol sipos Krieta blong olgeta, Jehova a God, i no givhan long olgeta. Baebol i talem se man “i no naf blong lidim step blong hem.”—Jeremaea 10:23.

3.  3. Wan man we i rabis i stap kontrolem fulwol, hemia Devel Setan, mo hem “i stap lidim olgeta man long wol oli go krangke.” (Revelesen 12:9) From we “fulwol i stap long paoa blong man ya we i rabis,” oltaem i gat ol faet mo wo.—1 Jon 5:19.

 Baebol i promes se God nomo bambae i mekem se i gat pis long fulwol, be i no ol man.

•   “‘From mi mi save gud ol tingting we mi stap tingbaot blong mekem long yufala, hemia tingting blong givim pis, be i no trabol, blong givim wan fiuja mo wan hop long yufala,’ hemia nao tok blong Jehova.”—Jeremaea 29:11.

 ?Olsem wanem God bambae i mekem promes ya i kamtru? “God ya we i givim pis bambae i smasem Setan.” (Rom 16:20) God bambae i yusum gavman blong hem long heven, hemia “Kingdom blong God,” blong mekem se i gat pis long fulwol. (Luk 4:43) Taem Jisas Kraes we i King blong Kingdom ya i rulum wol, bambae hem i tijim ol man blong gat pis wetem ol narafala.—Aesea 9:6, 7.

•   Blong save moa, ridim atikol ya “?Kingdom Blong God Bambae i Mekem Wanem?”